ଓଡ଼ିଶାର ଶିଳ୍ପାୟନ ଏବଂ ଆଧୁନିକ ଉଚ୍ଚ-ମୂଲ୍ୟଯୁକ୍ତ ଉତ୍ପାଦନ କ୍ଷେତ୍ରରେ ଏକ ନୂତନ ସ୍ୱର୍ଣ୍ଣିମ ଅଧ୍ୟାୟ ଯୋଡ଼ିହେବାକୁ ଯାଉଛି। ପ୍ରସିଦ୍ଧ ‘ଡାଇମଣ୍ଡ ସିଟି’ ସୁରଟର ପ୍ରମୁଖ ‘ଲ୍ୟାବ୍-ଗ୍ରୋନ୍ ଡାଇମଣ୍ଡ’ ବା କୃତ୍ରିମ ହୀରା ପ୍ରସ୍ତୁତକାରୀ କମ୍ପାନୀଗୁଡ଼ିକ ଓଡ଼ିଶାରେ ନିଜର ଶିଳ୍ପପ୍ରତିଷ୍ଠା ପାଇଁ ବୃହତ୍ ଆଗ୍ରହ ପ୍ରକାଶ କରିଛନ୍ତି। ରାଜ୍ୟ ସରକାରଙ୍କ ଆକର୍ଷଣୀୟ ପୁଞ୍ଜିନିବେଶ ନୀତି, ସ୍ୱଳ୍ପ ମୂଲ୍ୟରେ ବିଦ୍ୟୁତ୍ ସରବରାହ, କ୍ୟାପିଟାଲ୍ ସବ୍ସିଡି ଏବଂ ପ୍ରଶାସନିକ ପ୍ରୋତ୍ସାହନ ଯୋଗୁଁ ଓଡ଼ିଶା ପ୍ରାୟ ୧୦,୦୦୦ କୋଟି ଟଙ୍କାର ପୁଞ୍ଜିନିବେଶ ଆକୃଷ୍ଟ କରିବାରେ ସଫଳ ହୋଇଛି।
/odishatv/media/media_files/2026/06/17/odisha-2026-06-17-22-12-15.jpg)
ଏହି ସମସ୍ତ ପ୍ରକଳ୍ପ ସମ୍ପୂର୍ଣ୍ଣ କାର୍ଯ୍ୟକ୍ଷମ ହେଲେ ରାଜ୍ୟର ପ୍ରାୟ ୮,୦୦୦ରୁ ଅଧିକ କୁଶଳୀ ଓ ଅର୍ଦ୍ଧ-କୁଶଳୀ ଯୁବକଯୁବତୀଙ୍କ ପାଇଁ ସିଧାସଳଖ ନିଯୁକ୍ତି ସୁଯୋଗ ସୃଷ୍ଟି ହେବ।
ଖୋର୍ଦ୍ଧାରେ ଗଢ଼ିଉଠିବ ମେଗା ହୀରା ନିର୍ମାଣ ହବ୍
ମୁଖ୍ୟମନ୍ତ୍ରୀ ମୋହନ ଚରଣ ମାଝୀଙ୍କ ଅଧ୍ୟକ୍ଷତାରେ ଅନୁଷ୍ଠିତ ହାଇ-ଲେଭେଲ୍ କ୍ଲିଅରାନ୍ସ ଅଥୋରିଟି ବୈଠକରେ ଏହି ପ୍ରକଳ୍ପଗୁଡ଼ିକୁ ଆନୁଷ୍ଠାନିକ ଭାବେ ମଞ୍ଜୁରୀ ପ୍ରଦାନ କରାଯାଇଛି। ସୂଚନା ଅନୁଯାୟୀ, ଖୋର୍ଦ୍ଧା ଜିଲ୍ଲାରେ ଭାରତର ପ୍ରମୁଖ LGD ନିର୍ମାତା କମ୍ପାନୀଗୁଡ଼ିକ ନିଜର ଅତ୍ୟାଧୁନିକ ମାନୁଫାକ୍ଚରିଂ ୟୁନିଟ୍ ପ୍ରତିଷ୍ଠା କରିବେ:
କିରା ଡାଇମ୍ LLP : ସୁରଟର ଏହି ସୀର୍ଷ ନିର୍ମାତା କମ୍ପାନୀ ଓଡ଼ିଶାରେ ପ୍ରାୟ ୭,୦୦୦ କୋଟି ଟଙ୍କାର ବିଶାଳ ପୁଞ୍ଜିନିବେଶ କରିବାକୁ ପ୍ରସ୍ତାବ ଦେଇଛି।
ଅଞ୍ଜଳି ଲାବ୍ଟେକ୍ ଲିମିଟେଡ୍ : ଏହି କମ୍ପାନୀ ପ୍ରାୟ ୧,୬୧୭.୫୦ କୋଟି ଟଙ୍କାର ନିବେଶ ସହ ହୀରା ପ୍ରସେସିଂ ଓ ଯନ୍ତ୍ରାଂଶ ନିର୍ମାଣ ୟୁନିଟ୍ ସ୍ଥାପନ କରିବ।
ଗ୍ରୋ ମ୍ୟାଗ୍ନିଫିସେଣ୍ଟ ପ୍ରାଇଭେଟ୍ ଲିମିଟେଡ୍ : ଏହି ପ୍ରକଳ୍ପ ମାଧ୍ୟମରେ ୧,୨୦୦ କୋଟି ଟଙ୍କାର ନିବେଶ ହେବ।
ଏହା ବ୍ୟତୀତ ‘ଢୋଲକିଆ ଲ୍ୟାବ୍ ଗ୍ରୋନ୍ ଡାଇମଣ୍ଡ’ ଏବଂ ‘AVP ଷ୍ଟାର୍’ ଭଳି ବହୁରାଷ୍ଟ୍ରୀୟ ସଂସ୍ଥାଗୁଡ଼ିକ ମଧ୍ୟ ଆଗାମୀ ପର୍ଯ୍ୟାୟରେ ରାଜ୍ୟରେ ଶହ ଶହ କୋଟି ଟଙ୍କାର ପ୍ରକଳ୍ପ ସ୍ଥାପନ ପାଇଁ ପ୍ରଶାସନ ସହ ଚୂଡ଼ାନ୍ତ ଆଲୋଚନା ଜାରି ରଖିଛନ୍ତି।
ଓଡ଼ିଶା ପ୍ରତି ଆକର୍ଷଣର ମୁଖ୍ୟ କାରଣ
ହୀରାକୁ ଲ୍ୟାବ୍ରେ ପ୍ରସ୍ତୁତ କରିବା ପାଇଁ ପ୍ରଚୁର ବିଦ୍ୟୁତ୍ ଶକ୍ତି ଏବଂ ନିରବଚ୍ଛିନ୍ନ ଶକ୍ତି ଯୋଗାଣର ଆବଶ୍ୟକତା ପଡ଼ିଥାଏ। ଓଡ଼ିଶା ସରକାରଙ୍କ ପକ୍ଷରୁ ଶିଳ୍ପ ନୀତି-୨୦୨୨ ଏବଂ ନୂତନ ନିବେଶ ପ୍ରୋତ୍ସାହନ ଯୋଜନା ଅଧୀନରେ ବିଦ୍ୟୁତ୍ ଶୁଳ୍କ ରିହାତି , ପାୱାର ଡିୟୁଟିରୁ ଛାଡ଼ ଏବଂ କ୍ୟାପିଟାଲ୍ ସବ୍ସିଡି ପ୍ରଦାନ କରାଯାଉଛି।
ସୁରଟ୍ର ଶିଳ୍ପପତିମାନଙ୍କ କହିବା ଅନୁଯାୟୀ, ଓଡ଼ିଶାରେ ମିଳୁଥିବା ସୁବିଧା ଏବଂ ଶସ୍ତା ବିଦ୍ୟୁତ୍ ସେମାନଙ୍କର ଉତ୍ପାଦନ ଖର୍ଚ୍ଚ କମାଇବାରେ ସାହାଯ୍ୟ କରୁଛି, ଯାହା ଚୀନ୍ ଭଳି ବିଶ୍ୱ ପ୍ରତିଯୋଗୀମାନଙ୍କୁ କଡ଼ା ଚ୍ୟାଲେଞ୍ଜ ଦେବା ପାଇଁ ଭାରତକୁ ସମର୍ଥ କରିବ।
ଯୁବପିଢ଼ିଙ୍କ ପାଇଁ ନୂଆ ସୁଯୋଗ ଓ କୌଶଳ ବିକାଶ
ଲ୍ୟାବ୍-ଗ୍ରୋନ୍ ଡାଇମଣ୍ଡ ଶିଳ୍ପ କେବଳ ଏକ ଉଚ୍ଚ-ପ୍ରଯୁକ୍ତିଭିତ୍ତିକ ସେକ୍ଟର ନୁହେଁ, ବରଂ ଏଥିରେ ବିଜ୍ଞାନ, ପ୍ରଯୁକ୍ତିବିଦ୍ୟା, କଟିଂ, ପଲିସିଂ ଏବଂ ଡିଜାଇନିଂ କ୍ଷେତ୍ରରେ ନିପୁଣ କୌଶଳୀ ଯୁବକଯୁବତୀଙ୍କ ଆବଶ୍ୟକତା ରହିଛି। ଓଡ଼ିଶାର ଆଇଟିଆଇ , ପୋଲିଟେକ୍ନିକ୍ ଏବଂ ଇଞ୍ଜିନିୟରିଂ ଶିକ୍ଷାନୁଷ୍ଠାନରୁ ଉତ୍ତୀର୍ଣ୍ଣ ଛାତ୍ରଛାତ୍ରୀମାନଙ୍କୁ ଏହି ଶିଳ୍ପରେ ସ୍ୱତନ୍ତ୍ର ତାଲିମ ଦିଆଯାଇ ନିଯୁକ୍ତ କରାଯିବ।
ଆଞ୍ଚଳିକ ବିକାଶ ଓ ଆର୍ଥିକ ପ୍ରଗତି
ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ପ୍ରକାଶ କରିଛନ୍ତି ଯେ, “ଓଡ଼ିଶା ଏବେ ବ୍ରାଉନ୍-ଫିଲ୍ଡ ଓ ପାରମ୍ପରିକ ଖଣିଜ ଶିଳ୍ପରୁ ଆଗକୁ ବଢ଼ି ସେମିକଣ୍ଡକ୍ଟର, ଗ୍ରୀନ୍ ଏନର୍ଜି ଏବଂ ଲ୍ୟାବ୍-ଗ୍ରୋନ୍ ଡାଇମଣ୍ଡ ଭଳି ଆଧୁନିକ ଗ୍ରୀନ୍-ଫିଲ୍ଡ ସେକ୍ଟରରେ ନିଜର ସ୍ୱତନ୍ତ୍ର ପରିଚୟ ସୃଷ୍ଟି କରୁଛି। ଏହି ପୁଞ୍ଜିନିବେଶ ରାଜ୍ୟର ଅର୍ଥନୀତିକୁ ସୁଦୃଢ଼ କରିବା ସହ ପୂର୍ବ ଭାରତର ଶିଳ୍ପ ମାନଚିତ୍ରରେ ଓଡ଼ିଶାକୁ ଶୀର୍ଷରେ ପହଞ୍ଚାଇବ।”
ଇଷ୍ଟର୍ଣ୍ଣ ଭାରତରେ ଓଡ଼ିଶା ପ୍ରଥମ ରାଜ୍ୟ ଭାବେ ହୀରା ନିର୍ମାଣ ଓ ପ୍ରସେସିଂ କ୍ଷେତ୍ରରେ ପାଦ ଥାପୁଥିବାରୁ ଏହା ଜାତୀୟ ଏବଂ ଅନ୍ତର୍ଜାତୀୟ ନିବେଶକମାନଙ୍କ ଦୃଷ୍ଟି ଆକର୍ଷଣ କରିବାରେ ସଫଳ ହୋଇଛି।
