IAS: ଏହି ବରିଷ୍ଠ ଅଧିକାରୀମାନେ ଏଡିପି ଓ ଏବିପି ଅଧୀନରେ ହୋଇଥିବା ଯୋଜନାର ଅଗ୍ରଗତି ସମୀକ୍ଷା କରିବେ ବୋଲି ଯୋଜନା ଓ ସମନ୍ୱୟ ବିଭାଗ ପକ୍ଷରୁ ଜାରି ବିଜ୍ଞପ୍ତିରେ କୁହାଯାଇଛି।
ନିତି ଆୟୋଗର ଆକାଂକ୍ଷୀ ଜିଲ୍ଲା କାର୍ଯ୍ୟକ୍ରମ (ଏଡିପି) ଓ ଆକାଂକ୍ଷୀ ବ୍ଲକ କାର୍ଯ୍ୟକ୍ରମ (ଏବିପି) ଅଧୀନରେ ରାଜ୍ୟ ସରକାର ୧୬ ଜଣ ବରିଷ୍ଠ ଆଇଏଏସ୍ ଅଧିକାରୀଙ୍କୁ ଆକାଂକ୍ଷୀ ଜିଲ୍ଲା ଦାୟିତ୍ୱରେ ଥିବା ସଚିବ ଭାବେ ନିଯୁକ୍ତି ଦେଇଛନ୍ତି। ଏହି ବରିଷ୍ଠ ଅଧିକାରୀମାନେ ଏଡିପି ଓ ଏବିପି ଅଧୀନରେ ଏହି ଜିଲ୍ଲାଗୁଡ଼ିକରେ ହୋଇଥିବା ଯୋଜନାର ଅଗ୍ରଗତି ସମୀକ୍ଷା କରିବେ ବୋଲି ଯୋଜନା ଓ ସମନ୍ୱୟ ବିଭାଗ ପକ୍ଷରୁ ଜାରି ବିଜ୍ଞପ୍ତିରେ କୁହାଯାଇଛି।
ଗୋପବନ୍ଧୁ ପ୍ରଶାସନ ଏକାଡେମୀର ମହାନିର୍ଦ୍ଦେଶକ ଜି ମାଥିଭାଥନନଙ୍କୁ ବଲାଙ୍ଗୀର ଜିଲ୍ଲା ଦାୟିତ୍ୱ ଦିଆଯାଇଥିବା ବେଳେ ଶିଳ୍ପ ବିଭାଗର ଅତିରିକ୍ତ ମୁଖ୍ୟ ଶାସନ ସଚିବ ହେମନ୍ତ ଶର୍ମାଙ୍କୁ ସମ୍ବଲପୁର ଦାୟିତ୍ୱ ଦିଆଯାଇଛି। ଶର୍ମା କେନ୍ଦୁଝର ଜିଲ୍ଲା ଦାୟିତ୍ୱରେ ଥିବା ସଚିବ ଥିଲେ। ସେହିପରି ପ୍ରମୁଖ ଶାସନ ସଚିବ ପାହ୍ୟାରେ ଥିବା ସଞ୍ଜୟ କୁମାର ସିଂହ, ଶାଶ୍ୱତ ମିଶ୍ର, ସୁରେଶ କୁମାର ବଶିଷ୍ଠ ଓ ଶୁଭ ଶର୍ମାଙ୍କୁ ଯଥାକ୍ରମେ ନୟାଗଡ଼, ଢେଙ୍କାନାଳ, ମୟୂରଭଞ୍ଜ ଓ ମାଲକାନଗିରି ଜିଲ୍ଲା ଦାୟିତ୍ୱ ଦିଆଯାଇଛି।
ଆର୍ ସାନ୍ଥନଗୋପାଳନ, ଗିରିଶ ଏସ୍ ଏନ୍, ଅବସ୍ଥି ଏସ୍, ରାଜେଶ ପ୍ରଭାକର ପାଟିଲ, ଅରବିନ୍ଦ ଅଗ୍ରୱାଲ ଓ ବଲୱନ୍ତ ସିଂହ ଙ୍କ ଭଳି ସମ୍ପାଦକ ପାହ୍ୟାର ୬ ଜଣ ଅଧିକାରୀ କନ୍ଧମାଳ, କଳାହାଣ୍ଡି, ଗଜପତି, କୋରାପୁଟ, ରାୟଗଡ଼ା ଓ କେନ୍ଦୁଝର ଜିଲ୍ଲା ଦାୟିତ୍ୱରେ ରହିବେ। ଶିଳ୍ପ ନିର୍ଦ୍ଦେଶକ ଡି ପ୍ରଶାନ୍ତ କେ ରେଡ୍ଡୀଙ୍କୁ ନୂଆପଡ଼ା ଓ ଓଡ଼ିଆ ଭାଷା, ସାହିତ୍ୟ ଓ ସଂସ୍କୃତି ନିର୍ଦ୍ଦେଶକ ବିଜୟ କେତନ ଉପାଧ୍ୟାୟଙ୍କୁ ନବରଙ୍ଗପୁର ଜିଲ୍ଲା ଦାୟିତ୍ୱ ଦିଆଯାଇଛି। ସେହିପରି ଓଏମସିର ପରିଚାଳନା ନିର୍ଦ୍ଦେଶକ ସୁଧାଂଶୁ ମୋହନ ସାମଲଙ୍କୁ ବରଗଡ଼ ଜିଲ୍ଲା ଦାୟିତ୍ୱ ଦିଆଯାଇଛି।
୨୦୨୪ ଅକ୍ଟୋବର ୯ତାରିଖରେ ବିଭାଗ ପକ୍ଷରୁ ଦିଆଯାଇଥିବା ଶେଷ ବିଜ୍ଞପ୍ତିରେ ଏହା ସଂଶୋଧନ କରାଯାଇଛି। ରାଜ୍ୟ ସରକାର ସମସ୍ତ କଲ୍ୟାଣମୂଳକ ପଦକ୍ଷେପର କାର୍ଯ୍ୟକାରିତା ତଦାରଖ କରିବା ପାଇଁ ଫେବ୍ରୁଆରି ମାସରେ ୩୦ଟି ଜିଲ୍ଲାରେ ଜଣେ ଲେଖାଏଁ ବରିଷ୍ଠ ଆଇଏଏସ୍ ଅଧିକାରୀଙ୍କୁ ନିଯୁକ୍ତ କରିଥିଲେ। ତେବେ ଆକାଂକ୍ଷୀ ଜିଲ୍ଲାଗୁଡ଼ିକୁ ନିୟୋଜିତ ଅଧିକାରୀମାନେ ଏଡିପି ଓ ଏବିପି ଅଧୀନରେ ଅଗ୍ରଗତି ର ବିଶେଷ ସମୀକ୍ଷା କରିବେ। ରାଜ୍ୟରେ ୨୯ଟି ଆକାଂକ୍ଷୀ ବ୍ଲକ ରହିଛି।
previous article:https://purvapaksa.com/expands-enclosure-for-tigress-zeenat/
