ଭାରତ ଏବଂ ଜାପାନ ମଧ୍ୟରେ ‘ମୋଗାମୀ-କ୍ଲାସ’ ଷ୍ଟେଲ୍ଥ୍ ଫ୍ରିଗେଟ୍ (ଆଧୁନିକ ଯୁଦ୍ଧଜାହାଜ)ର ମିଳିତ ନିର୍ମାଣକୁ ନେଇ ଚାଲିଥିବା ଚର୍ଚ୍ଚା ଉପରେ ବୈଦେଶିକ ସଚିବ ବିକ୍ରମ ମିସ୍ରି ଏକ ଗୁରୁତ୍ୱପୂର୍ଣ୍ଣ ସ୍ପଷ୍ଟୀକରଣ ଦେଇଛନ୍ତି। ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଏବଂ ତାଙ୍କ ଜାପାନୀ ପ୍ରତିପକ୍ଷଙ୍କ ମଧ୍ୟରେ ଅନୁଷ୍ଠିତ ବୈଠକରେ ଏହି ନିର୍ଦ୍ଦିଷ୍ଟ ଯୁଦ୍ଧଜାହାଜ ବିଷୟରେ କୌଣସି ସ୍ୱତନ୍ତ୍ର ଆଲୋଚନା ହୋଇନାହିଁ ବୋଲି ସେ କହିଛନ୍ତି।
)
ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ନିମନ୍ତ୍ରଣ କ୍ରମେ ଭାରତ ଗସ୍ତରେ ଆସିଥିବା ଜାପାନର ପ୍ରଧାନମନ୍ତ୍ରୀ ସନାଏ ତାକାଇଚିଙ୍କ ସହ ନୂଆଦିଲ୍ଲୀରେ ୧୬ତମ ଭାରତ-ଜାପାନ ବାର୍ଷିକ ଶିଖର ସମ୍ମିଳନୀ ଅନୁଷ୍ଠିତ ହୋଇଯାଇଛି। ଏହି ଦ୍ୱିପାକ୍ଷିକ ବୈଠକରେ ଉଭୟ ଦେଶ ନିଜର ରଣନୀତିକ ଓ ବିଶ୍ୱସ୍ତରୀୟ ଭାଗିଦାରୀକୁ ଆହୁରି ମଜବୁତ କରିଛନ୍ତି। ପ୍ରତିରକ୍ଷା, ଆର୍ଟିଫିସିଆଲ୍ ଇଣ୍ଟେଲିଜେନ୍ସ (AI), ସେମିକଣ୍ଡକ୍ଟର ଏବଂ ସ୍ୱାସ୍ଥ୍ୟ ସେବା ଭଳି କ୍ଷେତ୍ରରେ ସହଯୋଗ ବୃଦ୍ଧି ପାଇଁ ଅନେକ ଗୁରୁତ୍ୱପୂର୍ଣ୍ଣ ଚୁକ୍ତି ସ୍ୱାକ୍ଷରିତ ହୋଇଛି।
ବୈଦେଶିକ ସଚିବଙ୍କ ବଡ଼ ବୟାନ
ଗଣମାଧ୍ୟମର ପ୍ରଶ୍ନର ଉତ୍ତର ଦେଇ ବୈଦେଶିକ ସଚିବ ବିକ୍ରମ ମିସ୍ରି କହିଛନ୍ତି ଯେ, ବୈଠକରେ ନିର୍ଦ୍ଦିଷ୍ଟ ଭାବେ ‘ମୋଗାମୀ-କ୍ଲାସ’ ଯୁଦ୍ଧଜାହାଜ ଉପରେ କଥାବାର୍ତ୍ତା ହୋଇନାହିଁ। ତେବେ ଉଭୟ ନେତା ଆକାଶମାର୍ଗ, ସ୍ଥଳଭାଗ ଏବଂ ନୌସେନା ପ୍ରଣାଳୀର ବ୍ୟାପକ ସହଯୋଗ ସମ୍ଭାବନା ଉପରେ ଆଲୋଚନା କରିଛନ୍ତି। ଆଗାମୀ ଦିନରେ ଉପଯୁକ୍ତ ସମୟ ଆସିଲେ ଏହି ପ୍ରକଳ୍ପ ସମେତ ଅନ୍ୟାନ୍ୟ ନିର୍ଦ୍ଦିଷ୍ଟ ପ୍ରତିରକ୍ଷା ପ୍ରକଳ୍ପ ଉପରେ ଦୁଇ ଦେଶ ମଧ୍ୟରେ ଆଲୋଚନା ହୋଇପାରେ ବୋଲି ସେ ଆଶା ପ୍ରକଟ କରିଛନ୍ତି।
ଜାପାନ କରିବ ୧୦ ଟ୍ରିଲିୟନ ୟେନର ନିବେଶ
ଏହି ଅବସରରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ସୂଚନା ଦେଇଛନ୍ତି ଯେ, ଆଗାମୀ ୧୦ ବର୍ଷ ମଧ୍ୟରେ ଜାପାନ ଭାରତରେ ୧୦ ଟ୍ରିଲିୟନ ୟେନ (ପ୍ରାୟ ୫.୯ ଲକ୍ଷ କୋଟି ଟଙ୍କା) ନିବେଶ କରିବାକୁ ଲକ୍ଷ୍ୟ ରଖିଛି। ଏହା ସହିତ ଭାରତରେ କାର୍ଯ୍ୟ କରୁଥିବା ଜାପାନୀ କମ୍ପାନୀଗୁଡ଼ିକର ସଂଖ୍ୟାକୁ ଦ୍ୱିଗୁଣିତ କରିବା ପାଇଁ ମଧ୍ୟ ଲକ୍ଷ୍ୟ ସ୍ଥିର କରାଯାଇଛି। ଏହି ନିବେଶ ଦ୍ୱାରା ଦୁଇ ଦେଶର ଅର୍ଥନୀତିକ ସମ୍ପର୍କ ଏକ ନୂଆ ଶିଖରରେ ପହଞ୍ଚିବ ବୋଲି ଆଶା କରାଯାଉଛି।
