ରାଜନୀତିରେ ଫେସବୁକ୍, ଇନଷ୍ଟାଗ୍ରାମ୍ ଆଉ ଏକ୍ସରେ ବାଘ ଭଳି ଗର୍ଜନ କରିବା ଯେତିକି ସହଜ, ରାଜରାସ୍ତାର ଖରା-କାଦୁଅରେ ଲୋକଙ୍କ ସାମ୍ନାରେ ଛିଡ଼ା ହେବା ସେତିକି କଷ୍ଟ। ଆଜି ଆମେ ଏମିତି ଏକ ରାଜନୈତିକ ଘଟଣାକ୍ରମକୁ ପୋଷ୍ଟମର୍ଟମ କରିବାକୁ ଯାଉଛୁ, ଯାହା ଏବେ ରାଜ୍ୟ ରାଜନୀତି ବିଶେଷ କରି ଶଙ୍ଖ ଭବନ ଭିତରେ ଚର୍ଚ୍ଚାର ସବୁଠୁ ବଡ଼ ବିଷୟ ପାଲଟିଛି।
ପ୍ରଶ୍ନ ଉଠୁଛି— ସୁଜାତା ରାଉତ କାର୍ତ୍ତିକେୟନ କ’ଣ କେବଳ ସୋସିଆଲ୍ ମିଡିଆର ସୀମିତ ପରିସର ଭିତରେ ଜଣେ ‘ବାଘୁଣୀ’? ନା ସତରେ ତାଙ୍କ ପାଖରେ ମୈଦାନକୁ ଓହ୍ଲାଇ ଲୋକଙ୍କ ନେତ୍ରୀ ହେବାର ସାହସ ଅଛି?
ଗତ କିଛି ମାସ ଧରି ବିଜେଡିର ଏକ ନିର୍ଦ୍ଦିଷ୍ଟ ଗୋଷ୍ଠୀ ଏବଂ ସୋସିଆଲ୍ ମିଡିଆର କିଛି ପେଡ୍ ଫ୍ୟାନ୍ କ୍ଲବ୍ ପ୍ରଚାର କରୁଥିଲେ ଯେ, ସୁଜାତା ରାଉତ କାର୍ତ୍ତିକେୟନ ସକ୍ରିୟ ରାଜନୀତିକୁ ଆସିଲେଣି, ଏବେ ବିଜେପି ସରକାର ଛାନିଆ ହୋଇଯିବ! କୁହାଗଲା ସେ ବିଜେଡିର ନୂଆ ତ୍ରାଣକର୍ତ୍ତୀ, ଦଳର ଭବିଷ୍ୟତ କାଳେ ତାଙ୍କରି ହାତରେ ସୁରକ୍ଷିତ। କିନ୍ତୁ ଯେତେବେଳେ ପ୍ରକୃତ ପରୀକ୍ଷାର ସମୟ ଆସିଲା— ସେତେବେଳେ ସୁଜାତା କାର୍ତ୍ତିକେୟନ କୁଆଡ଼େ ଗଲେ?
ପ୍ରଥମେ ନଜର ପକାନ୍ତୁ ଗତ କିଛି ସପ୍ତାହ ତଳର ଘଟଣା ଉପରେ। ରାଜ୍ୟର ଅନେକ ଜିଲ୍ଲାରେ ବନ୍ୟାର ଭୟଙ୍କର ସ୍ଥିତି। ହଜାର ହଜାର ଲୋକ ଜଳବନ୍ଦୀ, ଘରଦ୍ୱାର ଭାଙ୍ଗି ଚୁରମାର, ଖାଇବାକୁ ମୁଠାଏ ଶୁଖିଲା ଖାଦ୍ୟ ନାହିଁ, ଛୋଟ ଛୋଟ ପିଲାଙ୍କୁ ଧରି ମା’ମାନେ ଉଚ୍ଚା ରାସ୍ତା ଉପରେ ପାଲ ଟାଙ୍ଗି ବସିଛନ୍ତି। ଏଭଳି ସମୟରେ ବିରୋଧୀ ଦଳର ନେତାମାନେ ଲୋକଙ୍କ ସୁଖ-ଦୁଃଖରେ ସାମିଲ ହେବା, ସରକାରଙ୍କ ରିଲିଫ୍ ବଣ୍ଟନ ଉପରେ ଚାପ ପକାଇବା ସ୍ୱାଭାବିକ କଥା।
ବିଜେଡିର ବହୁ ପୁରୁଣା ନେତା, କର୍ମୀ ନିଜ ନିଜ ଅଞ୍ଚଳରେ ଡଙ୍ଗାରେ ବୁଲିଲେ, ଲୋକଙ୍କୁ ଚୁଡ଼ା-ଗୁଡ଼ ବାଣ୍ଟିଲେ। କିନ୍ତୁ ସୁଜାତା ରାଉତ କାର୍ତ୍ତିକେୟନ କୁଆଡ଼େ ଗଲେ? ସେ କ’ଣ କୌଣସି ଗୋଟିଏ ବନ୍ୟା ପ୍ରଭାବିତ ଗାଁକୁ ଯାଇଥିଲେ କି ? ଉତ୍ତର ଆସିବ ନା। କାରଣ ସେ କାଳେ ତାଙ୍କ ଗୋଡ଼ରେ କାଦୁଅ ଲାଗିଲେ ସଂକ୍ରମଣ ହୋଇଯିବ ସେ ଭୟରେ ସେ ବନ୍ୟାଞ୍ଚଳ ଗଲେ ନାହିଁ ବୋଲି ଆଲୋଚନା ହେଉଛି।
ଲୋକଙ୍କ କହିବା କଥା— କାଳେ ପାଦରେ କାଦୁଅ ଲାଗିଯିବ, କାଳେ ଏସି ଗାଡ଼ିରୁ ବାହାରି ଝାଳ ବୋହିବ, ସେଥିପାଇଁ ମ୍ୟାଡାମ୍ କେବଳ ଏସି ରୁମ୍ ଭିତରେ ବସି ସୋସିଆଲ୍ ମିଡିଆରେ କିଛି ଫଟୋସୁଟ୍ ଆଉ ଲେଖା ପୋଷ୍ଟ କରି ନିଜ ଦାୟିତ୍ୱ ସାରିଦେଲେ। ଜଣେ ଜନପ୍ରତିନିଧି ବା ନେତ୍ରୀ ହେବାକୁ ଯାଉଥିବା ବ୍ୟକ୍ତିର ଏହି ଆଭିମୁଖ୍ୟ କ’ଣ ପ୍ରମାଣ କରୁଛି? ଯିଏ ଲୋକଙ୍କ ବିପଦବେଳେ ରାସ୍ତାକୁ ଓହ୍ଲାଇ ପାରିବେ ନାହିଁ, ସେ କିପରି ସାଧାରଣ ଜନତାଙ୍କ ନେତ୍ରୀ ଭାବେ ନିଜକୁ ପ୍ରତିପାଦିତ କରିବେ?
ଏବେ ଦେଖିବା ଦ୍ୱିତୀୟ ଏବଂ ସବୁଠାରୁ ବଡ଼ ରାଜନୈତିକ ଫ୍ଲପ୍ ସୋ’ କଥା।
ଗତ ୧୫ ଦିନ ହେଲା MMDR ଆଇନକୁ ନେଇ ସୋସିଆଲ ମିଡିଆରେ ଏକ ବଡ଼ ଧରଣର ଝଡ଼ ସୃଷ୍ଟି କରାଗଲା। ସୁଜାତାଙ୍କ ସମର୍ଥକ ଏବଂ ଆଇଟି ସେଲ୍ ଏଭଳି ପୋଷ୍ଟ କଲେ ଯେମିତି କେବଳ ସୁଜାତା ହିଁ ଓଡ଼ିଶାର ଖଣି ସମ୍ପଦର ଏକମାତ୍ର ରକ୍ଷକ। ଫେସବୁକ୍ରେ ଲମ୍ବା ଲମ୍ବା ନୋଟ୍, ଏକ୍ସରେ ଟ୍ରେଣ୍ଡ୍, ଇନଷ୍ଟାରେ ଭିଡିଓ, ଖବର କାଗରେ ଲେଖା ପ୍ରକାଶ ପାଇଲା।
ଆଜି ଥିଲା ସେହି ଲଢ଼େଇର ଗ୍ରାଉଣ୍ଡ୍ ଟେଷ୍ଟ। ବିଜେଡି ପକ୍ଷରୁ ରାଜଭବନ ସମ୍ମୁଖରେ ବିଶାଳ ପ୍ରତିବାଦ ସଭା ଆୟୋଜନ କରାଯାଇଥିଲା। ଦଳର ସୁପ୍ରିମୋ ତଥା ପୂର୍ବତନ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଶାରୀରିକ ଅସୁସ୍ଥତା କିମ୍ବା ବ୍ୟକ୍ତିଗତ କାରଣରୁ ଏହି ପ୍ରତିବାଦ ସଭାକୁ ଆସିପାରି ନଥିଲେ।
ଦଳର ତୃଣମୂଳ କର୍ମୀଙ୍କ ଭିତରେ ଏକ ଚର୍ଚ୍ଚା ଥିଲା— ନବୀନ ବାବୁ ନ ଆସିଲେ ମଧ୍ୟ ଯିଏ ଗତ ୧୫ ଦିନ ହେଲା ଏହି ପ୍ରସଙ୍ଗରେ ସବୁଠୁ ବେଶୀ ଗର୍ଜନ କରୁଥିଲେ, ସେହି ସୁଜାତା ରାଉତ କାର୍ତ୍ତିକେୟନ ନିଶ୍ଚୟ ଆସିବେ, ମାଇକ୍ ଧରିବେ, କେନ୍ଦ୍ର ଓ ରାଜ୍ୟ ସରକାରଙ୍କ ବିରୋଧରେ ହୁଙ୍କାର ଦେବେ। କିନ୍ତୁ ଆଶ୍ଚର୍ଯ୍ୟର କଥା— ପ୍ରତିବାଦ ସଭାରେ ବହୁ ବରିଷ୍ଠ ନେତା ଉପସ୍ଥିତ ଥିଲେ, ହେଲେ ସୁଜାତା ଫ୍ରେମରୁ ସମ୍ପୂର୍ଣ୍ଣ ଗାଏବ୍!
ଏବେ ପ୍ରଶ୍ନ ଉଠୁଛି, ଯେଉଁ ପ୍ରସଙ୍ଗକୁ ନେଇ ସେ ସୋସିଆଲ୍ ମିଡିଆରେ ଏତେ ସକ୍ରିୟ ଥିଲେ, ସେହି ପ୍ରସଙ୍ଗରେ ରାସ୍ତାକୁ ଓହ୍ଲାଇ ପ୍ରତିବାଦ କରିବାକୁ ତାଙ୍କୁ କେଉଁ କଥା ଅଟକାଇଲା? ବିଜେଡିର ଅନ୍ଦରମହଲରୁ ଯେଉଁ ଖବର ସାମ୍ନାକୁ ଆସୁଛି, ତାହା ବେଶ୍ ଚମକାଇ ଦେବା ଭଳି।
ରାଜନୈତିକ ସମୀକ୍ଷକ ଏବଂ ଦଳର କିଛି ଅସନ୍ତୁଷ୍ଟ ନେତାଙ୍କ କହିବା କଥା— ଏହା ପଛରେ ରହିଛି ଏକ ବଡ଼ ଦ୍ୱନ୍ଦ୍ୱ।
ସୁଜାତାଙ୍କ ସ୍ୱାମୀ ତଥା ପୂର୍ବତନ ପ୍ରଭାବଶାଳୀ ପ୍ରଶାସକ ଭୈରବ. କାର୍ତ୍ତିକେୟନ ପାଣ୍ଡିଆନ୍ ଯେତେବେଳେ ବିଜେଡି ଏବଂ ସରକାରରେ ସର୍ବେସର୍ବା ଥିଲେ, ସେତେବେଳେ ଦଳର ସବୁଠାରୁ ବଡ଼ ଶକ୍ତି କିଏ ଥିଲା? ରାଜ୍ୟର ବଡ଼ ବଡ଼ ଖଣି ବ୍ୟବସାୟୀଙ୍କ ସହ ତାଙ୍କର ସମ୍ପର୍କ କିପରି ଥିଲା? ନିର୍ବାଚନ ପରିଚାଳନା ପାଇଁ କାହାର ଅନୁଦାନ ବିଜେଡିକୁ ଆର୍ଥିକ ଭାବେ ବଳୀୟାନ କରୁଥିଲା? ଏହା କାହାକୁ ଅଛପା ନାହିଁ।
ଏବେ ଯଦି ସୁଜାତା ରାଉତ କାର୍ତ୍ତିକେୟନ ଖୋଲାଖୋଲି ମଞ୍ଚ ଉପରକୁ ଆସି ଖଣି ମାଲିକ ଓ ଖଣି ନୀତି ବିରୋଧରେ ପ୍ରଚଣ୍ଡ ଭାଷଣ ଦିଅନ୍ତି, ତେବେ ତାହା କ’ଣ ସେହି ପୁରୁଣା ବ୍ୟବସାୟୀକ ସମ୍ପର୍କରେ ଫାଟ ସୃଷ୍ଟି କରିବ ନାହିଁ? ଅତୀତର ଅନେକ ଫାଇଲ୍ ଏବଂ ଖଣି ଲିଙ୍କ୍ କ’ଣ ପୁଣି ଥରେ ଲୋକଲୋଚନକୁ ଆସିବ ନାହିଁ?
ଏହି ଦ୍ୱିଧା ଏବଂ ଭୟ ହିଁ ତାଙ୍କୁ ରାଜଭବନ ସାମ୍ନାରେ ହୋଇଥିବା ପ୍ରତିବାଦ ସଭାରୁ ଦୂରେଇ ରଖିଲା ବୋଲି ରାଜନୈତିକ ମହଲରେ ଦୃଢ଼ ଚର୍ଚ୍ଚା ହେଉଛି। ଅର୍ଥାତ୍, ସୋସିଆଲ୍ ମିଡିଆରେ କେବଳ ଲାଇକ୍ ଆଉ କମେଣ୍ଟ ପାଇଁ ଲେଖିବା ଗୋଟିଏ କଥା, କିନ୍ତୁ କ୍ୟାମେରା ଆଗରେ ଦାୟିତ୍ୱବାନ ଭାବେ ଉତ୍ତରଦାୟୀ ହେବା ସମ୍ପୂର୍ଣ୍ଣ ଅଲଗା କଥା।
ଏହି ଘଟଣା ପରେ ବିଜେଡି ଭିତରେ ଏବେ ତୃଣମୂଳ କର୍ମୀଙ୍କ ମନୋବଳ ଭାଙ୍ଗିବାରେ ଲାଗିଛି।
କର୍ମୀମାନେ ପ୍ରଶ୍ନ କରୁଛନ୍ତି—
- ନିର୍ବାଚନ ହାରିବା ପରେ ଯେଉଁ ନେତାମାନେ ଗ୍ରାଉଣ୍ଡ୍ରେ କାମ କରୁଛନ୍ତି, ଲାଠିଚାର୍ଜ ଖାଉଛନ୍ତି, କେସ୍ ଖାଉଛନ୍ତି, ସେମାନଙ୍କୁ ପଛକୁ ଠେଲି ଜଣେ ‘ତାମିଲ ବୋହୂ’ ତଥା ପୂର୍ବତନ ଅଫିସରଙ୍କୁ ଆଗକୁ ଆଣିବାର ଯୋଜନା କାହିଁକି କରାଯାଉଥିଲା?
- ଯଦି ଦଳର ସଙ୍କଟ ସମୟରେ, ଲୋକଙ୍କ ସମସ୍ୟା ସମୟରେ ସେ ରାସ୍ତାକୁ ଓହ୍ଲାଇବେ ନାହିଁ, ତେବେ ତାଙ୍କୁ ନେତ୍ରୀ ଭାବେ ଗ୍ରହଣ କରାଯିବ କାହିଁକି?
- କେବଳ ସ୍ମାର୍ଟଫୋନ୍ ସ୍କ୍ରିନ୍ ଭିତରେ ରାଜନୀତି କରି ଓଡ଼ିଶାରେ କ୍ଷମତାକୁ ଫେରିବା ସମ୍ଭବ କି?
ଓଡ଼ିଶାର ରାଜନୈତିକ ଇତିହାସ କହୁଛି— ଏ ମାଟି ସେହି ନେତାଙ୍କୁ ସମ୍ମାନ ଦିଏ, ଯିଏ ଖରା, ବର୍ଷା, ଶୀତ କାକର ନମାନି ଲୋକଙ୍କ ପାଖକୁ ଯାଏ। ଏସି କୋଠରୀରେ ବସି ପିଆର୍ (PR) ଏଜେନ୍ସି ଚଳାଇ ଲୋକଙ୍କ ହୃଦୟ ଜିତିବା ସମ୍ଭବ ନୁହେଁ।
ସୁଜାତା ରାଉତ କାର୍ତ୍ତିକେୟନ ନିଜକୁ ଜଣେ ସକ୍ରିୟ ରାଜନେତ୍ରୀ ଭାବେ ପ୍ରତିଷ୍ଠା କରିବାକୁ ଚାହୁଁଛନ୍ତି ସତ, କିନ୍ତୁ ବନ୍ୟାଞ୍ଚଳରୁ ଦୂରେଇ ରହିବା ଏବଂ ଗୁରୁତ୍ୱପୂର୍ଣ୍ଣ ପ୍ରତିବାଦ ସଭାରୁ ପଛଘୁଞ୍ଚା ଦେବା ତାଙ୍କ ରାଜନୈତିକ ପରିପକ୍ୱତା ଉପରେ ଏକ ବିରାଟ ପ୍ରଶ୍ନଚିହ୍ନ ଲଗାଇଦେଇଛି।
ସୋସିଆଲ୍ ମିଡିଆରେ ବାଘୁଣୀ ସାଜି ଗର୍ଜନ କରିବା ଯେତିକି ସହଜ, ରାଜରାସ୍ତାରେ ଲୋକଙ୍କ ହକ୍ ପାଇଁ ଲଢ଼ିବା ସେତିକି କଠିନ। ଆଗାମୀ ଦିନରେ ସୁଜାତା ଏହି ଟ୍ୟାଗ୍ ହଟାଇ ମୈଦାନକୁ ଆସିପାରୁଛନ୍ତି ନା କେବଳ ଭର୍ଚୁଆଲ୍ ଜଗତରେ ହିଁ ସୀମିତ ରହିଯାଉଛନ୍ତି, ତାହା ଉପରେ ରହିବ ସମସ୍ତଙ୍କ ନଜର।
Also read : https://purvapaksa.com/nehrus-decision-75-years-ago-a-big-religious-crisis-for-rahul-gandhi/
