ତାମିଲନାଡୁର ରାଜନୀତିକୁ ବୁଝିବାକୁ ହେଲେ କେବଳ ନିର୍ବାଚନୀ ଗଣିତ କିମ୍ବା ଦଳୀୟ ସମୀକରଣ ଦେଖିଲେ ହେବନାହିଁ। ଏହି ରାଜ୍ୟର ରାଜନୀତିକ ଆତ୍ମା ସିନେମା ହଲ୍ର ଅନ୍ଧାର ଘରରେ, ରୂପୋଲି ପର୍ଦ୍ଦାର ନାୟକ-ନାୟିକାଙ୍କ ମୁହଁରେ ଓ ଲୋକମାନଙ୍କ ଭାବନାରେ ଲୁଚି ରହିଛି। ଏଠାରେ ସିନେମା କେବଳ ମନୋରଞ୍ଜନ ନୁହେଁ, ସେହି ସିନେମା ହେଉଛି ଶକ୍ତି, ପ୍ରଭାବ ଓ ନେତୃତ୍ୱର ଏକ ବଡ଼ ମଞ୍ଚ। ତେଣୁ ଯେତେବେଳେ ଥଳପତି ବିଜୟ ରାଜନୀତିରେ ପ୍ରବେଶ କଲେ, ତାହାକୁ ତାମିଲ ସମାଜ କେବଳ ଜଣେ ଅଭିନେତାଙ୍କର ରାଜନୈତିକ ପଦକ୍ଷେପ ଭାବେ ଦେଖିଲା ନାହିଁ। ଲୋକମାନେ ଏହାକୁ ଏକ ନୂଆ ରାଜନୀତିକ ଅଧ୍ୟାୟର ଆରମ୍ଭ ଭାବେ ଦେଖୁଛନ୍ତି।
ବର୍ଷରୁ ବର୍ଷ ଧରି ଡିଏମକେ ଓ ଏଆଇଏଡିଏମକେ ତାମିଲନାଡୁର ରାଜନୀତିକୁ ନିୟନ୍ତ୍ରଣ କରିଆସିଛି। କରୁଣାନିଧି, ଏମଜିଆର ଓ ଜୟଲଳିତାଙ୍କ ପରି ବିଶାଳ ବ୍ୟକ୍ତିତ୍ୱ ଏହି ରାଜ୍ୟର ରାଜନୀତିକୁ ନାଟକୀୟ ଓ ଭାବପ୍ରବଣ କରିଥିଲେ। କିନ୍ତୁ ଏବେ ସେହି ରାଜନୀତିରେ ଏକ ନୂଆ କାହାଣୀ ଗଢ଼ାଯାଉଛି। ଏହି କାହାଣୀର ମୁଖ୍ୟ ଚରିତ୍ର ହେଉଛନ୍ତି ବିଜୟ ଓ ତାଙ୍କୁ ଘିରି ଆସୁଥିବା ଅନ୍ୟ ଏକ ଚର୍ଚ୍ଚିତ ନାମ — ତୃଷା କୃଷ୍ଣନ।
ବିଜୟଙ୍କ ରାଜନୀତିକ ଉଦୟ ହଠାତ୍ ଘଟିନଥିଲା। ତାଙ୍କ ସିନେମାରେ ସାଧାରଣ ଲୋକଙ୍କ ଯନ୍ତ୍ରଣା, ଦୁର୍ନୀତି ବିରୋଧୀ ସନ୍ଦେଶ ଓ ବ୍ୟବସ୍ଥା ସହିତ ନାୟକଙ୍କ ସଂଘର୍ଷ ପୁନଃପୁନି ଦେଖାଯାଇଛି। ପର୍ଦ୍ଦାରେ ସେ ଯେଉଁ ଛବି ତିଆରି କରିଥିଲେ, ଧୀରେଧୀରେ ସେହି ଛବି ଲୋକଙ୍କ ମନରେ ଏକ ରାଜନୀତିକ ବିକଳ୍ପ ଭାବେ ଗଢ଼ିଉଠିଲା। ଏହି ଘଟଣା ତାମିଲନାଡୁ ପାଇଁ ନୂଆ ନୁହେଁ। ଏହା ପୂର୍ବରୁ ମଧ୍ୟ ଏମଜିଆର ଓ ଜୟଲଳିତା ଏହି ପଥ ଦେଇ ସତ୍ତାକୁ ପହଞ୍ଚିଥିଲେ।
କିନ୍ତୁ ଏଥର କାହାଣୀରେ ଏକ ନୂଆ ମୋଡ଼ ଆସିଛି। ବିଜୟଙ୍କ ସହିତ ତୃଷାଙ୍କ ନାମ ଯୋଡ଼ାଯାଉଛି। ଏହି ସମ୍ପର୍କ ନେଇ ସୋସିଆଲ ମିଡିଆରେ ଅନେକ ଚର୍ଚ୍ଚା, ଅନୁମାନ ଓ କଳ୍ପନା ଚାଲିଛି। କେହି ତୃଷାଙ୍କୁ ବିଜୟଙ୍କ “ଲେଡି ଲକ୍” ବୋଲି କହୁଛନ୍ତି, ଆଉ କେହି ତାଙ୍କୁ “ନୂଆ ଜୟଲଳିତା” ଭାବେ ପ୍ରସ୍ତୁତ କରୁଛନ୍ତି। ଏହା ଶୁଣିବାକୁ ଅତିରଞ୍ଜିତ ଲାଗିପାରେ, କିନ୍ତୁ ତାମିଲନାଡୁର ଇତିହାସ କହେ ଯେ ଏଠାରେ ସଂଯୋଗ ବହୁଦିନ ପର୍ଯ୍ୟନ୍ତ କେବଳ ସଂଯୋଗ ରହିନଥାଏ। ସେଗୁଡ଼ିକ ଧୀରେଧୀରେ ରାଜନୀତିକ ପ୍ରତୀକରେ ପରିଣତ ହୋଇଯାଏ।
ନିର୍ବାଚନୀ ପରିଣାମ ଆସିଥିବା ଦିନଟି ତୃଷାଙ୍କ ଜନ୍ମଦିନ ଥିଲା। ତାହାର କିଛି ଦିନ ପୂର୍ବରୁ ସେ ତିରୁପତି ମନ୍ଦିର ଯାଇଥିଲେ। ପରେ ପରିଣାମ ଆସିବା ସହିତ ବିଜୟଙ୍କ ଘରକୁ ଯାଇ ଦୀର୍ଘ ସମୟ ଧରି ଆଲୋଚନା କରିଥିବା ଖବର ଆସିଲା। ଏହି ସମସ୍ତ ଘଟଣା ଅଲଗା ଅଲଗା ହୋଇପାରେ, କିନ୍ତୁ ରାଜନୀତି ସବୁବେଳେ ଘଟଣାଗୁଡ଼ିକୁ ଯୋଡ଼ି ଏକ ବଡ଼ କାହାଣୀ ତିଆରି କରେ। ସୋସିଆଲ ମିଡିଆ ମଧ୍ୟ ଏହି କାମ କରିଛି। ଏବେ ତୃଷା କେବଳ ଜଣେ ଅଭିନେତ୍ରୀ ନୁହେଁ, ସେ ଏକ ରାଜନୀତିକ ସଙ୍କେତରେ ପରିଣତ ହେଉଛନ୍ତି।
ଏହି ଚର୍ଚ୍ଚାକୁ ଆଉ ତେଜ କରିଦେଇଛି ୧୨ ବର୍ଷ ପୁରୁଣା ଏକ ଭିଡିଓ। ସେଥିରେ ତୃଷା କହୁଛନ୍ତି ଯେ ସେ ଦିନେକ ମୁଖ୍ୟମନ୍ତ୍ରୀ ହେବାକୁ ଚାହୁଁଛନ୍ତି। ସେତେବେଳେ ଏହାକୁ ସାଧାରଣ ମଜାକ କିମ୍ବା ଏକ ସ୍ୱପ୍ନ ଭାବେ ଦେଖାଯାଇଥିଲା। କିନ୍ତୁ ଆଜି ସେହି କଥାକୁ ଲୋକମାନେ ଅନ୍ୟ ଭାବେ ବୁଝୁଛନ୍ତି। ତାମିଲନାଡୁର ରାଜନୀତିରେ ଶବ୍ଦ ଓ ସଙ୍କେତର ଗୁରୁତ୍ୱ ଅଧିକ। ଏଠାରେ ପ୍ରତ୍ୟେକ ସଂଳାପ ଭବିଷ୍ୟତର ଇସାରା ଭାବେ ଦେଖାଯାଏ।
ଏଠାରୁ ଜୟଲଳିତାଙ୍କ ସ୍ମୃତି ପୁଣିଥରେ ଫେରିଆସେ। ଜୟଲଳିତା ମଧ୍ୟ ସାଧାରଣ ଅଭିନେତ୍ରୀ ଭାବେ ରାଜନୀତିରେ ଆସିନଥିଲେ। ତାଙ୍କ ମଧ୍ୟରେ ଆରମ୍ଭରୁ ନେତୃତ୍ୱର ଏକ ଛବି ଥିଲା। ତାଙ୍କ ସ୍କୁଲ ଜୀବନକୁ ମନେପକାଇଥିବା ଲୋକମାନେ କହନ୍ତି ଯେ ସେ ଅସାଧାରଣ ମେଧାବୀ ଥିଲେ ଓ ସାର୍ବଜନୀନ ଜୀବନ ପ୍ରତି ତାଙ୍କ ଆକର୍ଷଣ ଥିଲା। ପରେ ଏମଜିଆରଙ୍କ ସହିତ ତାଙ୍କ ଯୋଡ଼ି ଏକ ଭାବନାତ୍ମକ ଶକ୍ତିରେ ପରିଣତ ହେଲା। ସେହି ଯୋଡ଼ି ସିନେମାରୁ ଆରମ୍ଭ କରି ରାଜନୀତି ପର୍ଯ୍ୟନ୍ତ ଲୋକମାନଙ୍କ ମନକୁ ନିୟନ୍ତ୍ରଣ କଲା।
ଆଜି ସୋସିଆଲ ମିଡିଆରେ ଜୟଲଳିତା ଓ ତୃଷାଙ୍କୁ ଏକ ଫ୍ରେମରେ ରଖି ତୁଳନା କରାଯାଉଛି। ଦୁହେଁ ବ୍ରାହ୍ମଣ ପରିବାରର, ଦୁହେଁ ଚର୍ଚ୍ଚ ପାର୍କ ସ୍କୁଲରେ ପଢ଼ିଛନ୍ତି, ଦୁହେଁ ଅବିବାହିତ ଓ ତାମିଲ ସିନେମାର ଲୋକପ୍ରିୟ ମୁହଁ। ଜୟଲଳିତାଙ୍କ ନାମ ଏମଜିଆର ସହିତ ଯୋଡ଼ାଯାଇଥିଲା, ଆଜି ତୃଷାଙ୍କ ନାମ ବିଜୟଙ୍କ ସହିତ ଯୋଡ଼ାଯାଉଛି। କେହି କେହି ତୃଷାଙ୍କୁ “ମମି” ବୋଲି ଡାକୁଛନ୍ତି, ଯେପରି ଜୟଲଳିତାଙ୍କୁ “ଅମ୍ମା” ବୋଲି ଡାକାଯାଉଥିଲା।
ଏହି ତୁଳନା କେବଳ ବ୍ୟକ୍ତିଗତ ନୁହେଁ। ଏହା ତାମିଲ ସମାଜର ମନୋବୃତ୍ତିକୁ ପ୍ରକାଶ କରେ। ଲୋକମାନେ ନେତାଙ୍କ ମଧ୍ୟରେ କେବଳ ରାଜନୀତିଜ୍ଞଙ୍କୁ ନୁହେଁ, ଏକ ଭାବନାତ୍ମକ ଆଶ୍ରୟକୁ ଖୋଜନ୍ତି। ସେମାନେ ଏମିତି ଜଣେ ଚରିତ୍ର ଚାହାଁନ୍ତି ଯାହା ସିନେମାର ନାୟକ ଭଳି ଅନ୍ୟାୟ ବିରୋଧରେ ଲଢ଼ିବ ଓ ସମାଜକୁ ଏକ ନୂଆ ଆଶା ଦେବ।
ତାମିଲନାଡୁର ରାଜନୀତିରେ ସିନେମା ଓ ସତ୍ତାର ଏହି ସମ୍ପର୍କ ଦୀର୍ଘଦିନର। ଏମଜିଆର ହେଉନ୍ତୁ କିମ୍ବା କରୁଣାନିଧି, ଜୟଲଳିତା ହେଉନ୍ତୁ କିମ୍ବା ରଜନୀକାନ୍ତ — ପ୍ରତ୍ୟେକଙ୍କ ଚାରିପାଖରେ ଏକ ମିଥକ ତିଆରି ହୋଇଥିଲା। ଏହି ମିଥକ ହିଁ ସେମାନଙ୍କର ରାଜନୀତିକ ଶକ୍ତି ହୋଇଥିଲା। ଆଜି ବିଜୟଙ୍କୁ ଘିରି ମଧ୍ୟ ସେହି ପ୍ରକ୍ରିୟା ଚାଲିଛି। ତାଙ୍କର ବ୍ୟକ୍ତିଗତ ଜୀବନ, ସମ୍ପର୍କ ଓ ସାର୍ବଜନୀନ ଛବି ଧୀରେଧୀରେ ରାଜନୀତିକ ଆଲୋଚନାର ଅଂଶ ହୋଇଯାଉଛି।
ସତ୍ୟ ହେଲା ତାମିଲନାଡୁ ଏବେ ଏକ ପରିବର୍ତ୍ତନର ଦ୍ୱାରରେ ଦଣ୍ଡାୟମାନ। ପୁରୁଣା ନେତୃତ୍ୱର ଯୁଗ ଶେଷ ହେଉଛି ଓ ଲୋକମାନେ ନୂଆ ଚେହେରା ଖୋଜୁଛନ୍ତି। ଏହି ଖୋଜରେ ସିନେମା ଆଜିମଧ୍ୟ ସବୁଠାରୁ ବଡ଼ ମଞ୍ଚ। କାରଣ ତାମିଲ ସମାଜରେ ରାଜନୀତି ଏଯାବତ୍ ଭାବନାରେ ଚାଲେ। ଲୋକମାନେ କେବଳ ନୀତି କିମ୍ବା ଘୋଷଣାପତ୍ର ଦେଖନ୍ତି ନାହିଁ। ସେମାନେ ଏକ କାହାଣୀ ଖୋଜନ୍ତି, ଏକ ନାୟକ ଖୋଜନ୍ତି।
ପ୍ରଶ୍ନ ହେଉଛି, ତୃଷା ସତରେ ଆଗାମୀ ଜୟଲଳିତା ହୋଇପାରିବେ କି? ଏହାର ଉତ୍ତର ଏବେ କାହାର ପାଖରେ ନାହିଁ। ହୋଇପାରେ ଏସବୁ କେବଳ ସୋସିଆଲ ମିଡିଆର କଳ୍ପନା। ହୋଇପାରେ କିଛି ବର୍ଷ ପରେ ଏହା ଏକ ନୂଆ ରାଜନୀତିକ ସତ୍ୟ ହେବ। କିନ୍ତୁ ଏତେଟା ନିଶ୍ଚିତ ଯେ ତାମିଲନାଡୁର ରାଜନୀତି ପୁଣିଥରେ ଏକ ନୂଆ “ଅମ୍ମା”ର କଳ୍ପନା କରୁଛି।
ଇତିହାସ କହେ, ତାମିଲନାଡୁରେ କଳ୍ପନା ଓ ରାଜନୀତିର ଦୂରତା ବହୁତ କମ୍। ଏଠାରେ ଆଜିର ଗସିପ ଆସନ୍ତାକାଲିର ରାଜନୀତି ହୋଇଯାଏ। ଏଠାରେ ପର୍ଦ୍ଦାର ନାୟକ ମୁଖ୍ୟମନ୍ତ୍ରୀ ହୁଅନ୍ତି ଓ ଅଭିନେତ୍ରୀ “ଅମ୍ମା”ର ରୂପ ନିଅନ୍ତି। ତେଣୁ ତୃଷା ଓ ବିଜୟଙ୍କୁ ଘିରି ତିଆରି ହେଉଥିବା ଏହି କାହାଣୀକୁ ହେଳାରେ ନେବା ଠିକ୍ ହେବନାହିଁ।
କାରଣ ତାମିଲନାଡୁରେ ରାଜନୀତି କେବଳ ସତ୍ତାର ଲଢ଼େଇ ନୁହେଁ। ଏହା ହେଉଛି ଭାବନା, ପ୍ରତୀକ ଓ ସିନେମାର ଏକ ଅବିରତ ନାଟକ। ଏବଂ ସେହି ନାଟକର ପରବର୍ତ୍ତୀ ଅଧ୍ୟାୟ ଶାୟଦ ଏବେ ଲେଖାଯାଉଛି।
AlsoRead; https://purvapaksa.com/degree-does-not-define-qualification-odisha-high-court-verdict-in-osssc/
