ଜଣାଶୁଣା ଆସାମୀୟ ଗାୟକ ଜୁବୀନ ଗର୍ଗଙ୍କର ୫୨ ବର୍ଷ ବୟସରେ ମୃତ୍ୟୁ ହୋଇଛି। ସିଙ୍ଗାପୁରର ଲାଜରସ ଦ୍ୱୀପରେ ସନ୍ତରଣ କରୁଥିବା ସମୟରେ ତାଙ୍କର ମୃତ୍ୟୁ ହୋଇଛି । ପ୍ରାରମ୍ଭିକ ରିପୋର୍ଟରେ କୁହାଯାଇଥିଲା ଯେ ଗାୟକର ମୃତ୍ୟୁ ସ୍କୁବା ଡାଇଭିଙ୍ଗ ଦୁର୍ଘଟଣାରେ ହୋଇଛି। କିନ୍ତୁ, ପରେ କୁହାଗଲା ଯେ ତାଙ୍କର ମୃତ୍ୟୁ ହୃଦଘାତ କାରଣରୁ ହୋଇଛି। ଏବେ ଜୁବୀନଙ୍କ ମୃତ୍ୟୁ କେଉଁ ପରିସ୍ଥିତିରେ ହୋଇଥିଲା ,ତାହାର ଯାଞ୍ଚ ପାଇଁ ସ୍ପେସାଲ୍ ଇନ୍ଭେଷ୍ଟିଗେସନ୍ ଟିମ (ଏସ୍ଆଇଟି) ଗଠନ କରାଯାଇଛି। ଏହା ଅଧୀନରେ ଅପରାଧିକ ଷଡ଼ଯନ୍ତ୍ର ଓ ବିନା ଉଦ୍ଦେଶ୍ୟରେ ହତ୍ୟା ଭଳି ଅଭିଯୋଗ ଅନ୍ତର୍ଭୁକ୍ତ। କିଛି ଏହାଭଳି ରହସ୍ୟମୟ ପରିସ୍ଥିତିରେ ଜଣାଶୁଣା ଅଭିନେତ୍ରୀ ଶ୍ରୀଦେବୀଙ୍କର ମଧ୍ୟ ଦୁବାଇରେ ମୃତ୍ୟୁ ହୋଇଥିଲା। କିନ୍ତୁ, ତାଙ୍କର ମୃତ୍ୟୁର ରହସ୍ୟ ଆଜି ପର୍ଯ୍ୟନ୍ତ ରହସ୍ୟ ହିଁ ରହିଛି। ସବୁଠାରୁ ବଡ଼ କଥା ହେଉଛି ଯେ ଉଭୟଙ୍କ ମୃତ୍ୟୁ ସେତେବେଳେ ହୋଇଥିଲା ଯେତେବେଳେ ସେମାନେ ଦେଶରୁ ବାହାରେ ଥିଲେ ଓ ଉଭୟର ମୃତ୍ୟୁ ପାଣିରେ ବୁଡିକରି ହୋଇଥିଲା ।
ଜୁବୀନଙ୍କ ମୃତ୍ୟୁର ଷଡ଼ଯନ୍ତ୍ର ଅଭିଯୋଗ ଘେରରେ ୪ ଜଣ
ଗଣମାଧ୍ୟମ ରିପୋର୍ଟ ଅନୁସାରେ, ଏହି ମାମଲାରେ ପୂରା ଆସାମରେ ୫୫ଟି ଏଫଆଇଆର ରୁଜୁ ହୋଇଛି। ଯେଉଁଥିରେ ୪ ଜଣଙ୍କୁ ଅଭିଯୁକ୍ତ କରାଯାଇଛି। ଜୁବୀନଙ୍କ ଶବ ସିଙ୍ଗାପୁରରୁ ଭାରତ ଆସିବା ପରେ ଦ୍ୱିତୀୟ ପୋଷ୍ଟମର୍ଟମ୍ କରାଯାଇଛି, ଯାହା ତାଙ୍କର ମୃତ୍ୟୁର ରହସ୍ୟକୁ ଆହୁରି ଗଭୀର କରିଛି। ଆସାମ ସିଆଇଡି ମଧ୍ୟ ବ୍ୟାପକ ଯାଞ୍ଚ ଆରମ୍ଭ କରିଛି। ଯେଉଁ ଲୋକଙ୍କ ଉପରେ ଅଭିଯୋଗ ହୋଇଛି, ସେମାନଙ୍କ ମଧ୍ୟରେ ନର୍ଥ୍ ଇଷ୍ଟ୍ ଇଣ୍ଡିଆ ଫେଷ୍ଟିଭାଲର ଆୟୋଜକ ଶ୍ୟାମକାନୁ ମହାନ୍ତ, ଜୁବୀନଙ୍କ ମ୍ୟାନେଜର ସିଦ୍ଧାର୍ଥ ଶର୍ମା, ଡ୍ରମର ଶେଖର ଜ୍ୟୋତି ଗୋସ୍ୱାମୀ ଓ ବ୍ୟବସାୟୀ ସଞ୍ଜୀବ ନାରାୟଣ ଅନ୍ତର୍ଭୁକ୍ତ। ଏମାନଙ୍କ ବିରୁଦ୍ଧରେ ବିଭିନ୍ନ ପୁଲିସ ଥାନାରେ ଏଫଆଇଆର ରୁଜୁ ହୋଇଛି। ଅଭିଯୋଗପତ୍ରରେ ଗାୟକଙ୍କ ମୃତ୍ୟୁର ସମ୍ଭାବିତ ଷଡ଼ଯନ୍ତ୍ରରେ ସେମାନଙ୍କର ଯୋଗଦାନର ଅଭିଯୋଗ ଲଗାଯାଇଛି।
ପ୍ରଥମେ ସ୍କୁବା ଡାଇଭିଙ୍ଗ ତାପରେ ହୃଦଘାତ କଥା
ଜୁବୀନଙ୍କ ପତ୍ନୀ ଗରିମା ସ୍କୁବା ଡାଇଭିଙ୍ଗରୁ ଦୁର୍ଘଟଣାର ଦାବିକୁ ପ୍ରତ୍ୟାଖ୍ୟାନ କରି କହିଛନ୍ତି ଯେ ଜୁବୀନ ଡ୍ରମର ଶେଖର ଓ ସିଦ୍ଧାର୍ଥ ସମେତ ସାତ-ଆଠଜଣଙ୍କ ସହିତ ଏକ ବୋଟରେ ଦ୍ୱୀପକୁ ଯାଇଥିଲେ। ସେମାନଙ୍କ ସହିତ ସେ ସନ୍ତରଣ ପରେ ବୋଟରେ କୂଳକୁ ଫେରିଆସିଥିଲେ। ସମସ୍ତେ ଲାଇଫ୍ ଜ୍ୟାକେଟ୍ ପିନ୍ଧିଥିଲେ। କିନ୍ତୁ ଜୁବୀନ ପୁନର୍ବାର ସ୍ୱିମ୍ କରିବାକୁ ଗଲେ ଓ ତାଙ୍କୁ ହୃଦଘାତ ଆସିଥିଲା। ତାଙ୍କୁ ପୂର୍ବରୁ ବି ଅନେକ ଥର ହୃଦଘାତ ଆସିଥିବା କଥା ସେ କହିଛନ୍ତି। ଟିମର ଅନ୍ୟ ସଦସ୍ୟମାନେ କିଛି ଅସାଧାରଣ ଦେଖି ତାଙ୍କୁ ବାହାର କରିଥିଲେ। ଜୁବୀନଙ୍କୁ ସିଙ୍ଗାପୁର ଜେନେରାଲ୍ ହସ୍ପିଟାଲ୍ର ଆଇସିୟୁରେ ପ୍ରାୟ ଦୁଇ ଘଣ୍ଟା ରଖାଯାଇଥିଲା।
ସୋସିଆଲ୍ ମିଡିଆରେ ଷଡ଼ଯନ୍ତ୍ର ଥିଓରୀ
ଇନଷ୍ଟାଗ୍ରାମରେ ଜଣେ ୟୁଜର ଲେଖିଛନ୍ତି ଜୁବୀନଙ୍କ ନିକଟରେ ଲାଇଫ୍ ଜ୍ୟାକେଟ୍ ନାହିଁ, ସେ କ୍ଲାନ୍ତ ଦେଖାଯାଉଛନ୍ତି। ହୁଏତ ନିଶାରେ ମଧ୍ୟ ଅଛନ୍ତି ଓ ତାଙ୍କ ଏହି କଥିତ ବନ୍ଧୁମାନେ ତାଙ୍କୁ ଏଭଳି କରିବାକୁ ଉତ୍ସାହିତ କରୁଛନ୍ତି। ଯଦିଓ ସମସ୍ତେ ଜାଣନ୍ତି ଯେ ଜୁବୀନଙ୍କୁ ସିଜର୍ ଡିସ୍ଅର୍ଡର୍ ଅଛି। ଲାଗୁଛି ଏହା ସବୁ ଆଗରୁ ଯୋଜନାବଦ୍ଧ…ଯାହା ବି ହେଉ, ଆମେ ନିଜର ଏକମାତ୍ର ଜୁବୀନ ଗର୍ଗଙ୍କୁ ହରାଇଛୁ।
ଅନ୍ୟ ଜଣେ ୟୁଜର୍ ଲେଖିଛନ୍ତି-ଯେଉଁଭଳି ଭିଡିଓ ଜାରି କରୁଛନ୍ତି, ସେଥିରୁ ବୁଝାଯାଉଛି ଯେ ଏହା ସାଧାରଣ ମୃତ୍ୟୁ ନଥିଲା…ଆମେ ସିବିଆଇ ଯାଞ୍ଚ ଚାହୁଁଛୁ…ଆସାମର ଲୋକମାନେ, ନିଜର ବିରୋଧ ସ୍ୱର ଉଠାଅ। ଆଉ ଜଣେ ୟୁଜର ଲେଖିଛନ୍ତି-ଏହି ଭିଡିଓକୁ ଦେଖିବା ସମୟରେ ମୋତେ କ୍ଲାନ୍ତି ଓ ଦୁଃଖ ଅନୁଭବ ହେଉଛି। ଜୁବୀନ ମଧ୍ୟ ଏହି ଭିଡିଓରେ କେତେ ଅସହାୟ ଅନୁଭବ କରୁଛନ୍ତି, କିନ୍ତୁ ତାଙ୍କ ଆଖପାଖରେ ଥିବା ଲୋକମାନେ ଚିତ୍କାର କରୁଛନ୍ତି ଓ ଆନନ୍ଦ ନେଉଛନ୍ତି।
ସିଜର୍ ଡିସ୍ଅର୍ଡର୍ କ’ଣ ?
ଫେଲିକ୍ସ୍ ହସ୍ପିଟାଲର ୱେବ ସାଇଟରେ ଥିବା ବ୍ୟାଖ୍ୟା ଅନୁସାରେ, ସିଜର୍ (ସିଜର୍)କୁ ସାଧାରଣ ଭାଷାରେ ବାତ ମାରିବା କୁହାଯାଏ। ଏହା ଏକ ଏଭଳି ଅବସ୍ଥା ଯେଉଁଥିରେ ମସ୍ତିଷ୍କର କୋଷଗୁଡ଼ିକ (ନ୍ୟୁରନ୍ସ)ର ଅସାଧାରଣ ବିଦ୍ୟୁତ୍ ଗତିବିଧି ବଢ଼ିଯାଏ। ଏହାରୁ ଶରୀରରେ ଆକସ୍ମିକ ଓ ଅନିୟନ୍ତ୍ରିତ ଝଟକା, ଅଜଣା ହରକତ ବା ବେହୋଶୀ ଭଳି ଅବସ୍ଥା ହୋଇଯାଏ। ଏହା ଏକ ଅସ୍ଥାୟୀ ନ୍ୟୁରୋଲୋଜିକାଲ୍ ସମସ୍ୟା, ଯାହା ପ୍ରାୟତଃ ବାତ (ଏପିଲେପ୍ସି) ସହିତ ଜଡ଼ିତ, କିନ୍ତୁ ଏହା ଅନ୍ୟ କାରଣରୁ ମଧ୍ୟ ହୋଇପାରେ। ଯେପରିକି ମସ୍ତିଷ୍କର ଆଘାତ ବା ସଂକ୍ରମଣ, ମସ୍ତିଷ୍କରେ ଅକ୍ସିଜନର ଅଭାବ, ମସ୍ତିଷ୍କ ଅପରେସନ୍ ବା ଷ୍ଟ୍ରୋକ୍, ମଦ୍ୟପାନର ଅଧିକ ସେବନ ବା ଡ୍ରଗ୍ସ, ଜେନେଟିକ୍ ବିକାର ଇତ୍ୟାଦିରୁ ମଧ୍ୟ ହୋଇଯାଏ। ବିଶେଷଜ୍ଞମାନଙ୍କ ଅନୁମାନ ଅନୁସାରେ, ବିଶ୍ୱବ୍ୟାପୀ ୧୦ ପ୍ରତିଶତ ଲୋକ ନିଜ ଜୀବନକାଳରେ ଅତି କମରେ ଥରେ ଏଭଳି ସିଜରର ଅନୁଭବ କରିପାରନ୍ତି।
ଶ୍ରୀଦେବୀଙ୍କ ମୃତ୍ୟୁ ଜୁବୀନଙ୍କ ମୃତ୍ୟୁ ମଧ୍ୟରେ ସମାନତା
ଶ୍ରୀଦେବୀର ଫେବ୍ରୁଆରୀ, ୨୦୧୮ରେ ଦୁବାଇରେ ଏକ ପାରିବାରିକ ବିବାହରେ ଅଂଶଗ୍ରହଣ କରିବା ସମୟରେ ତାଙ୍କର ମୃତ୍ୟୁ ହୋଇଥିଲା। ପ୍ରାରମ୍ଭିକ ରିପୋର୍ଟରେ ମୃତ୍ୟୁର କାରଣ କାର୍ଡିୟାକ୍ ଆରେଷ୍ଟ୍ କୁହାଯାଇଥିଲା, କିନ୍ତୁ ପରେ ଅଧିକାରୀକ ବୟାନରେ ସଂଶୋଧନ କରି ଏହାକୁ ହୋଟେଲର ବାଥଟବରେ ‘ଦୁର୍ଘଟଣାବଶତଃ ଡୁବିବା’ ବୋଲି କୁହାଯାଇଥିଲା। ଏହି ୟୁ-ଟର୍ନରୁ ମିଡିଆ ଓ ପ୍ରଶସଂକଙ୍କ ମଧ୍ୟରେ ଅଟକଳ ଓ ଅବିଶ୍ୱାସର ଝଡ଼ ଆସିଗଲା। ଅଭିନେତା ନାସିର ଆବ୍ଦୁଲ୍ଲା ଆରମ୍ଭରେ ଫ୍ରି ପ୍ରେସ୍ ଜର୍ନାଲ୍କୁ ଏକ ଇଣ୍ଟରଭ୍ୟୁ ଦେଇଥିଲେ, ଯେଉଁଥିରେ ସେ ଶ୍ରୀଦେବୀଙ୍କ ଆକସ୍ମିକ ମୃତ୍ୟୁକୁ ନେଇ ଖୋଲାମେଳା କଥା କହିଥିଲେ। ନାସିର ଆବ୍ଦୁଲ୍ଲା କହିଥିଲେ ଯେ ସାଧାରଣ ଲୋକଙ୍କୁ ଶ୍ରୀଦେବୀଙ୍କ ମୃତ୍ୟୁ ବିଷୟରେ କେବେ ସ୍ପଷ୍ଟ ଉତ୍ତର ମିଳିନଥିଲା।
Also Read https://purvapaksa.com/why-desert-king-saudi-arabia-imports-sand-for-australia/
