କେନ୍ଦ୍ର ସରକାରଙ୍କ ଦ୍ୱାରା ଅଣାଯାଇଥିବା ୧୩୦ତମ ସମ୍ବିଧାନ ସଂଶୋଧନ ବିଲ୍ କୁ ବିରୋଧ କରୁଥିବାରୁ କଂଗ୍ରେସ ଏବଂ ଆମ ଆଦମୀ ପାର୍ଟି ଉପରେ ତୀବ୍ର ବର୍ଷିଛନ୍ତି ଭାରତୀୟ ଜନତା ପାର୍ଟିର ଜାତୀୟ ମୁଖପାତ୍ର ଶେହଜାଦ ପୁନାୱାଲା। ସେ ଅଭିଯୋଗ କରିଛନ୍ତି ଯେ, ଏହି ଦଳଗୁଡ଼ିକ କେବଳ ନିଜର ଦୁର୍ନୀତି ଏବଂ ଭ୍ରଷ୍ଟାଚାରକୁ ସୁରକ୍ଷା ଦେବା ପାଇଁ ଏହି ଐତିହାସିକ ବିଲ୍କୁ ବିରୋଧ କରୁଛନ୍ତି। ନୂଆଦିଲ୍ଲୀସ୍ଥିତ ବିଜେପି କେନ୍ଦ୍ରୀୟ କାର୍ଯ୍ୟାଳୟରେ ଆୟୋଜିତ ଏକ ସାମ୍ବାଦିକ ସମ୍ମିଳନୀରେ ସେ ବିରୋଧୀ ଦଳଗୁଡ଼ିକର ଏଭଳି ଆଭିମୁଖ୍ୟକୁ ତୀବ୍ର ସମାଲୋଚନା କରିଛନ୍ତି।
କ’ଣ ରହିଛି ଏହି ପ୍ରସ୍ତାବିତ ବିଲ୍ରେ ?
ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ନେତୃତ୍ୱରେ ଅଣାଯାଇଥିବା ଏହି ୧୩୦ତମ ସମ୍ବିଧାନ ସଂଶୋଧନ ବିଲ୍ ଅନୁଯାୟୀ, ଯଦି କୌଣସି ପ୍ରଧାନମନ୍ତ୍ରୀ, ମୁଖ୍ୟମନ୍ତ୍ରୀ କିମ୍ବା କେନ୍ଦ୍ର ଓ ରାଜ୍ୟର ମନ୍ତ୍ରୀ କୌଣସି ଗୁରୁତର ଅପରାଧିକ ମାମଲାରେ ଦୋଷୀ ସାବ୍ୟସ୍ତ ହୁଅନ୍ତି କିମ୍ବା କୋର୍ଟରୁ କୌଣସି ଆଶ୍ୱସ୍ତି ନପାଇ ଲଗାତାର ୩୦ ଦିନ ପର୍ଯ୍ୟନ୍ତ ଜେଲ୍ରେ ରୁହନ୍ତି, ତେବେ ସେମାନଙ୍କୁ ସ୍ୱତଃ ନିଜ ପଦବୀ ଛାଡ଼ିବାକୁ ପଡ଼ିବ। ରାଜନୀତିରେ ସ୍ୱଚ୍ଛତା, ନୈତିକତା ଏବଂ ସୁଶାସନ ପ୍ରତିଷ୍ଠା କରିବା ପାଇଁ ଏହି ଆଇନ ଏକ ବଡ଼ ଅସ୍ତ୍ର ସାଜିବ ବୋଲି ବିଜେପି ଦାବି କରିଛି।
ବିରୋଧୀଙ୍କୁ ଶେହଜାଦଙ୍କ କଡ଼ା ପ୍ରଶ୍ନ
ଶେହଜାଦ ପୁନାୱାଲା କହିଛନ୍ତି ଯେ, “ଦେଶବାସୀ ଏହି ନିଷ୍ପତ୍ତିକୁ ସ୍ୱାଗତ କରୁଥିବା ବେଳେ କଂଗ୍ରେସ ଏବଂ ଆପ୍ ଏହାକୁ ବିରୋଧ କରି ନିଜର ପ୍ରକୃତ ଚେହେରା ସାମ୍ନାକୁ ଆଣିଛନ୍ତି। ଏହା କଂଗ୍ରେସର ଲାଜହୀନ ରାଜନୀତି ଏବଂ ମୋଦୀ ଜୀଙ୍କର ନୈତିକ ରାଜନୀତି ମଧ୍ୟରେ ଥିବା ପାର୍ଥକ୍ୟକୁ ସ୍ପଷ୍ଟ କରୁଛି।” ସେ ବିରୋଧୀଙ୍କୁ ପ୍ରଶ୍ନ କରିଛନ୍ତି ଯେ, ସେମାନେ ନୈତିକତା ସହ ଅଛନ୍ତି ନା ଦୁର୍ନୀତି ସହିତ?
ସେ ଆହୁରି ମଧ୍ୟ ଦର୍ଶାଇଛନ୍ତି ଯେ, “ସମ୍ବିଧାନର ଧାରା ୧୪ (ସମାନତା ଅଧିକାର) ଅନୁଯାୟୀ ଯଦି ଜଣେ ସାଧାରଣ ସରକାରୀ କର୍ମଚାରୀ ମାତ୍ର ୨ ଦିନ ଜେଲ୍ରେ ରହିଲେ ଚାକିରିରୁ ନିଲମ୍ବିତ ହୁଅନ୍ତି, ତେବେ ଜଣେ ମନ୍ତ୍ରୀ ବା ମୁଖ୍ୟମନ୍ତ୍ରୀ ମାସ ମାସ ଧରି ଜେଲ୍ ଭିତରୁ ସରକାର ଚଳାଇବା କେଉଁ ପ୍ରକାରର ସମାନତା? କଂଗ୍ରେସ ଏବଂ ‘ଆପ୍’ର ଏହି ଦୋମୁହାଁ ନୀତି ଏବେ ଚରମ ସୀମାରେ ପହଞ୍ଚିଛି।”
ଭ୍ରଷ୍ଟାଚାରର ଗୋଲ୍ଡ ମେଡାଲିଷ୍ଟ
ବିରୋଧୀ ଦଳଗୁଡ଼ିକୁ ‘ଭ୍ରଷ୍ଟାଚାରର ଗୋଲ୍ଡ ମେଡାଲିଷ୍ଟ’ ବୋଲି ଆଖ୍ୟା ଦେଇ ବିଜେପି ମୁଖପାତ୍ର କହିଛନ୍ତି ଯେ, ଯେଉଁମାନେ ଦିନେ ରାମଲୀଳା ମୈଦାନରେ ଠିଆ ହୋଇ ଲୋକପାଳ ବିଲ୍ ପାଇଁ ଆନ୍ଦୋଳନ କରୁଥିଲେ, ଆଜି ସେମାନେ ହିଁ ଜେଲ୍ ଭିତରୁ ୧୫୦-୧୬୦ ଦିନ ସରକାର ଚଲାଉଛନ୍ତି। ଏହି ବିଲ୍ରେ ପ୍ରଧାନମନ୍ତ୍ରୀ ପଦକୁ ମଧ୍ୟ ସାମିଲ କରାଯାଇଛି, ଯାହା ପ୍ରମାଣିତ କରୁଛି ଯେ ସରକାର କୌଣସି ପକ୍ଷପାତିତା ନକରି ଚଳିତ ବ୍ୟବସ୍ଥାରେ ସଂସ୍କାର ଆଣିବାକୁ ଚାହୁଁଛନ୍ତି। ମାତ୍ର କଂଗ୍ରେସ ନିଜର ଦୁର୍ନୀତିଗ୍ରସ୍ତ ସହଯୋଗୀଙ୍କୁ ବଞ୍ଚାଇବା ପାଇଁ ଗଣତନ୍ତ୍ର ବିପଦରେ ଥିବା କହି ଭିକ୍ଟିମ୍ କାର୍ଡ ଖେଳୁଛି।
