ଆସନ୍ତା ୧୨ ଫେବୃଆରୀରେ ଦେଶବ୍ୟାପୀ ‘ଭାରତ ବନ୍ଦ’ ଡାକରା ଦିଆଯାଇଛି । କେନ୍ଦ୍ରୀୟ ଶ୍ରମିକ ସଂଗଠନ ଓ ବିଭିନ୍ନ କୃଷକ ସଂଗଠନମାନେ ଏହି ବନ୍ଦକୁ ସମର୍ଥନ କରି ବଡ଼ ପ୍ରସ୍ତୁତି ନେଇଛନ୍ତି । ଆୟୋଜକମାନଙ୍କ ଦାବି ଅନୁସାରେ, ପ୍ରାୟ ୩୦ କୋଟିରୁ ଅଧିକ ଶ୍ରମିକ ଓ କୃଷକ ଏହି ଆନ୍ଦୋଳନରେ ସାମିଲ ହେବେ । ବିକ୍ଷୋଭ ଦିନରେ ଦେଶର ଅନେକ ସେବା ଓ ଦୈନିକ ଜୀବନ ଗତିରେ ପ୍ରଭାବ ପଡ଼ିପାରେ।
INTUC, AITUC, HMS, CITU ସହିତ ୧୦ଟି ପ୍ରମୁଖ କେନ୍ଦ୍ରୀୟ ଶ୍ରମିକ ସଂଗଠନ ଏହି ଧର୍ମଘଟର ନେତୃତ୍ୱ ନେଉଛନ୍ତି । ସେହିପରି ସଂଯୁକ୍ତ କିଷାନ ମୋର୍ଚ୍ଚା, ଅଲ୍ ଇଣ୍ଡିଆ କିଷାନ ସଭା ଓ ଭାରତୀୟ କିଷାନ ୟୁନିଅନ୍ ଭଳି ଚାଷୀ ସଂଗଠନମାନେ ମଧ୍ୟ ସମର୍ଥନ ଜଣାଇଛନ୍ତି । ବ୍ୟାଙ୍କ କର୍ମଚାରୀ ସଂଘମାନେ ମଧ୍ୟ ବନ୍ଦରେ ସାମିଲ ହେବାରୁ ବ୍ୟାଙ୍କିଂ ସେବା ବିଘ୍ନିତ ହେବା ଆଶଙ୍କା ରହିଛି।
ଶ୍ରମିକ ଓ କୃଷକ ସଂଗଠନମାନଙ୍କ ମୁଖ୍ୟ ଦାବିମାନଙ୍କ ମଧ୍ୟରେ ଚାରୋଟି ନୂତନ ଶ୍ରମ କୋଡ୍ ପ୍ରତ୍ୟାହାର ପ୍ରଧାନ। ସେମାନଙ୍କ ଅଭିଯୋଗ ଅନୁସାରେ ଏହି କୋଡ୍ ଶ୍ରମିକଙ୍କ ଅଧିକାରକୁ ଦୁର୍ବଳ କରୁଛି ଓ କାର୍ଯ୍ୟ ସୁରକ୍ଷାକୁ କ୍ଷୀଣ କରୁଛି । ସେହିପରି ଭାରତ-ଆମେରିକା ବାଣିଜ୍ୟ ଚୁକ୍ତିକୁ ବିରୋଧ କରି ସେମାନେ କହିଛନ୍ତି, ଏହା ଦ୍ୱାରା ବିଦେଶୀ କୃଷି ଉତ୍ପାଦ ଭାରତୀୟ ବଜାରକୁ ପ୍ରବେଶ କରି ଦେଶୀ ଚାଷୀଙ୍କୁ କ୍ଷତିଗ୍ରସ୍ତ କରିପାରେ । ଏହାସହ ମନରେଗା (MGNREGA) ଯୋଜନାର ସୁରକ୍ଷା, ବିଦ୍ୟୁତ ସଂଶୋଧନ ବିଲ୍ ପ୍ରତ୍ୟାହାର, ସର୍ବନିମ୍ନ ମଜୁରୀ ବୃଦ୍ଧି, ଚାଷୀଙ୍କ ପାଇଁ ଏମଏସପି (MSP)ର ଆଇନଗତ ଗ୍ୟାରେଣ୍ଟି ଓ ସରକାରୀ ସଂସ୍ଥାମାନଙ୍କ ଘରୋଇକରଣ ବନ୍ଦ କରିବା ଭଳି ଦାବି ଉଠାଯାଇଛି।
ବନ୍ଦ ଦିନରେ ସାର୍ବଜନୀନ ପରିବହନ, ବସ୍ ଓ ଟ୍ରେନ୍ ସେବାରେ ବାଧା ସୃଷ୍ଟି ହୋଇପାରେ । କେତେକ ସ୍ଥାନରେ ଚକା ଜାମ୍ ଓ ରାସ୍ତା ଅବରୋଧ ହେବା ଆଶଙ୍କା ରହିଛି । ସରକାରୀ କାର୍ଯ୍ୟାଳୟ, ବ୍ୟାଙ୍କ ଓ ବଜାର ମଧ୍ୟ ପ୍ରଭାବିତ ହେବାର ସମ୍ଭାବନା ରହିଛି । ଟଙ୍କା ଲେନଦେନ ଓ ଚେକ୍ କ୍ଲିୟାରେନ୍ସ ସେବା ବିଳମ୍ବିତ ହୋଇପାରେ । ଅନ୍ୟପଟେ, ଡାକ୍ତରଖାନା ଓ ଜରୁରୀ ସେବା ଚାଲୁ ରହିବ ବୋଲି ଆୟୋଜକମାନେ ସ୍ପଷ୍ଟ କରିଛନ୍ତି । ପରିସ୍ଥିତି ଅନୁସାରେ କେତେକ ରାଜ୍ୟରେ ସ୍କୁଲ-କଲେଜକୁ ଛୁଟି ଘୋଷଣା କରାଯାଇପାରେ ।
ପ୍ରଶାସନ ପକ୍ଷରୁ ଶାନ୍ତି-ଶୃଙ୍ଖଳା ରକ୍ଷା ପାଇଁ ବିଶେଷ ପୋଲିସ ବ୍ୟବସ୍ଥା ନେଇଯାଇଛି। ସାଧାରଣ ଲୋକଙ୍କୁ ଆବଶ୍ୟକ କାମ ପୂର୍ବରୁ ସରିବା ଓ ଯାତାୟାତ ସମୟରେ ସତର୍କ ରହିବାକୁ ପରାମର୍ଶ ଦିଆଯାଇଛି। ଦେଶବ୍ୟାପୀ ଏହି ‘ଭାରତ ବନ୍ଦ’ କେତେ ଦୂର ପର୍ଯ୍ୟନ୍ତ ପ୍ରଭାବ ପକାଇବ, ତାହା ୧୨ ଫେବୃଆରୀରେ ସ୍ପଷ୍ଟ ହେବ। ତଥାପି, ଏହି ଆନ୍ଦୋଳନ ଦେଶର ଶ୍ରମ ଓ କୃଷି ନୀତିକୁ ନେଇ ଚର୍ଚ୍ଚାକୁ ପୁଣିଥରେ ତିବ୍ର କରିଛି।
also read https://purvapaksa.com/odishas-food-is-safer-than-other-states/
ଓଡ଼ିଶାର ଖାଦ୍ୟ ଅନ୍ୟ ରାଜ୍ୟ ଅପେକ୍ଷା ସୁରକ୍ଷିତ! || Odisha’s food is safer than other states!
