ପ୍ରସିଦ୍ଧ ଇ-କମର୍ସ ସଂସ୍ଥା ଆମାଜନ୍ କୁ ସେବା ଯୋଗାଇବାରେ ଅବହେଳା ପାଇଁ ଗ୍ରାହକ ଅଦାଲତ ବଡ଼ ଝଟ୍କା ଦେଇଛନ୍ତି। ଗ୍ରାହକଙ୍କୁ ସମୟ ଅନୁଯାୟୀ ସାମଗ୍ରୀ ଡେଲିଭରି ନକରି ପରବର୍ତ୍ତୀ ସମୟରେ କେବଳ ଟଙ୍କା ଫେରସ୍ତ କରିଦେବା ଦ୍ୱାରା କମ୍ପାନୀ ନିଜ ଦାୟିତ୍ୱରୁ ମୁକ୍ତ ହୋଇପାରିବ ନାହିଁ ବୋଲି କୋର୍ଟ ସ୍ପଷ୍ଟ କରିଛନ୍ତି। ଏହି ମାମଲାରେ ଜିଲ୍ଲା ଗ୍ରାହକ ବିବାଦ ସମାଧାନ କମିଶନ ଆମାଜନ୍ କମ୍ପାନୀ ଉପରେ ୬,୦୦୦ ଟଙ୍କାର ଜରିମାନା ଲଗାଇଛନ୍ତି।
କମିଶନଙ୍କ ଅଧ୍ୟକ୍ଷ ଅନିଲ କୁମାର ପୁଣ୍ଡିର ଏବଂ ସଦସ୍ୟା ଅଞ୍ଜୁ ଶର୍ମା ମାମଲାର ଶୁଣାଣି କରି କହିଛନ୍ତି ଯେ, କ୍ରୟ କରାଯାଇଥିବା ସାମଗ୍ରୀକୁ ଠିକ୍ ସମୟରେ ଡେଲିଭରି ନକରିବା ଏବଂ ପରେ ଗ୍ରାହକଙ୍କ ବିନା ସହମତିରେ ଅର୍ଡର ବାତିଲ କରି କେବଳ ଟଙ୍କା ଫେରସ୍ତ କରିଦେବା ଦ୍ୱାରା ଗ୍ରାହକ ପାଇଥିବା ମାନସିକ ନିର୍ଯାତନା ଦୂର ହୁଏନାହିଁ। ଏହା ସମ୍ପୂର୍ଣ୍ଣ ରୂପେ ସେବାରେ ତ୍ରୁଟି ଏବଂ ବେପାରୀ ଅବହେଳାର ମାମଲା। ଅଦାଲତ ଆମାଜନ କମ୍ପାନୀକୁ ପୀଡ଼ିତ ଗ୍ରାହକଙ୍କୁ ମାନସିକ ନିର୍ଯାତନା ପାଇଁ ୫,୦୦୦ ଟଙ୍କା ଏବଂ କୋର୍ଟ ଖର୍ଚ୍ଚ ବାବଦକୁ ୧,୦୦୦ ଟଙ୍କା ପ୍ରଦାନ କରିବାକୁ ନିର୍ଦ୍ଦେଶ ଦେଇଛନ୍ତି।
କ’ଣ ଥିଲା ସମ୍ପୂର୍ଣ୍ଣ ଘଟଣା ?
ଗ୍ରେଟର ନୋଏଡାର ବାସିନ୍ଦା ଅଭିଷେକ ଭରଦ୍ୱାଜ ଏବଂ ଅକ୍ଷୟ ଆମାଜନ୍ ଆପ୍ ଜରିଆରେ ୩,୦୬୯ ଟଙ୍କାରେ ଏକ ମିଲଟନ୍ ବ୍ରାଣ୍ଡର ୩ ବର୍ଣ୍ଣର ବିଶିଷ୍ଟ ଗ୍ୟାସ୍ ଷ୍ଟୋଭ୍ ଅର୍ଡର କରିଥିଲେ। କମ୍ପାନୀ ପକ୍ଷରୁ ଗ୍ରାହକଙ୍କୁ ପଠାଯାଇଥିବା ଇମେଲ୍ରେ ‘ୱାନ୍-ଡେ ଡେଲିଭରି’ ଅର୍ଥାତ୍ ଗୋଟିଏ ଦିନ ମଧ୍ୟରେ ସାମଗ୍ରୀ ପହଞ୍ଚାଇବାକୁ ପ୍ରତିଶ୍ରୁତି ଦିଆଯାଇଥିଲା। ଗ୍ରାହକ ନିଜ ଆଡ଼ୁ ଡେଲିଭରି ଏଜେଣ୍ଟ ଓ କଷ୍ଟମର କେୟାରକୁ ବାରମ୍ବାର ଫୋନ୍ କରି ଯୋଗାଯୋଗ କରିଥିଲେ ଏବଂ ଏଜେଣ୍ଟ ନିଜେ ମଧ୍ୟ ଗ୍ରାହକଙ୍କ ଘରର ଠିକଣା ନିଶ୍ଚିତ କରିଥିଲେ।
ଏହା ସତ୍ତ୍ୱେ, ଏପ୍ରିଲ ୧ ତାରିଖରେ ଡେଲିଭରି ଷ୍ଟେସନରୁ କଲ୍ କରି ଓଟିପି ପ୍ରସ୍ତୁତ ରଖିବାକୁ କୁହାଯିବାର କିଛି ସମୟ ପରେ, ଗ୍ରାହକଙ୍କ ସହମତି ବିନା ଆମାଜନ୍ ଅର୍ଡରଟିକୁ ବାତିଲ କରିଦେଇଥିଲା। ଏଥିପାଇଁ କମ୍ପାନୀ “ଗ୍ରାହକଙ୍କ ସହ ଯୋଗାଯୋଗ ହୋଇପାରିଲା ନାହିଁ” ବୋଲି ମିଥ୍ୟା କାରଣ ଦର୍ଶାଇଥିଲା। ଏହା ପରେ ଗ୍ରାହକ ଜଣକ ଉପଭୋକ୍ତା ଫୋରମ୍ରେ ଆମାଜନ୍ ବିରୋଧରେ ଅଭିଯୋଗ ଦାଖଲ କରିଥିଲେ।
ଆମାଜନ୍ର ଯୁକ୍ତିକୁ ଖାରଜ କଲେ କୋର୍ଟ
କୋର୍ଟରେ ଆମାଜନ୍ କମ୍ପାନୀ ନିଜକୁ କେବଳ ଏକ ‘ଅନଲାଇନ୍ ମାଧ୍ୟମ ବା ପ୍ଲାଟଫର୍ମ’ ବୋଲି କହି ସମସ୍ତ ଦାୟିତ୍ୱରୁ ଖସିଯିବାକୁ ଚେଷ୍ଟା କରିଥିଲା। କମ୍ପାନୀ ଯୁକ୍ତି ବାଢ଼ିଥିଲା ଯେ, ଏହି ଗ୍ୟାସ୍ ଷ୍ଟୋଭ୍ ଜଣେ ତୃତୀୟ ପକ୍ଷ ବିକ୍ରେତାଙ୍କ ଦ୍ୱାରା ବିକ୍ରି ହେଉଥିଲା ଏବଂ କମ୍ପାନୀ ତୁରନ୍ତ ଟଙ୍କା ଫେରସ୍ତ କରିଦେଇଥିବାରୁ ତାଙ୍କର କୌଣସି ଦୋଷ ନାହିଁ। ମାତ୍ର ଉପଭୋକ୍ତା ଅଦାଲତ ଆମାଜନର ଏହି ଦାୟିତ୍ୱହୀନ ଯୁକ୍ତିକୁ ସମ୍ପୂର୍ଣ୍ଣ ରୂପେ ଖାରଜ କରିଦେବା ସହ ଗ୍ରାହକଙ୍କ ସୁରକ୍ଷା ଓ ସ୍ୱାର୍ଥର ସୁରକ୍ଷା ପାଇଁ କମ୍ପାନୀ ଉପରେ ଏହି ଜରିମାନା ଲଗାଇଛନ୍ତି।
