NEET ପ୍ରଶ୍ନପତ୍ର ଲିକ୍ ମାମଲା ଏବଂ ଶିକ୍ଷା ମନ୍ତ୍ରଣାଳୟ ବିରୋଧରେ ରାଜଧାନୀ ଦିଲ୍ଲୀରେ ଚାଲିଥିବା ବିକ୍ଷୋଭ ପ୍ରଦର୍ଶନ ଅଧିକ ଆକ୍ରାମକ ରୂପ ନେବାରେ ଲାଗିଛି। ମଙ୍ଗଳବାର ଦିଲ୍ଲୀ ପୁଲିସର ବଳପ୍ରଯୋଗ, ଟାଣଓଟରା, କେତେକ ପ୍ରମୁଖ ନେତାଙ୍କୁ ଅଟକ ରଖିବା ଏବଂ ରାତିସାରା ହୋଇଥିବା ପ୍ରବଳ ବର୍ଷା ସତ୍ତ୍ୱେ ଆନ୍ଦୋଳନକାରୀଙ୍କ ଉତ୍ସାହ କମିନାହିଁ। ସିଟିଜେନ୍ସ ଫର୍ ଜଷ୍ଟିସ୍ ଏବଂ ବିଭିନ୍ନ ଛାତ୍ର ସଂଗଠନର କାର୍ଯ୍ୟକର୍ତ୍ତାମାନେ ପୁଣିଥରେ ଜନ୍ତର ମନ୍ତରଠାରେ ଏକାଠି ହୋଇ ନିଜର ଦାବିରେ ଅଡ଼ଗ ରହିଛନ୍ତି। ପ୍ରତିକୂଳ ପରିସ୍ଥିତି ଓ ବର୍ଷା ସତ୍ତ୍ୱେ ରାତିସାରା ଏବଂ ବୁଧବାର ସକାଳୁ ପୁଣି ଜନ୍ତର ମନ୍ତରରେ ହଜାର ହଜାର ଛାତ୍ରଛାତ୍ରୀ ଓ ସମର୍ଥକଙ୍କ ଭିଡ଼ ଜମିବାରେ ଲାଗିଛି।
)
ମିଳିଥିବା ସୂଚନା ଅନୁଯାୟୀ, ଗତକାଲି ପ୍ରଧାନମନ୍ତ୍ରୀ ଆବାସ ନିକଟରେ ଏବଂ ଜନ୍ତର ମନ୍ତରଠାରେ ବିରୋଧୀ ନେତା ତଥା ଛାତ୍ରମାନଙ୍କ ଉପରେ ପୁଲିସ କାର୍ଯ୍ୟାନୁଷ୍ଠାନ ଗ୍ରହଣ କରିବା ପରେ କିଛି ସମୟ ପାଇଁ ପରିସ୍ଥିତି ଉତ୍ତେଜନାପୂର୍ଣ୍ଣ ହୋଇପଡ଼ିଥିଲା। ପୁଲିସ ଅନେକ ଆନ୍ଦୋଳନକାରୀଙ୍କୁ ସ୍ଥାନାନ୍ତର କରିବା ସହ ଧାରଣାସ୍ଥଳକୁ ଖାଲି କରିବାକୁ ଚେଷ୍ଟା କରିଥିଲା। କିନ୍ତୁ ବିଳମ୍ବିତ ରାତିରେ ଦିଲ୍ଲୀ ଓ ଏହାର ପାର୍ଶ୍ୱବର୍ତ୍ତୀ ଅଞ୍ଛଳରେ ପ୍ରବଳ ବର୍ଷା ହୋଇଥିଲେ ମଧ୍ୟ ସାହସ ନହରାଇ ଛାତ୍ରଛାତ୍ରୀମାନେ ପ୍ଲାଷ୍ଟିକ୍, ଛତା ଏବଂ ବାନାର ଧରି ରାସ୍ତାରେ ହିଁ ବସି ରହିଥିଲେ। ରାତି ପାହିବା ସହ ଦିଲ୍ଲୀ-ଏନସିଆର, ଉତ୍ତର ପ୍ରଦେଶ, ହରିୟାଣା ଏବଂ ପଞ୍ଜାବରୁ ଶହ ଶହ ସଂଖ୍ୟାରେ ନୂଆ ଛାତ୍ରଛାତ୍ରୀ ଏବଂ ଯୁବକମାନେ ଆସି ଜନ୍ତର ମନ୍ତରରେ ପହଞ୍ଚିଛନ୍ତି।
ଧାରଣାସ୍ଥଳରେ ଉପସ୍ଥିତ ଛାତ୍ର ନେତା ଏବଂ CJP ପ୍ରତିନିଧିମାନେ ସରକାର ଓ ଦିଲ୍ଲୀ ପୁଲିସ ବିରୋଧରେ ନାରାବାଜି କରିବା ସହ କହିଛନ୍ତି, “ପୁଲିସର ଲାଠି, ବଳପ୍ରଯୋଗ କିମ୍ବା ବର୍ଷା-ଝଡ଼ ଆମ ସ୍ୱରକୁ ଚାପିଦେଇ ପାରିବ ନାହିଁ। ଲକ୍ଷ ଲକ୍ଷ ମେଧାବୀ ଛାତ୍ରଛାତ୍ରୀଙ୍କ ଭବିଷ୍ୟତ ସହ ଖେଳାଯାଇଛି। ନୀଟ୍ ପରୀକ୍ଷାରେ ହୋଇଥିବା ଦୁର୍ନୀତିର ସ୍ୱଚ୍ଛ ତଦନ୍ତ ନହେବା, ଦୋଷୀଙ୍କ ବିରୋଧରେ କଠୋର କାର୍ଯ୍ୟାନୁଷ୍ଠାନ ନନିଆଯିବା ଏବଂ କେନ୍ଦ୍ର ଶିକ୍ଷାମନ୍ତ୍ରୀ ଇସ୍ତଫା ନଦେବା ପର୍ଯ୍ୟନ୍ତ ଆମର ଏହି ଶାନ୍ତିପୂର୍ଣ୍ଣ ସତ୍ୟାଗ୍ରହ ଜାରି ରହିବ।”
ଆନ୍ଦୋଳନସ୍ଥଳରେ ପୁଣିଥରେ ଭିଡ଼ ବୃଦ୍ଧି ପାଉଥିବାରୁ ଦିଲ୍ଲୀ ପୁଲିସ ଓ କେନ୍ଦ୍ରୀୟ ସୁରକ୍ଷା ବଳ ପକ୍ଷରୁ ସୁରକ୍ଷା ବ୍ୟବସ୍ଥାକୁ ଅତ୍ୟନ୍ତ କଡ଼ାକଡ଼ି କରାଯାଇଛି। ଜନ୍ତର ମନ୍ତର ଆଖପାଖ ଅଞ୍ଛଳରେ ବ୍ୟାରିକେଡ୍ ଲଗାଯାଇ ଗାଡ଼ିମୋଟର ଚଳାଚଳକୁ ନିୟନ୍ତ୍ରିତ କରାଯାଉଛି। କୌଣସି ଅପ୍ରୀତିକର ପରିସ୍ଥିତିକୁ ଏଡ଼ାଇବା ପାଇଁ ଅତିରିକ୍ତ ପୁଲିସ ବଳ ମୁତୟନ କରାଯାଇଛି। ସେହିପରି ପ୍ରଦର୍ଶନକାରୀଙ୍କୁ ଆଗକୁ ବଢ଼ିବାକୁ ନଦେବା ପାଇଁ ପାଣି ମାଡ଼ କରିବା ପାଇଁ ଗାଡ଼ି ଗୁଡ଼ିକୁ ମଧ୍ୟ ପ୍ରସ୍ତୁତ ରଖାଯାଇଛି।
ଅପରପକ୍ଷରେ, ଜନ୍ତର ମନ୍ତରରେ ଛାତ୍ରମାନଙ୍କର ଏହି ନିରବଚ୍ଛିନ୍ନ ସଂଗ୍ରାମକୁ ବିରୋଧୀ ଦଳଗୁଡ଼ିକ ପକ୍ଷରୁ ସମ୍ପୂର୍ଣ୍ଣ ସମର୍ଥନ ମିଳୁଛି। ସଂସଦର ଅଧିବେଶନ ଭିତରେ ମଧ୍ୟ ଏହି ପ୍ରସଙ୍ଗକୁ ନେଇ ଗୃହ କାର୍ଯ୍ୟ ବାଧାପ୍ରାପ୍ତ ହୋଇଛି। ପ୍ରାକୃତିକ ପ୍ରତିବନ୍ଧକ ଏବଂ ପ୍ରଶାସନିକ ଚାପ ସତ୍ତ୍ୱେ ଜନ୍ତର ମନ୍ତରରେ ରାତିସାରା ଓ ସକାଳୁ ଛାତ୍ରଛାତ୍ରୀଙ୍କ ଏହି ପ୍ରତ୍ୟାବର୍ତ୍ତନ କେନ୍ଦ୍ର ସରକାରଙ୍କ ପାଇଁ ଚିନ୍ତା ବଢ଼ାଇ ଦେଇଛି। ଆଗାମୀ ଦିନରେ ଏହି ଦାବି ଆହୁରି ତୀବ୍ର ହେବାର ସ୍ପଷ୍ଟ ସଂକେତ ମିଳୁଛି।
