Pahalgam : ବହୁ ଚର୍ଚ୍ଚିତ ପର୍ଯ୍ୟଟନସ୍ଥଳୀ ପହଲଗାମ ଏକ ଭୂତ ସହର ପରି ଦେଖାଯାଉଛି, ଯେଉଁଠାରେ କେବଳ ସୁରକ୍ଷା ବାହିନୀର ଗମନାଗମନ ଏବଂ ବେଳେବେଳେ ଘରୋଇ ଗାଡି ଏବଂ କ୍ୟାବ୍ ଚଳାଚଳ କରୁଛି।

ପର୍ଯ୍ୟଟକ ଓ ପର୍ଯ୍ୟଟନ ସମ୍ବନ୍ଧୀୟ କାର୍ଯ୍ୟକଳାପରେ ବ୍ୟସ୍ତ ଥିବା ଜମ୍ମୁ-କାଶ୍ମୀରର ପ୍ରିୟ ପହଲଗାମ୍ ପର୍ଯ୍ୟଟନ ରିସର୍ଟରେ ମଙ୍ଗଳବାର ହୋଇଥିବା ଆତଙ୍କବାଦୀ ଆକ୍ରମଣରେ ଜଣେ ସ୍ଥାନୀୟ ବ୍ୟକ୍ତିଙ୍କ ସମେତ ଅତି କମରେ ୨୬ ଜଣଙ୍କ ମୃତ୍ୟୁ ଘଟିବା ପରେ ଏବେ ସେଠାରେ ଜନଶୂନ୍ୟ ପରିବେଶ ଦେଖିବାକୁ ମିଳିଛି। ପର୍ଯ୍ୟଟକଙ୍କ ପ୍ରବଳ ଭିଡ଼କୁ ଦୃଷ୍ଟିରେ ରଖି ମଧ୍ୟାହ୍ନ ଭୋଜନ କିମ୍ବା ରାତ୍ରୀ ଭୋଜନ କରିବାକୁ ସମୟ ନଥିବା ହୋଟେଲ ବ୍ୟବସାୟୀ ଓ ଢାବାବାଲାମାନେ ଏବେ ଅନ୍ଧାର ଭବିଷ୍ୟତକୁ ଚାହିଁ ବସିଛନ୍ତି।

ବହୁ ଚର୍ଚ୍ଚିତ ପର୍ଯ୍ୟଟନସ୍ଥଳୀ ପହଲଗାମ୍ ଗୁରୁବାର ଏକ ଭୂତ ସହର ପରି ଦେଖାଯାଉଥିଲା, ଯେଉଁଠାରେ କେବଳ ସୁରକ୍ଷା ବାହିନୀର ଗମନାଗମନ ଏବଂ ବେଳେବେଳେ ଘରୋଇ ଯାନବାହନ ଏବଂ କ୍ୟାବ୍ ଚଳାଚଳ କରୁଥିଲା। ପର୍ଯ୍ୟଟକଙ୍କ ଗହଳିରେ ପରିପୂର୍ଣ୍ଣ ରହୁଥିବା ସମସ୍ତ ଦୋକାନ ଓ ରେସ୍ତୋରାଁ ବନ୍ଦ ରହିଥିଲା।

ପହଲଗାମର ଡାଲ ରୋଟି ରେଷ୍ଟୁରାଣ୍ଟ ଦୋକାନର ମାଲିକ ସବଜର ଅହମ୍ମଦ କହିଛନ୍ତି ଯେ ଆଖପାଖରେ କୌଣସି ପର୍ଯ୍ୟଟକ ନଥିବାରୁ ସେମାନେ ବୁଧବାର ଠାରୁ ଭୋଜନାଳୟ ଖୋଲିନାହାନ୍ତି। “ପହଲଗାମରୁ ସମସ୍ତ ପର୍ଯ୍ୟଟକ ଚାଲିଯାଇଛନ୍ତି ଏବଂ ଆଖପାଖରେ କିଛି ଥିଲେ ମଧ୍ୟ ସେମାନେ ହୋଟେଲରେ ରହୁଛନ୍ତି ଏବଂ ବାହାରକୁ ବାହାରୁନାହାନ୍ତି,” ସେ କହିଛନ୍ତି। ହୋଟେଲ ଓ ଲଜର କିଛି ମାଲିକ କହିଛନ୍ତି ଯେ ଦୀର୍ଘ ଦିନକକୁ ଦୃଷ୍ଟିରେ ରଖି ସେମାନେ ସେମାନଙ୍କ କର୍ମଚାରୀଙ୍କୁ ହ୍ରାସ କରିଛନ୍ତି।

ସବଜର କହିଛନ୍ତି ଯେ ଆତଙ୍କବାଦୀ ଆକ୍ରମଣ ପରେ ପହଲଗାମର ହୋଟେଲ ବ୍ୟବସାୟୀ ଏବଂ ଭୋଜନାଳୟ ଦୋକାନ ପର୍ଯ୍ୟଟକମାନଙ୍କୁ ରିହାତି ପ୍ରଦାନ କରିଥିଲେ। ଆତଙ୍କବାଦୀ ଆକ୍ରମଣ ପରେ ସ୍ଥିତି ସମ୍ପୂର୍ଣ୍ଣ ବଦଳିଯାଇଛି। ଏହି ସ୍ଥାନ (ପହଲଗାମ) ଗହଳିରେ ଫାଟି ପଡୁଥିଲା। ସବୁ ବେଳେ ଏହା ପର୍ଯ୍ୟଟକଙ୍କ ଗହଳିରେ ରହୁଥିଲା, କିନ୍ତୁ ଏବେ ଏହା ଜନଶୂନ୍ୟ ହୋଇପଡ଼ିଛି।

ମଙ୍ଗଳବାର ପର୍ଯ୍ୟନ୍ତ ପହଲଗାମର ହୋଟେଲ ବ୍ୟବସାୟୀ, ଢାବାୱାଲା ଏବଂ ଭୋଜନ ଦୋକାନମାଲିକ ଓ କର୍ମଚାରୀମାନେ ପର୍ଯ୍ୟଟକଙ୍କ କ୍ରମାଗତ ଭିଡ଼ ଯୋଗୁଁ ନିଜ ପାଇଁ ଜଳଖିଆ, ମଧ୍ୟାହ୍ନ ଭୋଜନ କିମ୍ବା ରାତ୍ରୀ ଭୋଜନ ନେବାକୁ ସମୟ ପାଇନଥିଲେ। ଭିଡ଼ ଯୋଗୁଁ ଟେବୁଲ ବୁକିଂ ହେଉଥିଲା ଏବଂ ପର୍ଯ୍ୟଟକଙ୍କୁ ସେମାନଙ୍କ ପାଳିକୁ ଅପେକ୍ଷା କରିବାକୁ ପଡୁଥିଲା, କିନ୍ତୁ ବର୍ତ୍ତମାନ ଏହା ଖାଲି ପଡିଛି ଏବଂ ହୋଟେଲ ବ୍ୟବସାୟୀ, ଭୋଜନାଳୟ ମାଲିକ, ପୋନିୱାଲା ଏବଂ ଶ୍ରମିକଙ୍କ ସମେତ ସମସ୍ତ ପର୍ଯ୍ୟଟନ ଅଂଶୀଦାର ଅନ୍ଧାର ଭବିଷ୍ୟତକୁ ଦେଖୁଛନ୍ତି ବୋଲି ସବଜର କହିଛନ୍ତି।

ଅନ୍ୟ ଜଣେ ହୋଟେଲ ବ୍ୟବସାୟୀ ଉମର ଅହମ୍ମଦ କହିଛନ୍ତି ଯେ ଭୟରେ ପର୍ଯ୍ୟଟକମାନେ ପହଲଗାମ ଛାଡି ଯାଇଥିବାରୁ ଏବଂ କୌଣସି ନୂଆ ପର୍ଯ୍ୟଟକ ଆସୁନଥିବାରୁ ପର୍ଯ୍ୟଟନ ଋତୁ ପ୍ରାୟ ଶେଷ ହୋଇଯାଇଛି। ମିନି ସୁଇଜରଲ୍ୟାଣ୍ଡ ଭାବେ ପରିଚିତ ବୈସରଣ ଘାଟିରେ ଆତଙ୍କବାଦୀ ଆକ୍ରମଣ ପରେ ଉପତ୍ୟକାରେ ପର୍ଯ୍ୟଟକଙ୍କ ମଧ୍ୟରେ ଭୟ ଖେଳିଯାଇଛି। ଉମର କହିଛନ୍ତି, ଶ୍ରୀନଗର ବିମାନ ବନ୍ଦରରେ ଉପତ୍ୟକା ଛାଡ଼ିବା ପାଇଁ ପର୍ଯ୍ୟଟକଙ୍କ ଭିଡ଼ ଜମିଥିଲା।

ଟ୍ରାଭେଲ ଅପରେଟର ସଜାଦ ଅହମ୍ମଦ କହିଛନ୍ତି, ମଙ୍ଗଳବାର ଆତଙ୍କବାଦୀ ଆକ୍ରମଣ ପରେ ସମସ୍ତ ବୁକିଂ ବାତିଲ କରାଯାଇଛି। ଏବେ ପର୍ଯ୍ୟଟନ ଋତୁ ଶେଷ ହୋଇଛି। ସେ ଆହୁରି ମଧ୍ୟ କହିଛନ୍ତି, ପହଲଗାମ୍ ହେଉଛି ସବୁଠାରୁ ଆକର୍ଷଣୀୟ ପର୍ଯ୍ୟଟନସ୍ଥଳୀ ଏବଂ ସମସ୍ତେ ସେହି ମନୋରମ ସ୍ଥାନ ଏବଂ ବୈସରଣ ଘାସଭୂମି ବୁଲିବାକୁ ଚାହୁଁଥିଲେ, ଯେଉଁଠାରେ ଆକ୍ରମଣ ହୋଇଥିଲା।

ଯେଉଁ ଗରିବ ଦିନ ମଜୁରିଆମାନେ ଘୋଡ଼ା ଚଢ଼ି ବା କଶ୍ମୀରୀ ହସ୍ତଶିଳ୍ପ ଓ ଶାଲ ବିକ୍ରି କରି ଜୀବିକା ନିର୍ବାହ କରୁଛନ୍ତି, ସେମାନଙ୍କ ପାଇଁ ଏହି ଦୁଃଖଦ ଘଟଣା ସେମାନଙ୍କ ଜୀବିକାକୁ ନେଇ ଅନିଶ୍ଚିତତାର ବାଦଲ ସୃଷ୍ଟି କରିଛି। ଗତ କିଛି ବର୍ଷ ମଧ୍ୟରେ କଶ୍ମୀରରେ ପର୍ଯ୍ୟଟକଙ୍କ ଆଗମନ ବୃଦ୍ଧି ପାଇଛି। ୩ ହଜାର ବିଦେଶୀ ପର୍ଯ୍ୟଟକଙ୍କ ସମେତ ୮.୨୫ ଲକ୍ଷ ଲୋକ ଏସିଆର ସର୍ବବୃହତ ଟ୍ୟୁଲିପ୍ ବଗିଚା ବୁଲି ଦେଖିଥିଲେ।

ସଜାଦ କହିଛନ୍ତି ଯେ ଏହି ଆତଙ୍କବାଦୀ ଆକ୍ରମଣ ଉପତ୍ୟକାର ପର୍ଯ୍ୟଟନ ଶିଳ୍ପକୁ ଏକ ମରଣାନ୍ତକ ଝଟକା ଦେଇଛି। ଦେଶର ବିଭିନ୍ନ ପ୍ରାନ୍ତରୁ ଆସିଥିବା ଲୋକଙ୍କ ବିଶ୍ୱାସ ହାସଲ କରିବାକୁ କିଛି ସମୟ ଲାଗିପାରେ, ଯାହାଦ୍ୱାରା ସେମାନେ ପୁଣି ଥରେ କାଶ୍ମୀର ଆଡକୁ ମୁହାଁଇପାରିବେ । ଏହି ସମୟରେ ପର୍ଯ୍ୟଟକମାନେ ନିଜ ସୁରକ୍ଷାକୁ ନେଇ ଚିନ୍ତିତ ହୋଇ ସେଠାରୁ ଚାଲିଯାଉଛନ୍ତି। ସରକାରଙ୍କ ପ୍ରୟାସ ରେ ପର୍ଯ୍ୟଟକମାନେ କାଶ୍ମୀର ଫେରିବେ ବୋଲି ଆମେ ଆଶା କରୁଛୁ ବୋଲି ଟ୍ରାଭେଲ ଅପରେଟର କହିଛନ୍ତି।

Also read: https://purvapaksa.com/indus-basin-rivers-backbone-of-pakistan-gdp-key-to-maintain-food-security/

ପାକିସ୍ତାନର କଣ କ୍ଷତି କରିବ ସିନ୍ଧୁ ଜଳ ଚୁକ୍ତି ସ୍ଥଗିତ? ଜିଡିପିର ମେରୁଦଣ୍ଡ ସିନ୍ଧୁ ଅବବାହିକା ନଦୀ