ଓଡିଶା ରାଜ୍ୟସଭା ନିର୍ବାଚନ ସମୟରେ କ୍ରସ୍ ଭୋଟିଂ କରିଥିବା କଂଗ୍ରେସ ବିଧାୟକ ସୋଫିଆ ଫିରଦୌସ ବର୍ତ୍ତମାନ ଖବର ଶୀର୍ଷକରେ ଅଛନ୍ତି । କଂଗ୍ରେସ ଦଳ ତାଙ୍କୁ ଦଳୀୟ ପଦରୁ ବହିଷ୍କାର କରିଛି । କଟକର ପୂର୍ବତନ ବିଧାୟକ ଏବଂ ବରିଷ୍ଠ କଂଗ୍ରେସ ନେତା ମହମ୍ମଦ ମୋକିମଙ୍କ ଝିଅ ସୋଫିଆ | ୨୦୨୪ ବିଧାନସଭା ନିର୍ବାଚନରେ ବିଜେପି ପ୍ରାର୍ଥୀ ପୂର୍ଣ୍ଣଚନ୍ଦ୍ର ମହାପାତ୍ରଙ୍କୁ ପରାସ୍ତ କରି ବିଜୟ ହାସଲ କରିଥିଲେ ସେ । ଏପରି କରି, ଓଡିଶା ଇତିହାସରେ ପ୍ରଥମ ମହିଳା ମୁସଲିମ ବିଧାୟକ ହୋଇଥିଲେ । ବିଧାୟକ ଭାବରେ ନିର୍ବାଚିତ ହେବା ପରେ ସୋଫିଆଙ୍କୁ ମିଳିଥିଲା ଅନେକ ଶୁଭେଚ୍ଛା ଓ ସମ୍ମାନ | ଏବେ ପୁଣି ଥରେ, ସୋଫିଆ ଆସିଛନ୍ତି ଲାଇମ୍-ଲାଇଟ୍ କୁ | ଲୋକମାନେ ତାଙ୍କ ବିଷୟରେ ଅଧିକ ଜାଣିବା ପାଇଁ ସୋସିଆଲ ମିଡିଆରେ ସନ୍ଧାନ କରୁଛନ୍ତି । ତେବେ ଏହି ପରିପ୍ରେକ୍ଷୀରେ , ସୋଫିଆ ଫିରଦୌସଙ୍କ ବିଷୟରେ କିଛି କମ୍ ଜଣାଶୁଣା ତଥ୍ୟ ଆମେ ଏଠାରେ ଦେବାକୁ ଚେଷ୍ଟା କରିଛୁ | ଆସନ୍ତୁ ଜାଣିବା ସେ ସବୁ..
ପିତା ଦୁର୍ନୀତିରେ ଦୋଷୀ ସାବ୍ୟସ୍ତ ହେବା ପରେ ପାଇଲେ ଟିକେଟ୍
ସୋଫିଆ ଫିରଦୌସ୍ କଟକର ପୂର୍ବତନ ବିଧାୟକ ତଥା କଂଗ୍ରେସ ଦଳର ଜଣେ ବରିଷ୍ଠ ନେତା ମହମ୍ମଦ ମୋକିମ୍ ଙ୍କ ଝିଅ । ନିର୍ବାଚନ ପୂର୍ବରୁ ତାଙ୍କ ପିତା ଦୁର୍ନୀତି ମାମଲାରେ ଦୋଷୀ ସାବ୍ୟସ୍ତ ହୋଇଥିଲେ । ଫଳସ୍ୱରୂପ, ମୋକିମ୍ ନିଜେ ନିର୍ବାଚନ ଲଢ଼ିବା ପାଇଁ ଅଯୋଗ୍ୟ ଥିଲେ। ଏହି ପରିସ୍ଥିତିରେ, କଂଗ୍ରେସ ଦଳ ତାଙ୍କ ଝିଅ ସୋଫିଆ ଫିରଦୌସ୍ ଙ୍କୁ ନିର୍ବାଚନ ଟିକେଟ୍ ପ୍ରଦାନ କରିଥିଲା। ସୋଫିଆ ଏହା ପୂର୍ବରୁ ରାଜନୀତିରେ ସକ୍ରିୟ ଥିଲେ | ସେ ୨୦୧୪ ଏବଂ ୨୦୧୯ ବିଧାନସଭା ନିର୍ବାଚନ ସମୟରେ ତାଙ୍କ ପିତାଙ୍କ ପାଇଁ ଦଳୀୟ କାର୍ଯ୍ୟକର୍ତ୍ତା ଭାବରେ କାର୍ଯ୍ୟ କରିଥିଲେ । ୨୦୨୪ ବିଧାନସଭା ନିର୍ବାଚନରେ, ସେ ବିଜେପି ପ୍ରାର୍ଥୀ ପୂର୍ଣ୍ଣଚନ୍ଦ୍ର ମହାପାତ୍ରଙ୍କୁ ପରାସ୍ତ କରି ବିଜୟ ହାସଲ କରିଥିଲେ।
ସୋଫିଆ ଓଡ଼ିଶାର ପ୍ରଥମ ମହିଳା ମୁସଲିମ୍ ବିଧାୟକ
ସୋଫିଆ ତାଙ୍କ ପିତାଙ୍କ ବିଧାନସଭା ନିର୍ବାଚନମଣ୍ଡଳୀ, ବାରବାଟୀ-କଟକରୁ ନିର୍ବାଚନ ଲଢ଼ିଥିଲେ । ଏହି ନିର୍ବାଚନରେ ବିଜୟୀ ହୋଇ, ସେ ଓଡ଼ିଶା ରାଜ୍ୟର ପ୍ରଥମ ମହିଳା ମୁସଲିମ୍ ବିଧାୟକ ଭାବରେ ଇତିହାସ ସୃଷ୍ଟି କରିଥିଲେ । ୧୯୩୭ ମସିହାରୁ, ଓଡ଼ିଶାରେ ମୋଟ ୧୪୧ ଜଣ ମହିଳା ବିଧାୟକ ଭାବରେ କାର୍ଯ୍ୟ କରିଛନ୍ତି | କିନ୍ତୁ, ସୋଫିଆ ପୂର୍ବରୁ ଓଡିଶା ଇତିହାସରେ କେହିବି ଜଣେ ମୁସଲିମ ମହିଳା ନଥିଲେ । ଏହା ପ୍ରଥମ ଉଦାହରଣ ଯେଉଁଠାରେ ଜଣେ ମୁସଲିମ ମହିଳା ଓଡ଼ିଶା ବିଧାନସଭାରେ ଲଢ଼ି ବିଜୟୀ ହୋଇଛନ୍ତି । ସେ ବିଜେପି ପ୍ରାର୍ଥୀ ଡକ୍ଟର ପୂର୍ଣ୍ଣ ଚନ୍ଦ୍ର ମହାପାତ୍ରଙ୍କୁ ୮,୦୦୧ ଭୋଟ ବ୍ୟବଧାନରେ ପରାସ୍ତ କରିଥିଲେ |
ସୋଫିଆଙ୍କ ସମ୍ପତ୍ତି
୨୩ ଅଗଷ୍ଟ, ୧୯୯୧ରେ ଜନ୍ମଗ୍ରହଣ କରିଥିବା ସୋଫିଆ ଫିରଦୌସ ଭୁବନେଶ୍ୱରର KIIT ବିଶ୍ୱବିଦ୍ୟାଳୟରୁ ସିଭିଲ ଇଞ୍ଜିନିୟରିଂରେ ବି.ଟେକ୍ ଡିଗ୍ରୀ ହାସଲ କରିଛନ୍ତି । ରାଜନୀତିରେ ପ୍ରବେଶ କରିବା ପୂର୍ବରୁ, ସେ ରିଅଲ୍ ଇଷ୍ଟେଟ୍ କ୍ଷେତ୍ରରେ କାର୍ଯ୍ୟରତ ଥିଲେ । ସୋଫିଆ ଏକ ରିଅଲ୍ ଇଷ୍ଟେଟ୍ କମ୍ପାନୀର ନିର୍ଦ୍ଦେଶକ ଏବଂ କନଫେଡେରେସନ ଅଫ୍ ରିଅଲ୍ ଇଷ୍ଟେଟ୍ ଡେଭଲପର୍ସ ଆସୋସିଏସନ୍ସ ଅଫ୍ ଇଣ୍ଡିଆ (CREDAI)ର ଭୁବନେଶ୍ୱର ଚାପ୍ଟରର ସଭାପତି ଭାବରେ କାର୍ଯ୍ୟ କରିଥିଲେ । ଏହା ସହ “ମେଟ୍ରୋ ଗ୍ରୁପ୍” ନାମରେ ଜଣାଶୁଣା ଭାରତୀୟ ରିଅଲ୍ ଇଷ୍ଟେଟ କମ୍ପାନୀର ସେ ସହ-ସମ୍ପାଦକ । ସୋଫିଆଙ୍କ ପାଖରେ ₹୩.୬୪ କୋଟି ମୂଲ୍ୟର ବ୍ୟକ୍ତିଗତ ସମ୍ପତ୍ତି ଅଛି। ତାଙ୍କ ସ୍ୱାମୀ ଶେଖ୍ ମେରାଜୁଲ୍ ମଧ୍ୟ ଜଣେ ବ୍ୟବସାୟୀ ।
ରାଜ୍ୟସଭାରେ କ୍ରସ୍ ଭୋଟିଂ ପାଇଁ କଂଗ୍ରେସର ବହିଷ୍କାର
ରାଜ୍ୟସଭା ନିର୍ବାଚନ ସମୟରେ କ୍ରସ୍ ଭୋଟିଂ ପାଇଁ କଂଗ୍ରେସ ଦଳ ଏବେ ସୋଫିଆ ଫିରଦୌସଙ୍କୁ ବହିଷ୍କାର କରିଛି। ରାଜ୍ୟସଭା ନିର୍ବାଚନରେ କ୍ରସ୍ ଭୋଟିଂ ଘଟଣା ପରେ ଦଳର ଶୃଙ୍ଖଳାଗତ ନିୟମାବଳୀକୁ ଆଖିରେ ରଖି କାର୍ଯ୍ୟାନୁଷ୍ଠାନ ନିଆଯାଇଛି । ସୋଫିଆ ସହିତ, କଂଗ୍ରେସ ଦଳ ସାନଖେମୁଣ୍ଡିର ବିଧାୟକ ରମେଶ ଜେନା ଏବଂ ମୋହନାର ବିଧାୟକ ଦଶରଥ ଗମାଙ୍ଗୋଙ୍କୁ ମଧ୍ୟ ଦଳୀୟ ହ୍ୱିପ୍ ଉଲ୍ଲଂଘନ କରିବା ପାଇଁ ବହିଷ୍କାର କରିଛି ଦଳ । ସୋଫିଆ ଫିରଦୌସ ବାରବାଟୀ-କଟକ ନିର୍ବାଚନମଣ୍ଡଳୀର ପ୍ରତିନିଧିତ୍ୱ କରୁଥିବା ବିଧାନସଭା ସଦସ୍ୟ (MLA) । କଂଗ୍ରେସ ଦଳ ଏହି ତିନି ବିଧାୟକଙ୍କ ସଦସ୍ୟତା ରଦ୍ଦ କରିବାକୁ ବିଧାନସଭା ବାଚସ୍ପତିଙ୍କୁ ମଧ୍ୟ ଚିଠି ଲେଖିଛି । ଦଳ ସେମାନଙ୍କୁ ଅଯୋଗ୍ୟ ଘୋଷଣା କରିବାକୁ ଦାବି କରିଛି ।
also read : https://purvapaksa.com/surgical-political-strike-between-naveen-and-bijay-for-over-20-years-become-solve/
https://purvapaksa.com/surgical-political-strike-between-naveen-and-bijay-for-over-20-years-become-solve/
