ତାମିଲନାଡୁ ରାଜନୀତିରେ ଏବେ ଏକ ବଡ଼ ଝଡ଼ ସୃଷ୍ଟି ହେବାକୁ ଯାଉଛି। ୫ଟି ରାଜ୍ୟର ବିଧାନସଭା ନିର୍ବାଚନ ତାରିଖ ଘୋଷଣା ହୋଇସାରିଛି, କିନ୍ତୁ ସବୁଠୁ ଅଧିକ ଚର୍ଚ୍ଚା ହେଉଛି ତାମିଲନାଡୁକୁ ନେଇ। କାରଣ ଏଠାରେ ଜଣେ ନୁହେଁ, ଦୁଇଜଣ ସୁପରଷ୍ଟାରଙ୍କ ମଧ୍ୟରେ ଏକ ଅଘୋଷିତ ରାଜନୈତିକ ଖେଳ ଆରମ୍ଭ ହୋଇଛି। ଜଣେ ହେଉଛନ୍ତି ତାମିଲ ସୁପରଷ୍ଟାର ବିଜୟ ଏବଂ ଅନ୍ୟଜଣେ ଆନ୍ଧ୍ରର ଡେପୁଟି ସିଏମ୍ ପବନ କଲ୍ୟାଣ। କିନ୍ତୁ ଏହି ଖେଳ ପଛର ମାଷ୍ଟରମାଇଣ୍ଡ ହେଉଛି ଭାରତୀୟ ଜନତା ପାର୍ଟି। ଆଜି ଆମେ ଏହି ରୋଚକ ସମୀକରଣର ସମ୍ପୂର୍ଣ୍ଣ ବିଶ୍ଳେଷଣ କରିବା।”
ବିଜୟଙ୍କ ଏଣ୍ଟ୍ରି ଓ ଏମକେ ଷ୍ଟାଲିନଙ୍କ ଭୟ
ତାମିଲନାଡୁ ରାଜନୀତି ଗତ ୬୦ ବର୍ଷ ହେଲା ଡିଏମକେ ଏବଂ ଏଆଇଏଡିଏମକେ ମଧ୍ୟରେ ସୀମିତ ଥିଲା। କିନ୍ତୁ ଏବେ ସୁପରଷ୍ଟାର ବିଜୟଙ୍କ ଦଳ ‘ଟିଭିକେ’ (Tamilaga Vettri Kazhagam) ମଇଦାନକୁ ଓହ୍ଲାଇଛି। ବିଜୟଙ୍କର ପ୍ରବଳ ଲୋକପ୍ରିୟତା ଅଛି, କିନ୍ତୁ ସଂଗଠନ ନାହିଁ। ବିଜେପିର ଏକମାତ୍ର ଲକ୍ଷ୍ୟ ହେଉଛି ଏମକେ ଷ୍ଟାଲିନଙ୍କୁ କ୍ଷମତାରୁ ହଟାଇବା। ବିଜେପି ମନେକରୁଛି ଯଦି ବିଜୟ ଏକୁଟିଆ ଲଢ଼ନ୍ତି, ତେବେ ଡିଏମକେ ବିରୋଧୀ ଭୋଟ୍ ଭାଗ ଭାଗ ହୋଇଯିବ ଏବଂ ଏହାର ସିଧାସଳଖ ଫାଇଦା ଷ୍ଟାଲିନଙ୍କୁ ମିଳିବ। ତେଣୁ ବିଜୟଙ୍କୁ ଏନଡିଏ ମେଣ୍ଟକୁ ଆଣିବା ପାଇଁ ଏବେ ଜୋରଦାର ପ୍ରୟାସ ଆରମ୍ଭ ହୋଇଛି।
ପବନ କଲ୍ୟାଣଙ୍କୁ କାହିଁକି ବ୍ୟବହାର କରୁଛି ବିଜେପି?
ଏଠାରେ ସବୁଠୁ ବଡ଼ ଟୁଇଷ୍ଟ ହେଉଛି ‘ପବନ କଲ୍ୟାଣ’। ବିଜେପି ପକ୍ଷରୁ ପବନ କଲ୍ୟାଣଙ୍କୁ ଦୂତ ଭାବେ ପଠାଯାଇଛି ବିଜୟଙ୍କ ପାଖକୁ। କାରଣ ଦୁହେଁ ଫିଲ୍ମ ଷ୍ଟାର ଏବଂ ପରସ୍ପରକୁ ଭଲ ଭାବେ ଜାଣନ୍ତି। ପବନ କଲ୍ୟାଣ ନିଜର ଉଦାହରଣ ଦେଇ ବିଜୟଙ୍କୁ ବୁଝାଉଛନ୍ତି ଯେ— ରାଜନୀତିରେ କେବଳ ଲୋକପ୍ରିୟତା କାମ କରେନି, ସଫଳତା ପାଇଁ ‘ରଣନୈତିକ ମେଣ୍ଟ’ ଦରକାର। ପବନ କଲ୍ୟାଣ ଯେମିତି ଚନ୍ଦ୍ରବାବୁ ନାଇଡୁ ଏବଂ ବିଜେପି ସହ ମିଶି ଆନ୍ଧ୍ରରେ କ୍ଷମତାକୁ ଆସିଲେ, ବିଜୟଙ୍କୁ ମଧ୍ୟ ସମାନ ପଥରେ ଆଣିବାକୁ ଚେଷ୍ଟା କରୁଛନ୍ତି ଅମିତ ଶାହ।
ବିଜୟଙ୍କ ଆଗରେ ଥିବା ବିକଳ୍ପ ଓ ଅଫର
ଶୁଣିବାକୁ ମିଳୁଛି ଯେ, ବିଜେପି ବିଜୟଙ୍କୁ ୮୦ଟି ଆସନ ସହ ଉପ-ମୁଖ୍ୟମନ୍ତ୍ରୀ ପଦ ଅଫର କରିଛି। କିନ୍ତୁ ବିଜୟଙ୍କ ଆଗରେ ଦ୍ୱନ୍ଦ୍ୱ ରହିଛି। ସେ ନିଜର ପ୍ରଥମ ସଭାରେ ବିଜେପିକୁ ନିଜର ‘ବୈଚାରିକ ଶତ୍ରୁ’ ବୋଲି କହିଥିଲେ। ଏବେ ଯଦି ସେ ବିଜେପି ସହ ହାତ ମିଳାନ୍ତି, ତେବେ ଜନତାଙ୍କ ଆଗରେ ତାଙ୍କର ସ୍ଥିତି କ’ଣ ହେବ? ଯଦି ସେ ଏକୁଟିଆ ଲଢ଼ନ୍ତି, ସେ ହୁଏତ ବହୁତ ଭୋଟ୍ ପାଇପାରନ୍ତି କିନ୍ତୁ ସିଟ୍ ଜିତିବା ମୁସ୍କିଲ। ଅର୍ଥାତ୍ ଏକୁଟିଆ ଲଢ଼ିଲେ ସେ ଶହୀଦ ହୋଇପାରନ୍ତି, କିନ୍ତୁ ମେଣ୍ଟ କଲେ ସେ ସରକାରକୁ ଆସିପାରନ୍ତି।
also read : https://purvapaksa.com/cji-re-examines-for-withdrawing-harish-ranas-live-support/
