ନୂଆପଡ଼ା ଉପନିର୍ବାଚନ- ଏକ ସାଧାରଣ ନିର୍ବାଚନ ନୁହେଁ ବରଂ ରାଜ୍ୟ ରାଜନୀତିର ନୂଆ ଅଧ୍ୟାୟ ଲେଖିବା ଦିଗରେ ଏହା ଏକ ପରୀକ୍ଷାସ୍ଥଳ। ଗତ କିଛି ସପ୍ତାହ ଧରି ଯେପରି ରାଜନୀତିକ ଗରମ ହୋଇଛି, ଏବେ ତାହା ପହଞ୍ଚିଛି ଶିଖରକୁ। ଆଜିଠୁ ଆରମ୍ଭ ହେଉଛି ନିର୍ବାଚନୀ ପ୍ରଚାରର ଅନ୍ତିମ ପର୍ଯ୍ୟାୟ-ଏକ ସ୍ତବଧତା ଓ ଯୋଶର ମିଶ୍ରିତ ପରିବେଶ। ନୂଆପଡ଼ା ଏବେ ହେଉଛି ରାଜ୍ୟର ସମସ୍ତ ଦଳ ପାଇଁ ରଣକ୍ଷେତ୍ର ଓ ମାନସିକ ଯୁଦ୍ଧର ମଞ୍ଚ।
ରାଜେନ୍ଦ୍ର ଢୋଲକିଆଙ୍କ ମୃତ୍ୟୁ ଓ ନୂଆ ଯୁଦ୍ଧର ଆରମ୍ଭ
ନୂଆପଡ଼ାର ପୂର୍ବତନ ବିଧାୟକ ଏବଂ ରାଜ୍ୟର ପୂର୍ବତନ ମନ୍ତ୍ରୀ ରାଜେନ୍ଦ୍ର ଢୋଲକିଆଙ୍କ ଅକାଳ ମୃତ୍ୟୁ ପରେ ଏହି ଆସନ ଖାଲି ହୋଇଥିଲା। ଏହି ଖାଲି ଆସନ ଏବେ ହୋଇଯାଇଛି ରାଜ୍ୟ ରାଜନୀତିର ମହାସାଗରର ଛୋଟ ହେଲେ ମଧ୍ୟ ଅତ୍ୟନ୍ତ ଗୁରୁତ୍ୱପୂର୍ଣ୍ଣ ତରଙ୍ଗ। ଏଠିରେ ବିଜେପି, ବିଜେଡି ଓ କଂଗ୍ରେସ- ତିନିଟି ଦଳ ମଧ୍ୟରେ ରଣକ୍ଷେତ୍ର ସ୍ପଷ୍ଟ ଭାବେ ଖୋଲିଛି।
ନିର୍ବାଚନୀ ପ୍ରଚାର: ଘୋ ଘୋରୁ ଖାଁ ଖାଁକୁ
ବିଜେଡି ଏହି ଆସନକୁ “ଭାବନାର ଆସନ” ଭାବେ ଦେଖୁଛି, କାରଣ ରାଜେନ୍ଦ୍ର ଢୋଲକିଆ ଦଳର ସିଧାସଳଖ ବିଧାୟକ ଥିଲେ । ଅନ୍ୟପକ୍ଷରେ ବିଜେପି ଏହାକୁ ମୁଖ୍ୟମନ୍ତ୍ରୀ ମୋହନ ମାଝୀଙ୍କ ପାଇଁ “ସ୍ୱାଭିମାନ ଓ ସ୍ୱୀକୃତିର ପରୀକ୍ଷା” ଭାବେ ନେଇଛି। କଂଗ୍ରେସ ପାଇଁ ମଧ୍ୟ ଏହି ଉପନିର୍ବାଚନ ନିଜ ଅସ୍ତିତ୍ୱକୁ ପୁନର୍ଜୀବିତ କରିବା ପାଇଁ ଗୋଟିଏ ସୁଯୋଗ ।
ମାସେ ଧରି ଚାଲୁଥିବା ଆନ୍ତରିକ ଆଲୋଚନା, ମୁଖ୍ୟାଳୟ ରଣନୀତି ଏବଂ ସାମାଜିକ ମାଧ୍ୟମ ଯୁଦ୍ଧ ଏବେ ଘରକୁ ଘର ହେବ। ଏବେ ଆଉ ନେତାମାନେ ମଞ୍ଚରେ ନୁହେଁ- ଗାଁ ଗାଁରେ ଦେଖାଯିବେ କର୍ମୀମାନେ, ଗୋଟିଏ ଅଭିଯାନୀ ସେନା ଭଳି ଭୋଟ ମାଗିବେ।
ପ୍ରକୃତରେ ଏହା ହେଉଛି ସେହି ସମୟ ଯେଉଁଥିରେ ଭୋଟ ଓ ଭାବନା ମିଶି ଯାଏ। ଏବେ ଲୋକମାନେ ଦେଖିବେ- ରାତିରେ ଗାଁ ମଝିରେ ଆସୁଥିବା “ଅନ୍ଧାରୀ ବିଜେ”। ଏହା ହେଉଛି ଓଡ଼ିଶା ରାଜନୀତିର ଅପରିଚିତ କିନ୍ତୁ ସବୁଠୁ ପରିଚିତ ଅଂଶ- ଅର୍ଥ ଓ ମଦର ଖେଳ। ପୋଲିସ ସଚେତନ ହେଲେ ମଧ୍ୟ ଯେପରି “ଜବତ ହେଲା ବୋଲି ଖବର ଆସେ”, ତାହା ଗୋଟିଏ ନାଟକ ଭଳି ଲାଗେ। ଅର୍ଥ ନୁହେଁ, କେବଳ କିଛି ବୋଟଲ ମଦ ଜବତ ହେଲା- ଏଇ ହେଉଛି ପ୍ରତ୍ୟେକ ଉପନିର୍ବାଚନର ସାଧାରଣ ଦୃଶ୍ୟ।
ନୂଆପଡ଼ା- ତିନିଟି ଦଳ, ତିନି ପରିଣାମ
ବିଜେପି ପାଇଁ ପରୀକ୍ଷା
ମୁଖ୍ୟମନ୍ତ୍ରୀ ମୋହନ ମାଝୀଙ୍କ ପାଇଁ ଏହା ହେଉଛି ଜନମତର ପ୍ରଥମ ମୁହାଁମୁହିଁ ପରୀକ୍ଷା। ଲୋକମାନେ ତାଙ୍କୁ “ଲୋକଙ୍କ ମୁଖ୍ୟମନ୍ତ୍ରୀ” ଭାବେ କେତେ ଗ୍ରହଣ କରିଛନ୍ତି, ଏହି ଫଳାଫଳରୁ ତାହା ନିର୍ଣ୍ଣୟ ହେବ। ନୂଆ ଶାସନ ଓ ନୂଆ ମୁହଁ, ଲୋକଙ୍କ ମନରେ କେତେ ଜାଗା କରିପାରିଛି- ଏହି ଉପନିର୍ବାଚନ ତାହା ଜଣାଇବ।
ବିଜେଡି ପାଇଁ ସମ୍ମାନର ପ୍ରଶ୍ନ
ନବୀନ ପଟ୍ଟନାୟକ ପାଇଁ ଏହା ହେଉଛି ଇଜ୍ଜତର ଲଢ଼େଇ। ୨୪ ବର୍ଷ ଧରି ଶାସନ କରିଥିବା ଏକ ନେତାଙ୍କ ପ୍ରତି ଲୋକଙ୍କ ସ୍ନେହ ଏବେ ବି ଅଛି କି? ନବୀନଙ୍କ ନିରବ କିନ୍ତୁ ଗଭୀର ପ୍ରଭାବ ଏବେ ବି ରାଜନୀତିରେ ଜୀବନ୍ତ କି? ଏହା ଜଣାଯିବ ନୂଆପଡ଼ାର ଭୋଟବାକ୍ସରୁ।
କଂଗ୍ରେସ ପାଇଁ ଅସ୍ତିତ୍ୱର ଯୁଦ୍ଧ
ଭକ୍ତ ଦାସଙ୍କ ପାଇଁ ଏହି ଉପନିର୍ବାଚନ ହେଉଛି ରାଜ୍ୟରେ ଦଳକୁ ପୁନର୍ଜୀବନ ଦେବାର ସୁଯୋଗ। ଯଦି ଏଠି ଭଲ ଫଳ ମିଳେ, ତେବେ ଆଗାମୀ ଦିନରେ କଂଗ୍ରେସ ଆଉଥରେ ନିଜ ରଣନୀତିକୁ ଗଢ଼ିବାରେ ସକ୍ଷମ ହେବ।
‘ଅନ୍ଧାରୀ ବିଜେ’: ରାତିରେ ରାଜନୀତି
ନିର୍ବାଚନୀ ଭାଷାରେ “ଅନ୍ଧାରୀ ବିଜେ” ଅର୍ଥ ହେଉଛି ରାତିରେ ଟଙ୍କା ବଣ୍ଟା- ଭୋଟ ଅଭିଯାନର ଅନ୍ତିମ ଓ ଅଦୃଶ୍ୟ ଅଧ୍ୟାୟ। ଯେତେବେଳେ ଆଲୋକ ଲିଭିଯାଏ, ସେତେବେଳେ ରାଜନୀତିକ ମଞ୍ଚର ପରଦା ପଛରେ ଚାଲେ ଗୋଟିଏ ଅନ୍ୟ ନାଟକ।
ଅନେକ ଗାଁରେ ଲୋକମାନେ କହନ୍ତି- “ଭୋଟ ରାତିରେ ଦିଆଯାଏ, ସକାଳେ ମିଳିଥାଏ।” ଏହି ସଂସ୍କୃତି ଦୀର୍ଘ ଦିନରୁ ରାଜନୀତିରେ ଥିଲା ଏବଂ ଏବେ ମଧ୍ୟ ହାରିଯାଇନି। ପୋଲିସ ଓ ପ୍ରଶାସନ ସତର୍କ ରହିଲେ ମଧ୍ୟ “ଭିତରେ” ଯାହା ହୁଏ ତାହାକୁ ଆଇନ ଧରିପାରେ ନାହିଁ।
ବିଭିଷଣ ଫାକ୍ଟର: ଦଳର ଭିତରେ ଭୟ
ପ୍ରତ୍ୟେକ ନିର୍ବାଚନରେ ଥାଆନ୍ତି କିଛି “ବିଭିଷଣ”- ଯେମାନେ ନିଜ ଦଳର ଭିତରୁ ଦଳକୁ କମଜୋର କରନ୍ତି। ନୂଆପଡ଼ାରେ ମଧ୍ୟ ସେହି ଭୟ ଦେଖାଦେଇଛି। ଦଳୀୟ ମନୋଭାବକୁ ଏକତାରେ ରଖିବା- ଏହି ସମୟର ସବୁଠୁ ବଡ଼ ଚ୍ୟାଲେଞ୍ଜ। ନେତାମାନେ ବୁଝୁଛନ୍ତି ଯେ ଯଦି ବିଭିଷଣମାନେ ଅସନ୍ତୁଷ୍ଟ ହେବେ, ତେବେ ସେମାନେ ଚେର କାଟିଦେବେ ଏବଂ ହାର ଅନିବାର୍ଯ୍ୟ ହେବ।
ତେଣୁ ଏବେ ସମସ୍ତ ଦଳର ଲକ୍ଷ୍ୟ- “ବିଭିଷଣକୁ ଖୁସି ରଖିବା ” । ଦଳର ଭିତରେ ନିଜ ଭକ୍ତମାନଙ୍କ ଶିବିରକୁ ସୁସ୍ଥ ରଖିବା, ଟିକେଟ୍ ନ ମିଳିଥିବା ନେତାଙ୍କୁ ମନୋଭାବୀ ଦେଇ ଶାନ୍ତ କରିବା- ଏହି ହେଉଛି ଏବେର ନୀତି।
ମଞ୍ଚରେ ନେତା,ମଇଦାନରେ କର୍ମୀ
ପ୍ରଚାର ଅଭିଯାନର ଏହି ପର୍ଯ୍ୟାୟରେ ନେତାମାନେ ଆସିଥିବା ଦେଖିଲେ ମଧ୍ୟ, ମୁଖ୍ୟ ଦାୟିତ୍ୱ ଏବେ ହାତରେ ନେଇଛନ୍ତି ସ୍ଥାନୀୟ କର୍ମୀମାନେ। ଦିନରେ ପଦଯାତ୍ରା, ରାତିରେ ଘରେ ଘରେ ଯାଇ ସମ୍ପର୍କ ସାଧିବା- ଏହି ହେଉଛି ନିର୍ବାଚନୀ ସେନାର ଦୈନିକ ଯୁଦ୍ଧ। ନେତା ଫେରିଯାଉଛନ୍ତି, କିନ୍ତୁ କର୍ମୀ ରହିଯାଇଛନ୍ତି ମଇଦାନରେ।
ଜନମନର ଭୋଟ, ଅନ୍ଧାରୀର ମୂଲ୍ୟାଙ୍କନ
ଏହି ଉପନିର୍ବାଚନ ଫଳାଫଳ ଯେଉଁ ଦିଗରେ ଯାଉ ଏକ କଥା ସ୍ପଷ୍ଟ- ନୂଆପଡ଼ା ଆଜି ଓଡ଼ିଶା ରାଜନୀତିର ନାଭିକେନ୍ଦ୍ର । ଏଠାରେ ମିଳୁଥିବା ମନଦଶା ଓ ଲୋକଙ୍କ ମନୋଭାବ ଆଗାମୀ ରାଜ୍ୟ ରାଜନୀତିକ ପରିପ୍ରେକ୍ଷାକୁ ନିର୍ଣ୍ଣୟ କରିପାରେ । ଅନ୍ଧାରୀ ବିଜେ ଯେତେ ହେଉ, ଶେଷ ଶବ୍ଦ ଦେବେ ଲୋକମାନେ- ଯେଉଁମାନେ ଗୋପନ କୋଠରୀରେ ଭୋଟ ଦେଇ ଗଢ଼ନ୍ତି ରାଜନୀତିର ଆଗାମୀ ଆକାର।
also read https://purvapaksa.com/dabur-india-and-patanjali-ayurveda-case-in-court/
Dabur India and Patanjali Ayurveda case in court ।। ଡାବର ଇଣ୍ଡିଆ ଏବଂ ପତଞ୍ଜଳି ଆୟୁର୍ବେଦ ମାମଲା କୋର୍ଟରେ
