Naveen is active in living on his own ।। ନିଜେ ବଞ୍ଚିବାକୁ ନବୀନ ସକ୍ରିୟ

ଓଡ଼ିଶାର ରାଜନୀତିରେ ଏବେ ଏକ ଅଜବ ସମୟ । ବିଜୁ ଜନତା ଦଳ ନା ଶାସନରେ, ନା ସ୍ପଷ୍ଟ ବିରୋଧରେ—ବରଂ ଏକ ଭିତରୁ ଭାଙ୍ଗୁଥିବା ଅସ୍ଥିରତାରେ ଅଟକି ଯାଇଛି। ଏହି ଅସ୍ଥିରତାର ମଧ୍ୟବର୍ତ୍ତୀରେ ଅଛନ୍ତି ନବୀନ ପଟ୍ଟନାୟକ —ଯିଏ ଦୀର୍ଘ ସମୟ ଧରି ନିରବ, ନିଷ୍କ୍ରିୟ ଓ ଦୂରେ ଥିଲେ କିନ୍ତୁ ହଠାତ୍ ରାଜ୍ୟସଭା ନିର୍ବାଚନ ଆସିବା ସହ ସକ୍ରିୟ ହୋଇ ଉଠିଛନ୍ତି।

ପ୍ରଶ୍ନ ହେଉଛି—ଏହି ସକ୍ରିୟତା କ’ଣ ଦଳକୁ ବଞ୍ଚାଇବା ପାଇଁ, ନା ନିଜକୁ?

କ୍ରସ୍‌ଭୋଟିଂର ଭୟ: ଅତୀତ ଯାହା ଭୁଲିହେବ ନାହିଁ

ନବୀନ ପଟ୍ଟନାୟକ ଅତୀତକୁ ଭୁଲିନାହାନ୍ତି । ଦୁଇ ଦୁଇଟି ରାଜ୍ୟସଭା ନିର୍ବାଚନରେ—ତାଙ୍କର ସକ୍ରିୟତା ସତ୍ତ୍ୱେ—ଦଳ ମଧ୍ୟରୁ କ୍ରସ୍‌ଭୋଟିଂ ହୋଇଥିଲା । ସେହି ଘଟଣାଗୁଡ଼ିକ ତାଙ୍କ ରାଜନୈତିକ ମନରେ ଗଭୀର ଆଘାତ ଛାଡ଼ିଛି ।

ଏଥର ଚାରିଟି ରାଜ୍ୟସଭା ଆସନ ପାଇଁ ନିର୍ବାଚନ । ଗଣିତର ଦୃଷ୍ଟିରୁ ବିଜେଡି ନିକଟରେ ପର୍ଯ୍ୟାପ୍ତ ବିଧାୟକ ଅଛନ୍ତି—ଜଣେ ପ୍ରାର୍ଥୀଙ୍କୁ ସହଜରେ ଜିତାଇବା ପାଇଁ । କିନ୍ତୁ ରାଜନୀତି କେବଳ ଗଣିତ ନୁହେଁ ; ଏହା ମନୋବିଜ୍ଞାନ ମଧ୍ୟ । ଅସନ୍ତୋଷକୁ ଚାପି ରଖିଥିବା ବିଧାୟକମାନେ କେବେ, କେଉଁ ସମୟରେ ମନର ରାଗ ଭୋଟ ବାଲାଟରେ ଦେଖାଇଦେବେ—ସେ ଭୟ ଏବେ ନବୀନଙ୍କୁ ଅକଲ ଗୁଡୁମ କରିଦେଇଛି ।

ପୁରୁଖା ନେତାଙ୍କ ଶରଣାଗତି

ଏହି ଭୟରେ ଗତକାଲି ନବୀନ ନିଜର ସହପାଠୀ, ପୁରୁଣା ବନ୍ଧୁ ଓ ବିଜେଡିର ପୁରୁଖା ମୁହଁ ଅନଙ୍ଗ ଉଦୟ ସିଂ ଦେଓଙ୍କୁ  ନବୀନ ନିବାସକୁ ଡାକିଥିଲେ । ଏହା କେବଳ ଏକ ସାଧାରଣ ସାକ୍ଷାତକାର ନୁହେଁ; ଏହା ଥିଲା ଏକ ରାଜନୈତିକ ସନ୍ଦେଶ ।

ଦଳୀୟ ମହଲରେ ଆଲୋଚନା ଅନୁସାରେ, ଯଦି ଏଥର ଯୁବ ନେତାମାନଙ୍କୁ ରାଜ୍ୟସଭାକୁ ପଠାଯାଏ, ତେବେ ଦଳରେ ଗୋଷ୍ଠୀବିବାଦ ଓ ବିଶୃଙ୍ଖଳା  ବଢ଼ିବ । ଏପରିକି ଦଳ ବିଭାଜନର ଭୟ ନବୀନଙ୍କ ଆଖି ସାମ୍ନାରେ ନାଚୁଛି । ସେହି କାରଣରୁ—ଯେଉଁ ନବୀନ ଦୀର୍ଘ ସମୟ ଧରି ପୁରୁଖାମାନଙ୍କୁ ପଛକୁ ଠେଲି ଦେଇଥିଲେ—ସେ ଏବେ ସେମାନଙ୍କ ଉପରେ ଭରସା କରିବାକୁ ବାଧ୍ୟ ହୋଇଛନ୍ତି ।

ସକ୍ରିୟତା—କେବଳ ରାଜ୍ୟସଭା ପର୍ଯ୍ୟନ୍ତ?

ଦଳୀୟ କର୍ମୀମାନେ ଖୋଲାମେଲା କହୁଛନ୍ତି—ଏହି ସକ୍ରିୟତା ସ୍ଥାୟୀ ନୁହେଁ । ରାଜ୍ୟସଭା ନିର୍ବାଚନ ସରିଲେ ନବୀନ ପୁଣି ନିଷ୍କ୍ରିୟ ହୋଇଯିବେ । ସାଧାରଣ ନିର୍ବାଚନ ପରି, ରାଜ୍ୟସଭା ପରେ ଆଉ ଦେଖାଦର୍ଶନ ମିଳିବ ନାହିଁ—ଏହି ଆଲୋଚନା ଏବେ ବିଜେଡି ଅଳିନ୍ଦରେ ସାଧାରଣ।

ଏହି ସକ୍ରିୟତାର ମୂଳ ଉଦ୍ଦେଶ୍ୟ—ଦଳୀୟ ଅସନ୍ତୋଷକୁ ଚାପିବା, କ୍ରସ୍‌ଭୋଟିଂକୁ ରୋକିବା ଓ ରାଜ୍ୟସଭା ଆସନ ନିଜ ହାତରେ ରଖିବା।

୨୦୨୪ ପରାଜୟ ପରେ ନବୀନଙ୍କ ନିଷ୍କ୍ରିୟତା

ବିଜେଡି କର୍ମୀମାନେ ସ୍ମରଣ କରୁଛନ୍ତି—୨୦୨୪ର ସାଧାରଣ ନିର୍ବାଚନରେ ପରାଜୟ ପରେ ନବୀନ ପ୍ରାୟ ନିଷ୍କ୍ରିୟ ହୋଇଯାଇଥିଲେ । ସ୍ୱାସ୍ଥ୍ୟଗତ କାରଣ ଦେଖାଇ ଡାକ୍ତରଖାନା , ନବୀନ ନିବାସ ଓ ନିରବତା—ଏକ ପ୍ରକାର ନିର୍ବାସନ ଜୀବନ।

ନୂଆପଡ଼ା ଆସନ ବଞ୍ଚାଇବା ପାଇଁ ସେ ଦୁଇଥର ପ୍ରଚାରରେ ଯାଇଥିଲେ, କିନ୍ତୁ ସେଥିରେ ମଧ୍ୟ ଅସୁବିଧା ସ୍ପଷ୍ଟ ଥିଲା । ଉପନିର୍ବାଚନରେ ପରାଜୟ ପରେ ସେ ପୁଣି ନିରବ ହୋଇଗଲେ। ପରାଜୟର ସମୀକ୍ଷା ପାଇଁ ଦାବି ହୋଇଥିଲେ ବି, ସେହି ଦାବିକୁ ସେ ଏଡ଼ାଇଗଲେ । ଏହି ନିରବତାରୁ ଦଳରେ ଦାୟିତ୍ୱ ହସ୍ତାନ୍ତର ଚର୍ଚ୍ଚା ଜୋର ଧରିଥିଲା—ଏବଂ ସେ ଚର୍ଚ୍ଚା ଏବେ ବି ଥମିନାହିଁ।

ଚିଠି ଜରିଆରେ ଦଳ ଚଲାଣ 

ନବୀନଙ୍କ ନିଷ୍କ୍ରିୟତା ସମୟରେ ବିଜେଡି ଏକ ଅଜବ ଅବସ୍ଥା ଦେଖିଥିଲା । ଦଳର ନିଷ୍ପତ୍ତି ଚିଠି ମାଧ୍ୟମରେ ମାତ୍ର ଗଣମାଧ୍ୟମକୁ ଆସୁଥିଲା । ଦଳୀୟ କାର୍ଯ୍ୟାଳୟ ଶଙ୍ଖ ଭବନରେ ପତାକା ଉତ୍ତୋଳନ ପର୍ଯ୍ୟନ୍ତ ବରିଷ୍ଠ ନେତା ଦେବୀ ମିଶ୍ରଙ୍କୁ  କରିବାକୁ ପଡ଼ିଥିଲା । ଏହା ଦଳୀୟ ନେତୃତ୍ୱ ଶୂନ୍ୟତାର ସ୍ପଷ୍ଟ ପ୍ରମାଣ ଥିଲା ।

ହଠାତ୍ ସକ୍ରିୟତା: ନିଲମ୍ବନ ଓ ସ୍ପଷ୍ଟିକରଣ

ଏହି ପରିପ୍ରେକ୍ଷିରେ ହଠାତ୍ ନବୀନ ପଟ୍ଟନାୟକ ସକ୍ରିୟ ହୋଇ ଉଠିଛନ୍ତି । ଦୁଇ ଦୁଇ ଜଣ ବିଧାୟକଙ୍କୁ ନିଲମ୍ବନ, ଗଣମାଧ୍ୟମ ସମ୍ମୁଖରେ ସ୍ପଷ୍ଟିକରଣ—ଏସବୁ ପୂର୍ବ ଅଭ୍ୟାସ ସହ ମେଳ ଖାଉନାହିଁ ।

ଏହାଛଡ଼ା, ଯେଉଁ ନବୀନ ନିର୍ବାଚନ ପରାଜୟର ସମୀକ୍ଷା କରି ନଥିଲେ, ସେ ଏବେ ଜିଲ୍ଲାର ବିଧାୟକ, ସାଂସଦ, ଜିଲ୍ଲା ପରିଷଦ ଅଧ୍ୟକ୍ଷ ଓ ବରିଷ୍ଠ ନେତାଙ୍କୁ ନବୀନ ନିବାସକୁ ଡାକି ଆଲୋଚନା କରୁଛନ୍ତି ।

ରାଜ୍ୟସଭା ହିଁ କି ମୂଳ କାରଣ?

ଦଳୀୟ ମହଲରେ ଏବେ ଏକମାତ୍ର ପ୍ରଶ୍ନ—ଏହି ସକ୍ରିୟତା କ’ଣ କେବଳ ରାଜ୍ୟସଭା ପାଇଁ ? ରାଜ୍ୟସଭା ସରିଲେ କ’ଣ ସବୁ ପୁଣି ପୂର୍ବ ଭଳି ନିରବତାକୁ ଫେରିଯିବ?

ଦଳରେ ପ୍ରଫୁଲ୍ଲ ମଲ୍ଲିକ, ଶ୍ରୀମୟୀ ମିଶ୍ରଙ୍କ ସମେତ ଦୁଇ ବିଧାୟକଙ୍କ ନିଲମ୍ବନକୁ ନେଇ ଭିତରେ ଅସନ୍ତୋଷ କୁହୁଳୁଛି । ଏହି ଅସନ୍ତୋଷକୁ ଯଦି ରାଜ୍ୟସଭା ପରେ ଅଣଦେଖା କରାଯାଏ, ତେବେ ତାହାର ପରିଣାମ ଅଧିକ ଭୟଙ୍କର ହୋଇପାରେ।

ନିଷ୍କର୍ଷ: ଦଳ ନା ନିଜ ରାଜନୀତି?

ନବୀନ ପଟ୍ଟନାୟକଙ୍କ ଏହି ସକ୍ରିୟତା ଦଳୀୟ ଲୋକତନ୍ତ୍ରର ପୁନରୁତ୍ଥାନ ନୁହେଁ ; ଏହା ଏକ ରାଜନୈତିକ ଆତ୍ମରକ୍ଷା। ରାଜ୍ୟସଭା ଭୋଟ, କ୍ରସ୍‌ଭୋଟିଂର ଭୟ ଓ ଦଳ ଭିତର ଅସନ୍ତୋଷ—ଏସବୁ ମିଶି ନବୀନଙ୍କୁ ନିଜେ ବଞ୍ଚିବା ପାଇଁ ସକ୍ରିୟ ହେବାକୁ ବାଧ୍ୟ କରିଛି ।

ପ୍ରଶ୍ନ ହେଉଛି—ରାଜ୍ୟସଭା ପରେ ସେ ଏହି ସକ୍ରିୟତାକୁ ଜାରି ରଖିବେ କି ? ନା ଏହା ଆଉ ଏକ ଅସ୍ଥାୟୀ ରାଜନୈତିକ ଅଭିନୟ ହୋଇ ରହିଯିବ ? ଉତ୍ତର ଭବିଷ୍ୟତ ଦେବ । କିନ୍ତୁ ଏତିକି ନିଶ୍ଚିତ—ବିଜେଡି ଏବେ ନିଜ ଅସ୍ତିତ୍ୱର ସବୁଠାରୁ ଜଟିଳ ଦାଉରେ ଅଛି ଏବଂ ନବୀନଙ୍କ ପ୍ରତ୍ୟେକ ନିଷ୍ପତ୍ତି ଏବେ ତାଙ୍କ ନିଜ ରାଜନୀତି ଭଳି ଦଳର ଭବିଷ୍ୟତକୁ ମଧ୍ୟ ନିର୍ଦ୍ଧାରଣ କରିବ ।

also read https://purvapaksa.com/how-many-suspensions-will-naveen-impose/

How many suspensions will Naveen impose? ।। କେତେ ନିଲମ୍ବନ କରିବେ ନବୀନ?

Anasuya Das