ବିଶ୍ୱ ରାଜନୀତିର ରଙ୍ଗମଞ୍ଚରେ ଏବେ ଏକ ନାଟକୀୟ ମୋଡ଼ ଆସିଛି। ଯେଉଁ ଯୁଦ୍ଧର ନିଆଁରେ ସାରା ମଧ୍ୟପ୍ରାଚ୍ୟ ଜଳୁଥିଲା, ସେଥିରୁ ଏବେ ଆମେରିକା ନିଜକୁ ମୁକୁଳାଇବା ପାଇଁ ବ୍ୟଗ୍ର ହୋଇପଡ଼ିଛି। ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ ସାମ୍ପ୍ରତିକ ଘୋଷଣା— ଯେ ଆଉ ଦୁଇରୁ ତିନି ସପ୍ତାହ ମଧ୍ୟରେ ଯୁଦ୍ଧ ଶେଷ ହେବ— ତାହା ବିଶ୍ୱବାସୀଙ୍କୁ ଚକିତ କରିଛି। କିନ୍ତୁ ଏହି ଘୋଷଣା ପଛରେ କୌଣସି ଶାନ୍ତିର ବାର୍ତ୍ତା ନାହିଁ, ବରଂ ରହିଛି ଆମେରିକାର ଆଭ୍ୟନ୍ତରୀଣ ରାଜନୈତିକ ସଙ୍କଟ ଏବଂ ଟ୍ରମ୍ପଙ୍କ ନିଜସ୍ୱ ସ୍ୱାର୍ଥ।
ଟ୍ରମ୍ପଙ୍କ ବ୍ୟବସାୟିକ ବୁଦ୍ଧି ଓ ଘରୋଇ ସଙ୍କଟ
ଡୋନାଲ୍ଡ ଟ୍ରମ୍ପ ଜଣେ ଭାବୁକ ନେତା ନୁହନ୍ତି, ସେ ହେଉଛନ୍ତି ଜଣେ ‘ଟ୍ରାଞ୍ଜାକସନାଲ୍’ ବା ବ୍ୟବସାୟିକ ମନୋଭାବର ବ୍ୟକ୍ତି। ସେ ଯୁଦ୍ଧକୁ ମଧ୍ୟ ଏକ ଡିଲ୍ ଭାବେ ଦେଖନ୍ତି। ଆମେରିକାରେ ଟ୍ରମ୍ପଙ୍କ ଲୋକପ୍ରିୟତା କ୍ରମାଗତ ଭାବେ ହ୍ରାସ ପାଉଛି ଏବଂ ଆଗକୁ ନଭେମ୍ବରରେ ହେବାକୁ ଥିବା ମଧ୍ୟବର୍ତ୍ତୀକାଳୀନ ନିର୍ବାଚନ (Mid-term Poll) ତାଙ୍କ ପାଇଁ ଅଗ୍ନିପରୀକ୍ଷା। ଯଦି ସେ ଏଥିରେ ବିଫଳ ହୁଅନ୍ତି, ତେବେ ତାଙ୍କ ସରକାର ଏକ ‘ଲେମ୍ ଡକ୍’ (Lame Duck) ସରକାରରେ ପରିଣତ ହେବ। ଏହି ପରାଜୟର ଭୟ ହିଁ ତାଙ୍କୁ ଯୁଦ୍ଧକ୍ଷେତ୍ରରୁ ବାହାରିବା ପାଇଁ ବାଧ୍ୟ କରୁଛି।
ଜୟ ନା ପରାଜୟ: ଲକ୍ଷ୍ୟ ଓ ବାସ୍ତବତାର ହିସାବ
ଯଦି ଆମେ ସାମରିକ ଦୃଷ୍ଟିକୋଣରୁ ଦେଖିବା, ତେବେ ଟ୍ରମ୍ପଙ୍କ ରାଜନୈତିକ ଉଦ୍ଦେଶ୍ୟ’ (Political Aim) କେତେଦୂର ସଫଳ ହୋଇଛି, ତାହା ବିତର୍କର ବିଷୟ।
୧. ରିଜିମ୍ ଚେଞ୍ଜ:———-ଟ୍ରମ୍ପ ଇରାନର ଶାସନ ବଦଳାଇବାକୁ ଚାହୁଁଥିଲେ। ସେ ସେଠାକାର ସର୍ବୋଚ୍ଚ ନେତା ଅଲି ଖାମେନେଇ ଏବଂ ଆଇଆରଜିସିର ୪୯ ଜଣ ଶୀର୍ଷ ନେତାଙ୍କୁ ହତ୍ୟା କରିବାରେ ସଫଳ ହୋଇଛନ୍ତି ସତ, କିନ୍ତୁ ଇରାନର ଜନତା ଏବେ ବି ସଡ଼କକୁ ଓହ୍ଲାଇ ନାହାନ୍ତି।
୨. ପରମାଣୁ କାର୍ଯ୍ୟକ୍ରମ:———-ଇରାନର ନ୍ୟୁକ୍ଲିୟର ଫ୍ୟାସିଲିଟିକୁ ଧ୍ୱଂସ କରିବାର ଦାବି କରାଯାଉଥିଲେ ମଧ୍ୟ, ଇରାନ ପାଖରେ ଏବେ ବି ପର୍ଯ୍ୟାପ୍ତ ପରିମାଣର ଏନରିଚ୍ ୟୁରେନିୟମ ରହିଛି, ଯାହା ଭବିଷ୍ୟତ ପାଇଁ ବିପଦ।
୩. ଷ୍ଟ୍ରେଟ୍ ଅଫ୍ ହର୍ମୁଜ୍:———-ଏହି ଗୁରୁତ୍ୱପୂର୍ଣ୍ଣ ଜଳପଥରେ ଇରାନର କବ୍ଜା ଆହୁରି ମଜବୁତ ହୋଇଛି। ଇରାନ ଏବେ ପ୍ରତିଟି ଜାହାଜ ଉପରେ ଟିକସ ଲଗାଇବାକୁ ଯୋଜନା କରୁଛି, ଯାହା ଆନ୍ତର୍ଜାତୀୟ ବାଣିଜ୍ୟ ପାଇଁ ଏକ ଶକ୍ତ ଧକ୍କା।
ଲାଭରେ କିଏ: ଆମେରିକା ନା ବିଶ୍ୱ?
ବଡ଼ ଆଶ୍ଚର୍ଯ୍ୟର କଥା ହେଉଛି, ଯୁଦ୍ଧ ସମୟରେ ହିଁ ଆମେରିକା ନିଜର ଅର୍ଥନୀତିକୁ ସଜାଡ଼ି ନେଇଛି। ଡଲାରର ମୂଲ୍ୟ ବଢ଼ିବା ସହ ଆମେରିକା ନିଜର ତେଲକୁ ଚଢ଼ା ଦାମରେ ବିକ୍ରି କରିଛି। ଏହା ବ୍ୟତୀତ, ୟୁରୋପ ଓ ଖାଡ଼ି ଦେଶମାନଙ୍କ ମନରେ ଭୟ ସୃଷ୍ଟି କରି ଆମେରିକା ନିଜର ଅସ୍ତ୍ରଶସ୍ତ୍ର ବଜାରକୁ ଆହୁରି ସମ୍ପ୍ରସାରିତ କରିଛି। ଚୀନର ହତିଆର ଗୁଡ଼ିକ ଯୁଦ୍ଧକ୍ଷେତ୍ରରେ ବିଫଳ ହେବା ପରେ, ବିଶ୍ୱ ଏବେ ପୁଣି ଥରେ ଆମେରିକୀୟ ପ୍ରଯୁକ୍ତି ବିଦ୍ୟା ଉପରେ ନିର୍ଭର କରିବାକୁ ବାଧ୍ୟ।
ଭାରତ ପାଇଁ ଏହା ଏକ ନୂଆ ଦିଗନ୍ତ
ଏହି ଯୁଦ୍ଧରେ ଭାରତର ଭୂମିକା ଏବଂ ପ୍ରତିରକ୍ଷା ଉପକରଣର ଗୁଣବତ୍ତା ସାରା ବିଶ୍ୱ ଦେଖିଛି। ଆମେରିକା ଓ ରୁଷ ପରେ ଭାରତର ଅସ୍ତ୍ରଶସ୍ତ୍ର ଏବେ ‘ୱାର୍ ଟେଷ୍ଟେଡ୍’ (War Tested) ଭାବେ ପରିଚିତ। ଏହା ଭାରତର ପ୍ରତିରକ୍ଷା ରପ୍ତାନି ପାଇଁ ଏକ ସୁବର୍ଣ୍ଣ ସୁଯୋଗ ସୃଷ୍ଟି କରିଛି।
ଇତିହାସର ଏକ କଳା ଅଧ୍ୟାୟ
ପରିଶେଷରେ, ଏହି ଯୁଦ୍ଧ କାହାରିକୁ ସୁଖ ଦେଇନାହିଁ। ଇରାନ ଏବେ ଏକ ‘ଭୁତ ଦେଶ’ (Ghost Nation)ରେ ପରିଣତ ହୋଇଛି। ଟ୍ରମ୍ପ ଯଦିଓ ଏବେ ଯୁଦ୍ଧରୁ ବାହାରିବାକୁ ଚାହୁଁଛନ୍ତି, କିନ୍ତୁ ସେ ବିଶ୍ୱ ସମୁଦାୟରେ ଏକାକୀ ହୋଇପଡ଼ିଛନ୍ତି। ନାଟୋ (NATO) ଦେଶମାନେ ଆଉ ଟ୍ରମ୍ପଙ୍କ ମୁରୁବିପଣିଆକୁ ଗ୍ରହଣ କରୁନାହାନ୍ତି। ଏହି ଯୁଦ୍ଧ ହୁଏତ ଶେଷ ହୋଇପାରେ, କିନ୍ତୁ ଏହା ଯେଉଁ ରାଜନୈତିକ ଓ ଅର୍ଥନୈତିକ କ୍ଷତ ଛାଡ଼ି ଯାଉଛି, ତାହାର ଭରପାଇ କରିବାକୁ ଦଶନ୍ଧି ଦଶନ୍ଧି ସମୟ ଲାଗିବ।
ଟ୍ରମ୍ପଙ୍କ ପାଇଁ ଏହା ‘ହାରି ଯାଇ ଜିତିବାର’ ଏକ ଖେଳ ହୋଇପାରେ, କିନ୍ତୁ ବିଶ୍ୱ ଶାନ୍ତି ପାଇଁ ଏହା ଏକ ବଡ଼ ପ୍ରଶ୍ନବାଚୀ।
