ବମ୍ବେ(ମୁମ୍ବାଇ) ହାଇକୋର୍ଟ ସୋମବାର ଦିନ ୨୦୦୬ ମୁମ୍ବାଇ ଟ୍ରେନ୍ ବୋମା ବିସ୍ଫୋରଣରେ ଜଡ଼ିତ ସମସ୍ତ ୧୨ ଜଣ ଅଭିଯୁକ୍ତଙ୍କୁ ନିର୍ଦ୍ଦୋଷରେ ଖଲାସ କରିଛନ୍ତି, ଯେଉଁ ଘଟଣାରେ ୧୮୯ ଜଣ ଲୋକ ପ୍ରାଣ ହରାଇଥିଲେ ଏବଂ ୮୦୦ ରୁ ଅଧିକ ଲୋକ ଆହତ ହୋଇଥିଲେ। ୧୨ ଜଣ ଅଭିଯୁକ୍ତଙ୍କ ମଧ୍ୟରୁ ପାଞ୍ଚ ଜଣ ମୃତ୍ୟୁଦଣ୍ଡ ଅପେକ୍ଷାରେ ଥିଲେ। ଘଟଣାର ପ୍ରାୟ ଦୁଇ ଦଶନ୍ଧି ପରେ ଏହି ନିର୍ଦ୍ଦେଶ ଆସିଛି।
ବିଚାରପତି ଅନିଲ କିଲୋର ଏବଂ ବିଚାରପତି ଏସ୍. ଚନ୍ଦକଙ୍କ ଖଣ୍ଡପୀଠ ଏହି ଐତିହାସିକ ରାୟ ଦେଇ କହିଛନ୍ତି ଯେ, “ଯାହାବି ପ୍ରମାଣ ଉପସ୍ଥାପନ କରାଯାଇଥିଲା, ସେଥିରେ କୌଣସି ଦୃଢ଼ ତଥ୍ୟ ନଥିଲା। ପ୍ରମାଣ ବିଶ୍ବାସଯୋଗ୍ୟ ନଥିବାରୁ ସମସ୍ତ ଅଭିଯୁକ୍ତଙ୍କୁ ନିର୍ଦ୍ଦୋଷରେ ଖଲାସ କରାଯାଇଛି।” ୧୨ଜଣକ ମଧ୍ୟରୁ ଜଣକର ମୃତ୍ୟୁ ହୋଇସାରିଥିବା ବେଳେ ଏବେ ୧୧ଜଣ ଜେଲରୁ ମୁକ୍ତ ହେବେ। କୋର୍ଟ ଜାଣିପାରିଲେ ଯେ ଜଣେ ସାକ୍ଷୀ ଘାଟକୋପର ବିସ୍ଫୋରଣ ମାମଲା ସମେତ ଅନେକ ଅସମ୍ପର୍କିତ କ୍ରାଇମ୍ ବ୍ରାଞ୍ଚ ମାମଲାରେ ସାକ୍ଷ୍ୟ ଦେଇଥିଲେ, ଯାହା ତାଙ୍କ ସାକ୍ଷ୍ୟକୁ ‘ଅବିଶ୍ୱସନୀୟ’ କରିଦେଇଥିଲା। ଅନ୍ୟ କେତେକ ବର୍ଷ ପରେ ସେମାନେ ହଠାତ୍ ଅଭିଯୁକ୍ତଙ୍କୁ କିପରି ମନେ ରଖିପାରିଲେ ଏବଂ ଚିହ୍ନଟ କରିପାରିଲେ ତାହା ବ୍ୟାଖ୍ୟା କରିବାରେ ବିଫଳ ହୋଇଥିଲେ।
ବିଚାରପତିମାନେ ପ୍ରକ୍ରିୟାଗତ ତ୍ରୁଟିକୁ ମଧ୍ୟ ଉଲ୍ଲେଖ କରିଛନ୍ତି। ଖଣ୍ଡପୀଠ କହିଛନ୍ତି, “ବିଚାର ପ୍ରକ୍ରିୟା ସମୟରେ କିଛି ସାକ୍ଷୀଙ୍କୁ ପରୀକ୍ଷା ମଧ୍ୟ କରାଯାଇ ନଥିଲା। ଆରଡ଼ିଏକ୍ସ ଏବଂ ଅନ୍ୟାନ୍ୟ ବିସ୍ଫୋରକ ସାମଗ୍ରୀ ପରି ଉଦ୍ଧାର ମାମଲାରେ, ଫରେନସିକ୍ ବିଜ୍ଞାନ ପରୀକ୍ଷାଗାରରେ ପହଞ୍ଚିବା ପର୍ଯ୍ୟନ୍ତ ପ୍ରମାଣ ସତ୍ୟ ବୋଲି ପ୍ରମାଣ କରିପାରି ନଥିଲେ”। “ବିଜ୍ଞତାର ଅବଲମ୍ବନ ନକରି”, ହାଇକୋର୍ଟ ଏହି ସିଦ୍ଧାନ୍ତରେ ପହଞ୍ଚିଛନ୍ତି ଯେ ଅଭିଯୋଗକାରୀ ପକ୍ଷ ଯୁକ୍ତିଯୁକ୍ତ ସନ୍ଦେହ ବାହାରେ ନିଜର ମାମଲା ପ୍ରମାଣ କରିବାରେ “ସମ୍ପୂର୍ଣ୍ଣ ବିଫଳ” ହୋଇଛନ୍ତି। “ଏହା କହିବା କଷ୍ଟକର ଯେ ଅଭିଯୋଗକାରୀ ପକ୍ଷ ତାଙ୍କର ଅଭିଯୋଗ ପ୍ରମାଣ କରିପାରିବେ” ଏବଂ ସ୍ୱତନ୍ତ୍ର ମହାରାଷ୍ଟ୍ର ସଂଗଠିତ ଅପରାଧ ନିୟନ୍ତ୍ରଣ ଆଇନ କୋର୍ଟଙ୍କ ଅକ୍ଟୋବର ୨୦୧୫ ରାୟକୁ ଖାରଜ କରିଛନ୍ତି, ଯେଉଁଥିରେ ପାଞ୍ଚ ଜଣଙ୍କୁ ମୃତ୍ୟୁଦଣ୍ଡ ଏବଂ ସାତ ଜଣଙ୍କୁ ଆଜୀବନ କାରାଦଣ୍ଡ ଦିଆଯାଇଥିଲା।
ମାମଲାରେ ଜଡ଼ିତ ୧୨ ଜଣ ମୂଳ ଦୋଷୀଙ୍କ ମଧ୍ୟରୁ ଜଣେ କମଲ ଅନସାରୀ, ୨୦୨୧ରେ ନାଗପୁର ଜେଲରେ ରହିବା ସମୟରେ କୋଭିଡ-୧୯ରେ ପ୍ରାଣ ହରାଇଥିଲେ। ୧୯ ବର୍ଷ ଜେଲରେ ଦଣ୍ଡ ଭୋଗୁଥିବା ୧୧ ଜଣଙ୍କୁ ବର୍ତ୍ତମାନ ମୁକ୍ତ କରାଯିବାକୁ ସ୍ଥିର ହୋଇଛି। “ଏହି ରାୟ ଭୁଲ ଭାବରେ ଜେଲ ଦଣ୍ଡ ମିଳିଥିବା ଲୋକଙ୍କ ପାଇଁ ଆଶାର କିରଣ ହେବ” ବୋଲି କିଛି ଅଭିଯୁକ୍ତଙ୍କ ପ୍ରତିନିଧିତ୍ୱ କରୁଥିବା ଓକିଲ ଯୁଗ ମୋହିତ ଚୌଧୁରୀ କହିଛନ୍ତି। “ଆମେ ଆମର କର୍ତ୍ତବ୍ୟ କରିଥିଲୁ ଏବଂ ଏହା ଆମର ଦାୟିତ୍ୱ ଥିଲା ” ବୋଲି ଖଣ୍ଡପୀଠ ପ୍ରତିକ୍ରିୟା ଦେଇଛନ୍ତି। ସରକାରୀ ଓକିଲ ରାଜା ଠାକରେ ରାୟକୁ ଗ୍ରହଣ କରି କହିଛନ୍ତି ଯେ ଏହି ନିଷ୍ପତ୍ତି ଭବିଷ୍ୟତର ବିଚାର ପାଇଁ “ପଥଦର୍ଶକ” ଭାବରେ କାର୍ଯ୍ୟ କରିବ।
୨୦୦୬ ମୁମ୍ବାଇ ଟ୍ରେନ୍ ବିସ୍ଫୋରଣ ଭାରତର ସବୁଠାରୁ ଭୟଙ୍କର ଆତଙ୍କବାଦୀ ଆକ୍ରମଣ ମଧ୍ୟରୁ ଗୋଟିଏ, ଯେଉଁଥିରେ ପଶ୍ଚିମ ରେଳ ଲାଇନରେ ଭିଡ଼ ସମୟରେ ପ୍ରଥମ ଶ୍ରେଣୀ କୋଚରେ ସାତଟି ବୋମା ବିସ୍ଫୋରଣ ହୋଇଥିଲା। ୧୧ ଜୁଲାଇ ୨୦୦୬ ସନ୍ଧ୍ୟାରେ, ମୁମ୍ବାଇ ଲୋକାଲ୍ ଟ୍ରେନରେ ମାତ୍ର ୧୧ମିନିଟ୍ ମଧ୍ୟରେ ସାତଟି ଭିନ୍ନ ଭିିନ୍ନ ସ୍ଥାନରେ ବୋମା ବିସ୍ଫୋରଣ ଘଟିଥିଲା। ଏହି ବିସ୍ଫୋରଣରେ ୧୮୯ଜଣ ପ୍ରାଣ ହରାଇଥିଲେ। ଏହା ସହ ୮୨୭ରୁ ଅଧିକ ଯାତ୍ରୀ ଆହତ ହୋଇଥିଲେ। ମାମଲାର ଶୁଣାଣି ଜାନୁଆରି ୨୦୨୫ରେ ସମାପ୍ତ ହୋଇଥିଲା। ସେବେଠାରୁ କୋର୍ଟ ରାୟ ସଂରକ୍ଷିତ ରଖିଥିଲେ। ୟେରୱାଡା, ନାସିକ, ଅମରାବତୀ ଏବଂ ନାଗପୁର ଜେଲରେ ବନ୍ଦୀ ଥିବା ଅଭିଯୁକ୍ତମାନଙ୍କୁ ଭିଡିଓ କନଫରେନ୍ସିଂ ମାଧ୍ୟମରେ କୋର୍ଟରେ ହାଜର କରାଯାଇଥିଲା। ହାଇକୋର୍ଟ କେବଳ ଦୋଷୀଙ୍କ ଆବେଦନକୁ ଗ୍ରହଣ କରିନଥିଲେ, ବରଂ ମୃତ୍ୟୁଦଣ୍ଡ ନିଶ୍ଚିତ କରିବା ପାଇଁ ରାଜ୍ୟ ସରକାରଙ୍କ ଦ୍ୱାରା ଦାଖଲ କରାଯାଇଥିବା ଆବେଦନକୁ ମଧ୍ୟ ଖାରଜ କରିଦେଇଥିଲେ।
Also Readhttps://purvapaksa.com/noida-student-dies-by-suicide-cites-harassment-by-professors/
