- ଭାରତୀୟ ଛାତ୍ର ଛାତ୍ରୀଙ୍କ ସଂଖ୍ୟାରେ ହ୍ରାସ ମୁଖ୍ୟ କାରଣ
- ୨୦% ହ୍ରାସ ପାଇଛି ଭାରତୀୟଙ୍କ ସଂଖ୍ୟା
ବ୍ରିଟେନ ବିଶ୍ୱବିଦ୍ୟାଳୟଗୁଡ଼ିକରେ ଘୋର ଆର୍ଥିକ ସଙ୍କଟ ଦେଖାଦେଇଛି। ଭାରତୀୟ ଛାତ୍ରଛାତ୍ରୀମାନେ ବ୍ରିଟେନର ବିଶ୍ୱବିଦ୍ୟାଳୟଗୁଡ଼ିକରେ ଆବେଦନ କରିବାକୁ ଆଉ ପସନ୍ଦ କରୁନାହାନ୍ତି। ଶିକ୍ଷାନୁଷ୍ଠାନଗୁଡ଼ିକ ପୂର୍ବରୁ କ୍ଷତିରେ ଚାଲୁଥିବାବେଳେ ଭାରତୀୟ ଛାତ୍ରଛାତ୍ରୀଙ୍କ ପରିବର୍ତ୍ତିତ ମାନସିକତା ସେମାନଙ୍କ ଆର୍ଥିକ ସଙ୍କଟକୁ ଆହୁରି ବଢ଼ାଇ ଦେଇଛି।
ବ୍ରିଟେନ୍ ଗୃହ କାର୍ଯ୍ୟାଳୟ ତଥ୍ୟ ଅନୁଯାୟୀ ୨୦୨୨-୨୩ରୁ ୨୦୨୩-୨୪ ମଧ୍ୟରେ ହୋଇଥିବା ଆଡମିସନରେ ଢେର ଅବନତି ହୋଇଛି। ଅଧ୍ୟୟନ ପାଇଁ ସ୍ୱୀକୃତି (ସିଏଏସ୍) ସମ୍ପର୍କିତ ରିପୋର୍ଟ ବା ଅଫିସ୍ ଫର୍ ଷ୍ଟୁଡେଣ୍ଟସ୍ (ଓଏଫ୍ଏସ୍) ବିଶ୍ଳେଷଣରୁ ଜଣାପଡିଛି ଯେ ଭାରତୀୟ ଛାତ୍ରଛାତ୍ରୀଙ୍କ ସଂଖ୍ୟା ୧,୩୯,୯୧୪ରୁ ୧,୧୧,୩୨୯କୁ ହ୍ରାସ ପାଇଛି। ନିକଟରେ କେତେକ ସହରରେ ଇମିଗ୍ରେସନ ବିରୋଧୀ ଦଙ୍ଗା, ସୀମିତ ଚାକିରି ସୁଯୋଗ ଏବଂ ନିରାପତ୍ତା ଭୟ ଭାରତୀୟ ଛାତ୍ରଛାତ୍ରୀଙ୍କୁ ବ୍ରିଟେନରେ ଯାଇ ପାଠ ବଢିବାରୁ ବିମୁଖ କରିଛି। ଫଳରେ ଭାରତୀୟ ଛାତ୍ରଛାତ୍ରୀଙ୍କ ସଂଖ୍ୟା ହ୍ରାସ ପାଉଛି ବୋଲି ବ୍ରିଟେନରେ ଥିବା ଭାରତୀୟ ଛାତ୍ର ଗୋଷ୍ଠୀ କହିଛନ୍ତି।
ସରକାରଙ୍କ ଶିକ୍ଷା ବିଭାଗର ଏକ ଅଣବିଭାଗୀୟ ସାର୍ବଜନୀନ ସଂସ୍ଥା ଓଏଫ୍ଏସର ରିପୋର୍ଟରେ ଦର୍ଶାଯାଇଛି ଯେ ଅନ୍ତର୍ଜାତୀୟ ଛାତ୍ରମାନଙ୍କୁ ପ୍ରଦାନ କରାଯାଇଥିବା ମୋଟ ପ୍ରାୟୋଜକ ସ୍ୱୀକୃତି ସଂଖ୍ୟାରେ ୧୧.୮ ପ୍ରତିଶତ ହ୍ରାସ ଘଟିଛି ଏବଂ ବିଭିନ୍ନ ଜାତୀୟତା ଥିବା ଛାତ୍ରଛାତ୍ରୀଙ୍କ ପାଇଁ ଯଥେଷ୍ଟ ଭିନ୍ନତା ରହିଛି, ଭାରତୀୟ ଏବଂ ନାଇଜେରିଆ ଛାତ୍ରଛାତ୍ରୀଙ୍କୁ ଜାରି କରାଯାଇଥିବା ସିଏଏସ୍ ସଂଖ୍ୟାରେ ସର୍ବାଧିକ ୨୮,୫୮୫ (୨୦.୪%) ଏବଂ ୨୫,୮୯୭ (୪୪.୬%) ହ୍ରାସ ପାଇଛି।
ଭାରତ, ନାଇଜେରିଆ ଏବଂ ବାଂଲାଦେଶ ଭଳି ଦେଶର ଛାତ୍ରଛାତ୍ରୀଙ୍କ ଉପରେ ଅଧିକ ନିର୍ଭର କରୁଥିବା ବିଶ୍ୱବିଦ୍ୟାଳୟଗୁଡ଼ିକ ଏହି ହ୍ରାସ ଧାରା ଯୋଗୁଁ ଯଥେଷ୍ଟ ପ୍ରଭାବିତ ହେବେ। ଭାରତୀୟ ଜାତୀୟ ଛାତ୍ର ସଂଘ (ଆଇଏନଏସଏ) ୟୁକେ କହିଛି ଯେ ବିଦେଶୀ ଛାତ୍ରମାନଙ୍କୁ ସରକାର ସେମାନଙ୍କ ଉପରେ ନିର୍ଭରଶୀଳ ପରିବାର ଏବଂ ଜୀବନସାଥୀଙ୍କୁ ସାଙ୍ଗରେ ଆଣିବା ପାଇଁ ଜାରି କରିଥିବା କଟକଣା ମଧ୍ୟ ଭାରତୀୟ ଛାତ୍ରଛାତ୍ରୀଙ୍କ ସଂଖ୍ୟାରେ ଉଲ୍ଲେଖନୀୟ ହ୍ରାସ ଘଟାଉଥିବା ଅନ୍ୟ ଏକ କାରଣ।
ଇନସା ୟୁକେ ସଭାପତି ଅମିତ ତିୱାରୀ କହିଛନ୍ତି ଯେ ନୂଆ ନୀତି ଅନୁଯାୟୀ ଏବଂ ଏଠାକାର ଅର୍ଥନୈତିକ ସ୍ଥିତି ଏବଂ ସାମ୍ପ୍ରତିକ ଦଙ୍ଗା ଇତିହାସକୁ ଦୃଷ୍ଟିରେ ରଖି ଭାରତୀୟ ଛାତ୍ରଛାତ୍ରୀମାନେ ସେମାନଙ୍କ ସାଥୀ ଓ ପରିବାରଙ୍କୁ ବ୍ରିଟେନକୁ ଆଣିବାକୁ ଭୟ କରୁଛନ୍ତି। ଯେପର୍ଯ୍ୟନ୍ତ ସରକାର ଏହି ସମସ୍ୟାର ସମାଧାନ ନକରନ୍ତି ବ୍ରିଟେନର ବିଶ୍ୱବିଦ୍ୟାଳୟଗୁଡିକ କ୍ଷତି ସହିବ। କାରଣ ସେମାନେ ଭାରତୀୟ ଛାତ୍ରଛାତ୍ରୀଙ୍କ ଉପରେ ଅଧିକ ନିର୍ଭର କରନ୍ତି ।
ନ୍ୟାସନାଲ ଇଣ୍ଡିଆନ ଷ୍ଟୁଡେଣ୍ଟସ୍ ଆଣ୍ଡ ଆଲୁମିନି ୟୁନିୟନ (ନିସାଉ) ୟୁକେର ଅଧ୍ୟକ୍ଷ ସନମ ଅରୋରା କହିଛନ୍ତି, “ନିର୍ଭରଶୀଳଙ୍କ ଉପରେ କନଜର୍ଭେଟିଭ୍ ନିଷେଧାଦେଶ, ଅଧ୍ୟୟନ ପରବର୍ତ୍ତୀ ୱାର୍କ ଭିସାକୁ ନେଇ ଦ୍ୱନ୍ଦ୍ୱ, ଦକ୍ଷ କର୍ମଚାରୀଙ୍କ ଦରମାକୁ ସୀମିତ ରଖିବା ଏବଂ ବ୍ରିଟେନରେ ଚାକିରିର ଅଭାବ ଭଳି ଅନେକ କାରଣ ଭାରତୀୟ ଛାତ୍ର ଛାତ୍ରୀଙ୍କ ସଂଖ୍ୟା ହ୍ରାସ କରୁଛି।
previous article: https://purvapaksa.com/mahindra-new-ev/
