ପ୍ରଥମ ଥର ପାଇଁ ଓଡ଼ିଶାର ଗର୍ବ ଶିମିଳିପାଳ ଅଭୟାରଣ୍ୟରେ ମୋବାଇଲ ନେଟୱର୍କ ସେବା ଉପଲବ୍ଧ ହୋଇଛି। ବଣ, ପାହାଡ଼ ଓ ଦୁର୍ଗମ ଭୂପ୍ରକୃତିରେ ଘେରା ଏହି ବିଶାଳ ଜଙ୍ଗଲ ଅଞ୍ଚଳରେ ଏପର୍ଯ୍ୟନ୍ତ “ନୋ ନେଟୱର୍କ” ଏକ ଦୈନନ୍ଦିନ ସମସ୍ୟା ଥିଲା। ଏବେ ସେହି ସମସ୍ୟାର ଅବସାନ ଘଟିଛି। ଶିମିଳିପାଳ ଅଭୟାରଣ୍ୟରେ 4G ମୋବାଇଲ ସେବା ଆରମ୍ଭ ହେବା ସହିତ ଜଙ୍ଗଲ ମଧ୍ୟରେ ଡିଜିଟାଲ ସଂଯୋଗର ଏକ ନୂଆ ଅଧ୍ୟାୟ ଆରମ୍ଭ ହୋଇଛି।
ବିଏସଏନଏଲ ପକ୍ଷରୁ ପ୍ରଥମ ଥର ପାଇଁ ଶିମିଳିପାଳ ଅଭୟାରଣ୍ୟ ଭିତରେ ୩ଟି 4G ମୋବାଇଲ ଟାୱାର ସ୍ଥାପନ କରାଯାଇଛି। ଏହି ଟାୱାରଗୁଡ଼ିକୁ ଗୁଡୁଗୁଡ଼ିଆ ଠାରେ ଆୟୋଜିତ ଏକ ବିଶେଷ କାର୍ଯ୍ୟକ୍ରମରେ ରାଷ୍ଟ୍ରପତି ଦ୍ରୌପଦୀ ମୁର୍ମୁ ଲୋକାର୍ପିତ କରିଛନ୍ତି। ରାଷ୍ଟ୍ରପତିଙ୍କ ଦ୍ୱାରା ଏହି ସେବାର ଉଦଘାଟନ ହେବା ଶିମିଳିପାଳ ପାଇଁ ଏକ ଐତିହାସିକ ମୁହୂର୍ତ୍ତ ଭାବେ ଗଣାଯାଉଛି।
ଏହି କାର୍ଯ୍ୟକ୍ରମରେ ଜଙ୍ଗଲ ଓ ପରିବେଶ ମନ୍ତ୍ରୀ ଗଣେଶ ରାମ ସିଂ ଖୁଣ୍ଟିଆ ସହ ଅନେକ ପ୍ରଶାସନିକ ଅଧିକାରୀ, ବନ କର୍ମଚାରୀ ଓ ସ୍ଥାନୀୟ ଲୋକେ ଉପସ୍ଥିତ ଥିଲେ। ଶିମିଳିପାଳ ଅଭୟାରଣ୍ୟ ମଧ୍ୟରେ ମୋବାଇଲ ନେଟୱର୍କ ସମସ୍ୟା ଦୀର୍ଘ ବର୍ଷ ଧରି ରହିଆସୁଥିଲା। ଦୁର୍ଗମ ପାହାଡ଼ିଆ ଭୂପ୍ରକୃତି ଓ ଘନ ଜଙ୍ଗଲ ହେତୁ ସାଧାରଣ ମୋବାଇଲ ଟାୱାରର ସିଗ୍ନାଲ ଏଠାରେ ପହଞ୍ଚିପାରୁନଥିଲା।
ପ୍ରାୟ ୨୭୫୦ ବର୍ଗ କିଲୋମିଟର ପରିବ୍ୟାପ୍ତ ଏହି ଜଙ୍ଗଲ ଅଞ୍ଚଳରେ ଅନେକ ଗାଁ ଓ ବନବାସୀ ବସବାସ କରନ୍ତି। ସ୍ଥାନୀୟ ଗ୍ରାମବାସୀମାନେ ଆପତ୍କାଳୀନ ସମୟରେ ଯୋଗାଯୋଗ ନ ହେବାରୁ ବଡ଼ ସମସ୍ୟାର ସମ୍ମୁଖୀନ ହୁଅନ୍ତି। ପର୍ଯ୍ୟଟକମାନେ ମଧ୍ୟ ଏଠାରେ ଆସି ନୋ ନେଟୱର୍କ ସମସ୍ୟାରେ ଅସୁବିଧା ଭୋଗୁଥିଲେ। ଏହି 4G ସେବା ଆରମ୍ଭ ହେବା ପରେ ଏହି ସମସ୍ୟାର ଅଧିକାଂଶ ସମାଧାନ ହେବ ବୋଲି ଆଶା କରାଯାଉଛି।
ଶିମିଳିପାଳ ଭଳି ସଂରକ୍ଷିତ ଜଙ୍ଗଲ ଅଞ୍ଚଳରେ ମୋବାଇଲ ସେବା ଉପଲବ୍ଧ ହେବା ଦ୍ୱାରା ବନ କର୍ମଚାରୀମାନେ ବନ୍ୟପ୍ରାଣୀ ସୁରକ୍ଷା, ଅଗ୍ନିନିୟନ୍ତ୍ରଣ ଓ ଅବୈଧ ଶିକାର ରୋକଥାମରେ ଅଧିକ ସହଜରେ କାମ କରିପାରିବେ। ସେଥିପାଇଁ ଏହା ସୁରକ୍ଷା ଦୃଷ୍ଟିକୋଣରୁ ମଧ୍ୟ ଏକ ବଡ଼ ପଦକ୍ଷେପ।
ଏହି 4G ମୋବାଇଲ ସେବା ଶିମିଳିପାଳ ଅଭୟାରଣ୍ୟ ଭିତରେ ଥିବା ସ୍ଥାନୀୟ ଅଧିବାସୀମାନଙ୍କ ସାମାଜିକ ଓ ଅର୍ଥନୈତିକ ଅଭିବୃଦ୍ଧିରେ ମଧ୍ୟ ସହାୟକ ହେବ। ଶିକ୍ଷା, ସ୍ୱାସ୍ଥ୍ୟ, ଡିଜିଟାଲ ସେବା ଓ ସୂଚନା ପାଇଁ ଏହା ଏକ ନୂଆ ଦ୍ୱାର ଖୋଲିଦେଇଛି। ଜଙ୍ଗଲ ମଧ୍ୟରେ ଡିଜିଟାଲ ସଂଯୋଗ ସ୍ଥାପନ ହେବା ସହ ଶିମିଳିପାଳ ଏବେ ଆଧୁନିକତାର ଏକ ନୂଆ ପଥରେ ଅଗ୍ରସର ହେଉଛି।
also read https://purvapaksa.com/india-us-relations/
ରାତି ଅଧାରେ ନୂଆ ନିୟମ ମୁଣ୍ଡ ନୁଆଁଇଲେ ଟ୍ରମ୍ପ ।। India US Relations
