Similipal : ଦୀର୍ଘ ଦଶନ୍ଧିର ପ୍ରତୀକ୍ଷା ପରେ ଗୁରୁବାର ଦିନ ଓଡ଼ିଶା ସରକାରଙ୍କ ଦ୍ଵାରା ଆନୁଷ୍ଠାନିକ ଘୋଷଣା ପରେ ଶିମିଳିପାଳକୁ ଆନୁଷ୍ଠାନିକଭାବେ ଜାତୀୟ ଉଦ୍ୟାନଭାବେ ମାନ୍ୟତା ମିଳିଛି। ଉଭୟ ଶିମିଳିପାଳ ଦକ୍ଷିଣ ଓ ଉତ୍ତର ଡିଭିଜନର ୧୧ଟି ରେଞ୍ଜରେ ୮୪୫.୭୦ ବର୍ଗ କିଲୋମିଟର ପରିବ୍ୟାପ୍ତ ଏହି ଅଞ୍ଚଳ ଏବେ ଜାତୀୟ ଉଦ୍ୟାନ ଭାବେ ମାନ୍ୟତା ପାଇଛି ଏବଂ ଭିତରକନିକା ପରେ ଏହା ରାଜ୍ୟର ଦ୍ୱିତୀୟ ଜାତୀୟ କୀର୍ତ୍ତି।
ଶିମିଳିପାଳ ଏବେ ଭାରତର ୧୦୭ତମ ଜାତୀୟ ଉଦ୍ୟାନ ଓ ଓଡ଼ିଶାର ସର୍ବବୃହତ୍ ଉଦ୍ୟାନ ବୋଲି ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ଘୋଷଣା କରିଛନ୍ତି। ଏହି ଘୋଷଣାନାମାକୁ ସଂରକ୍ଷଣ ପ୍ରୟାସ ପାଇଁ ଏକ ଗୁରୁତ୍ୱପୂର୍ଣ୍ଣ ଅଗ୍ରଗତି ଏବଂ ‘ବିକଶିତ ଭାରତ ଏବଂ ବିକଶିତ ଓଡ଼ିଶା’ର ଉଦ୍ଦେଶ୍ୟ ହାସଲ ଦିଗରେ ଏକ ପଦକ୍ଷେପ ବୋଲି ବର୍ଣ୍ଣନା କରି ସେ ପରିବେଶ ସଂରକ୍ଷଣ, ଆଦିବାସୀ କଲ୍ୟାଣ ଏବଂ ନିରନ୍ତର ବିକାଶ ପାଇଁ ଏହାର ଗୁରୁତ୍ୱ ଉପରେ ଗୁରୁତ୍ୱ ଆରୋପ କରିଥିଲେ।
ପିସିସିଏଫ୍ (ବନ୍ୟପ୍ରାଣୀ) ତଥା ମୁଖ୍ୟ ବନ୍ୟପ୍ରାଣୀ ୱାର୍ଡେନ୍ ପ୍ରେମ କୁମାର ଝା କହିଛନ୍ତି ଯେ ଶିମିଳିପାଳକୁ ଜାତୀୟ ଉଦ୍ୟାନର ମାନ୍ୟତା ଦେବା ଓଡ଼ିଶାର ସଂରକ୍ଷଣ ଇତିହାସରେ ଏକ ଗୁରୁତ୍ୱପୂର୍ଣ୍ଣ ସଫଳତା। ଦୀର୍ଘ ଦିନଧରି ଚାଲିଆସୁଥିବା ଏହି ପ୍ରସ୍ତାବ ୧୯୮୦ ମସିହାରୁ ଆରମ୍ଭ ହୋଇ ଏବେ କାର୍ଯ୍ୟକାରୀ ହୋଇଛି, ଯାହା ଜଙ୍ଗଲ ଓ ବନ୍ୟପ୍ରାଣୀ ସଂରକ୍ଷଣ କ୍ଷେତ୍ରରେ ରାଜ୍ୟର ପ୍ରୟାସକୁ ବହୁ ମାତ୍ରାରେ ସୁଦୃଢ଼ କରିବ।
ଜଙ୍ଗଲ, ପରିବେଶ ଓ ଜଳବାୟୁ ପରିବର୍ତ୍ତନ ବିଭାଗ (ଏଫ୍ଇଆଣ୍ଡସିସି) ବିଭାଗର ବିଜ୍ଞପ୍ତି ଅନୁଯାୟୀ, ଶିମିଳିପାଳ ଜାତୀୟ ଉଦ୍ୟାନର ୮୪୫.୭୦ ବର୍ଗ କିଲୋମିଟର ମଧ୍ୟରେ ଶିମିଳିପାଳ ଦକ୍ଷିଣ ଡିଭିଜନର ପିଠାବଟା ଉତ୍ତର, ପିଠାବଟା ଦକ୍ଷିଣ, ନୱାନା, ଜେନାବିଲ, ଉପର ବରାହକାମୁଡ଼ା, ଜାତୀୟ ଉଦ୍ୟାନ ଏବଂ ଭଞ୍ଜବସା ରେଞ୍ଜ ସହିତ ଶିମିଳିପାଳ ଉତ୍ତର ଡିଭିଜନର ବରେହିପାଣି, ଚହଲା, ନୱାନା ଉତ୍ତର ଓ ତାଳବନ୍ଧ ରେଞ୍ଜ ଅନ୍ତର୍ଭୁକ୍ତ। ରାଜ୍ୟର ସର୍ବବୃହତ ବ୍ୟାଘ୍ର ଅଭୟାରଣ୍ୟଭାବେ ସ୍ୱୀକୃତିପ୍ରାପ୍ତ ଶିମିଳିପାଳରେ ୫୫ ପ୍ରଜାତିର ସ୍ତନ୍ୟପାୟୀ ପ୍ରାଣୀ, ୩୬୧ ପ୍ରଜାତିର ପକ୍ଷୀ, ୬୨ ପ୍ରଜାତିର ସରୀସୃପ ଓ ୨୧ ପ୍ରଜାତିର ଆମ୍ଫିବିୟନ ରହିଛନ୍ତି।
ଏହି ଅଭୟାରଣ୍ୟ ୨୭୫୦ ବର୍ଗ କିଲୋମିଟର ପରିବ୍ୟାପ୍ତ ହୋଇଥିବାବେଳେ ପ୍ରାୟ ୨,୩୦୬ ବର୍ଗ କିଲୋମିଟର ଶିମିଳିପାଳ ବନ୍ୟପ୍ରାଣୀ ଅଭୟାରଣ୍ୟ ଭାବରେ ମନୋନୀତ ହୋଇଛି।
୨୦୦୭ମସିହାରେ ରାଜ୍ୟ ସରକାର ଶିମିଳିପାଳ ବ୍ୟାଘ୍ର ଅଭୟାରଣ୍ୟର ୧୧୯୪.୭୫ ବର୍ଗ କିଲୋମିଟର ଅଞ୍ଚଳକୁ ମୁଖ୍ୟ ଗୁରୁତ୍ୱପୂର୍ଣ୍ଣ ବାଘ ଆବାସସ୍ଥଳୀ ଭାବେ ଚିହ୍ନଟ କରିଥିଲେ। କେନ୍ଦ୍ରର ମାନଦଣ୍ଡ ଅନୁଯାୟୀ, ଜାତୀୟ ଉଦ୍ୟାନ ଭାବରେ ମନୋନୀତ ଅଞ୍ଚଳ ସମ୍ପୂର୍ଣ୍ଣ ଭାବେ ଅଛୁଆଁ ଏବଂ ମାନବ ବସତି ଏବଂ ଗୃହପାଳିତ ପଶୁଙ୍କ ଉପସ୍ଥିତିରୁ ବଞ୍ଚିତ ହେବା ଆବଶ୍ୟକ।
ଏହି କ୍ରମରେ ଜଙ୍ଗଲ ବିଭାଗ ଆନୁଷ୍ଠାନିକ ଭାବରେ ଶିମିଳିପାଳ ଦକ୍ଷିଣ ଡିଭିଜନରେ ଅବସ୍ଥିତ ୮୪୫.୭୦ ବର୍ଗ କିଲୋମିଟର ଅଞ୍ଚଳକୁ ଜାତୀୟ ଉଦ୍ୟାନ ଭାବରେ ମନୋନୀତ କରିଛି। ଶିମିଳିପାଳର ମୂଳ ଅଞ୍ଚଳ, ଯେଉଁଥିରେ ଯମୁନାଗଡ଼ା, କବାଟଘାଇ, ବକୁଆ, ବରାହକାମୁଡ଼ା ଏବଂ ବାହାଘର ଆଦି ୬ଟି ଗାଁ ରହିଛି, ଅନେକ ବର୍ଷ ଧରି ଜାତୀୟ ଉଦ୍ୟାନ ପ୍ରତିଷ୍ଠା ପାଇଁ ଗୁରୁତ୍ୱପୂର୍ଣ୍ଣ ଆହ୍ୱାନ ସୃଷ୍ଟି କରିଛି।
ଯଦିଓ ସରକାର ଜେନାବିଲ, କବାଟଘାଇ, ବାରହାକୁଡା ଓ ବାହାଘର ଗ୍ରାମକୁ ସଫଳତାର ସହ ସ୍ଥାନାନ୍ତର କରିଛନ୍ତି, ତଥାପି ପ୍ରାୟ ୬୧ଟି ପରିବାର ବକୁଆରେ ବସବାସ କରୁଛନ୍ତି । ଫଳରେ ୮୪୫ ବର୍ଗ କିଲୋମିଟର ନିର୍ଦ୍ଧାରିତ ଜାତୀୟ ଉଦ୍ୟାନ ଅଞ୍ଚଳରୁ ବକୁଆକୁ ବାଦ୍ ଦିଆଯାଇଛି।
ଗତବର୍ଷ ମୟୂରଭଞ୍ଜ ଜିଲ୍ଲା ପ୍ରଶାସନ ପକ୍ଷରୁ ଧାର୍ଯ୍ୟ ହୋଇଥିବା ବାଧ୍ୟତାମୂଳକ ୬୦ ଦିନିଆ ଘୋଷଣା ଅବଧି ଶେଷ ହେବା ପରେ ବିଭାଗ ପକ୍ଷରୁ ଏହି ବିଜ୍ଞପ୍ତି ପ୍ରକାଶ ପାଇଛି। ଏସଟିଆର ଦକ୍ଷିଣର ଉପନିର୍ଦ୍ଦେଶକ ସମ୍ରାଟ୍ ଗୌଡ଼ା କହିଛନ୍ତି ଯେ ଜାତୀୟ ଉଦ୍ୟାନର ମାନ୍ୟତା ହାସଲ କରିବା ଶିମିଳିପାଳ ପାଇଁ ଏକ ଗୁରୁତ୍ୱପୂର୍ଣ୍ଣ ସ୍ୱୀକୃତି।
ଏହା କେବଳ ନିୟମକୁ ଅଧିକ ପ୍ରଭାବଶାଳୀ ଭାବରେ କାର୍ଯ୍ୟକାରୀ କରିବାକୁ ଆମକୁ ସଶକ୍ତ କରେ ନାହିଁ ବରଂ ବାଘ ଆବାସସ୍ଥଳୀ ମଧ୍ୟରେ ସୁରକ୍ଷା ବ୍ୟବସ୍ଥା ବୃଦ୍ଧି କରିବା ପାଇଁ ଅତିରିକ୍ତ ପାଣ୍ଠି ଅଧିଗ୍ରହଣକୁ ମଧ୍ୟ ସହଜ କରେ ବୋଲି ସେ କହିଛନ୍ତି।
ବର୍ତ୍ତମାନ ସୁଦ୍ଧା ଭିତରକନିକା ରାଜ୍ୟର ଏକମାତ୍ର ଜାତୀୟ ଉଦ୍ୟାନ ଥିଲା, ଯାହା ୧୯୭୫ ମସିହାରେ ବନ୍ୟପ୍ରାଣୀ ଅଭୟାରଣ୍ୟ ଭାବରେ ପ୍ରତିଷ୍ଠିତ ହୋଇଥିଲା ଏବଂ ୧୯୯୮ ମସିହାରେ ଏହାକୁ ଜାତୀୟ ଉଦ୍ୟାନ ଭାବରେ ମାନ୍ୟତା ଦିଆଯାଇଥିଲା।
ALSO READ: https://purvapaksa.com/errors-in-opsc-exam-question-paper-is-this-conceivable/
