National Herald Case: ନ୍ୟାସନାଲ ହେରାଲ୍ଡ ମାମଲାରେ ରାହୁଲ ଗାନ୍ଧୀ ଏବଂ ସୋନିଆ ଗାନ୍ଧୀଙ୍କ ନାମ ସାମ୍ନାକୁ ଆସିଛି। ଇଡି (ଏନଫୋର୍ସମେଣ୍ଟ ଡିରେକ୍ଟୋରେଟ) ଏକ ଚାର୍ଜଶିଟ୍ ଦାଖଲ କରିଛି, ଯେଉଁଥିରେ ସୋନିଆ ଗାନ୍ଧୀ ଏବଂ ରାହୁଲ ଗାନ୍ଧୀଙ୍କୁ ଅଭିଯୁକ୍ତ କରାଯାଇଛି। ଏହି ଚାର୍ଜଶିଟ୍ରେ କଂଗ୍ରେସ ନେତା ସାମ ପିଟ୍ରୋଡା ଏବଂ ରାଜୀବ ଗାନ୍ଧୀ ଫାଉଣ୍ଡେସନର ଟ୍ରଷ୍ଟି ସୁମନ ଦୁବେଙ୍କୁ ମଧ୍ୟ ଅଭିଯୁକ୍ତ କରାଯାଇଛି। ଏହି ମାମଲାର ଶୁଣାଣି ଆସନ୍ତା ୨୫ ଏପ୍ରିଲରେ ହେବ। ଏବେ ପ୍ରଶ୍ନ ଉଠୁଛି ଯେ, ସୋନିଆ ଗାନ୍ଧୀ ଏବଂ ରାହୁଲ ଗାନ୍ଧୀ ଏହି ନ୍ୟାସନାଲ ହେରାଲ୍ଡ ମାମଲାରେ କିପରି ଫସିଲେ?
ନ୍ୟାସନାଲ ହେରାଲ୍ଡ ଖବରକାଗଜର ପ୍ରକାଶନ ଏଜେଏଲ (ଆସୋସିଏଟେଡ ଜର୍ନାଲ୍ସ ଲିମିଟେଡ) ଦ୍ୱାରା କରାଯାଏ। ଏହାର ମାଲିକାନା ହକ ୟଙ୍ଗ ଇଣ୍ଡିଆନ ପ୍ରାଇଭେଟ ଲିମିଟେଡ ପାଖରେ ରହିଛି। ଏହି କମ୍ପାନୀରେ ସୋନିଆ ଗାନ୍ଧୀ ଏବଂ ରାହୁଲ ଗାନ୍ଧୀଙ୍କର ଅଂଶୀଦାରୀ ରହିଛି, ଯେଉଁ କାରଣରୁ ଇଡିର ତଦନ୍ତର ଆଞ୍ଚ ସେମାନଙ୍କ ପାଖରେ ପହଞ୍ଚିଛି। ଯଦି ୭୫ ବର୍ଷ ପୂର୍ବେ ସରଦାର ବଲ୍ଲଭଭାଇ ପଟେଲଙ୍କ କଥା ପଣ୍ଡିତ ଜବାହରଲାଲ ନେହେରୁ ଗ୍ରହଣ କରିଥାନ୍ତେ, ତେବେ ବୋଧହୁଏ ଆଜି ସୋନିଆ ଗାନ୍ଧୀ ଏବଂ ରାହୁଲ ଗାନ୍ଧୀ ଏହି ମାମଲାରେ ଫସି ନଥାନ୍ତେ। ଆସନ୍ତୁ, ସେହି କାହାଣୀ ଜାଣିବା।
୭୫ ବର୍ଷ ପୁରୁଣା କାହାଣୀ
୧୯୩୭ରେ ଏଜେଏଲ (ଆସୋସିଏଟେଡ ଜର୍ନାଲ୍ସ ଲିମିଟେଡ) ଗଠନ ହୋଇଥିଲା। ଏହାପରେ ୯ ସେପ୍ଟେମ୍ବର ୧୯୩୮ରେ ଜବାହରଲାଲ ନେହେରୁ ନ୍ୟାସନାଲ ହେରାଲ୍ଡ ଖବରକାଗଜ ଆରମ୍ଭ କରିଥିଲେ। ଏହା ଦେଶର ସ୍ୱାଧୀନତା ପୂର୍ବର, ଅର୍ଥାତ୍ ୯ ବର୍ଷ ଆଗର ଘଟଣା। ଏହି ଖବରକାଗଜ ଆରମ୍ଭ କରିବାରେ ହଜାର ହଜାର ସ୍ୱାଧୀନତା ସଂଗ୍ରାମୀଙ୍କର ଗୁରୁତ୍ୱପୂର୍ଣ୍ଣ ଭୂମିକା ରହିଥିଲା। ଏହା ଅଧୀନରେ ତିନୋଟି ଖବରକାଗଜ ପ୍ରକାଶିତ ହେଉଥିଲା: ଇଂରାଜୀରେ ‘ନ୍ୟାସନାଲ ହେରାଲ୍ଡ’, ହିନ୍ଦୀରେ ‘ନବଜୀବନ’, ଏବଂ ଉର୍ଦ୍ଦୁରେ ‘କୌମି ଆବାଜ’। ଆଜି ଏହି ନ୍ୟାସନାଲ ହେରାଲ୍ଡ ଖବରକାଗଜ ହିଁ ଚର୍ଚ୍ଚାରେ ରହିଛି। ନ୍ୟାସନାଲ ହେରାଲ୍ଡ ମାମଲାରେ କଂଗ୍ରେସ ନେତା ସୋନିଆ ଗାନ୍ଧୀ, ରାହୁଲ ଗାନ୍ଧୀ ଏବଂ ଅନ୍ୟ ଅନେକଙ୍କ ବିରୁଦ୍ଧରେ ଇଡି ୯୮୮ କୋଟି ଟଙ୍କାର ମନି ଲଣ୍ଡରିଂ ଅଭିଯୋଗରେ ଚାର୍ଜଶିଟ୍ ଦାଖଲ କରିଛି। ଏହା ନେଇ ବିବାଦ ଜାରି ରହିଛି।
ଏହି ତିନୋଟି ଖବରକାଗଜର ପରିଚାଳନା ଏଜେଏଲ ଦ୍ୱାରା କରାଯାଉଥିଲା। ସେତେବେଳେ ମଧ୍ୟ ଏହା ମନେ କରାଯାଉଥିଲା ଯେ ଏହି ଖବରକାଗଜ ପଣ୍ଡିତ ଜବାହରଲାଲ ନେହେରୁଙ୍କ ନିର୍ଦ୍ଦେଶରେ ଚାଲୁଥିଲା। ୧୯୪୨ରୁ ୧୯୪୫ ପର୍ଯ୍ୟନ୍ତ ବ୍ରିଟିଶ ସରକାର ଏହି ଖବରକାଗଜର ପ୍ରକାଶନ ଉପରେ ରୋକ ଲଗାଇଥିଲେ, ଅର୍ଥାତ୍ ୩ ବର୍ଷ ଧରି ଏହା ପ୍ରକାଶିତ ହୋଇପାରି ନଥିଲା। ଦେଶ ସ୍ୱାଧୀନ ହେବା ପରେ ଯେତେବେଳେ ନେହେରୁ ପ୍ରଧାନମନ୍ତ୍ରୀ ହେଲେ, ସେ ଏହି ଖବରକାଗଜର ବୋର୍ଡର ଅଧ୍ୟକ୍ଷ ପଦରୁ ଇସ୍ତଫା ଦେଇଥିଲେ। ଏହାପରେ ଇନ୍ଦିରା ଗାନ୍ଧୀଙ୍କ ସ୍ୱାମୀ ଫିରୋଜ ଗାନ୍ଧୀଙ୍କୁ ଏହାର ବୋର୍ଡର ମ୍ୟାନେଜିଂ ଡିରେକ୍ଟର କରାଗଲା। କିନ୍ତୁ ଧୀରେ ଧୀରେ ଏଜେଏଲର ଆର୍ଥିକ ଅବସ୍ଥା ଖରାପ ହେବାକୁ ଲାଗିଥିଲା।
ସରଦାର ପଟେଲଙ୍କ ଚେତାବନୀ
ପଣ୍ଡିତ ନେହେରୁଙ୍କ ବ୍ୟକ୍ତିଗତ ସଚିବ ଓ.ଏମ. ମଥାଇ ତାଙ୍କ ପୁସ୍ତକରେ ସରଦାର ପଟେଲ ଏବଂ ନେହେରୁଙ୍କ କାହାଣୀର ଉଲ୍ଲେଖ କରିଛନ୍ତି। ସେଥିରେ ଏହା ମଧ୍ୟ ଉଲ୍ଲେଖ ରହିଛି ଯେ ଫିରୋଜ ଗାନ୍ଧୀ କମ୍ପାନୀର ପରିଚାଳନା ଠିକରେ କରି ପାରୁନଥିଲେ । ଯେଉଁ କାରଣରୁ ନ୍ୟାସନାଲ ହେରାଲ୍ଡ ଆର୍ଥିକ ସଙ୍କଟରେ ଫସିଥିଲା। ଏହାକୁ ଆର୍ଥିକ ସଙ୍କଟରୁ ଉଦ୍ଧାର କରିବା ପାଇଁ ଏହାକୁ ଜନହିତ ନିଧି ଟ୍ରଷ୍ଟରେ ପରିଣତ କରାଗଲା। ଏହି ନୂଆ ଟ୍ରଷ୍ଟ ଉପରେ ମଧ୍ୟ ନେହେରୁ ପରିବାରର ନିୟନ୍ତ୍ରଣ ରହିଲା। ଏହି ଟ୍ରଷ୍ଟରେ ସମସ୍ତ ଟ୍ରଷ୍ଟି ଭାବେ ନେହେରୁ ଏବଂ ତାଙ୍କ ପରିବାରର ଅତ୍ୟନ୍ତ ନିକଟତର ଲୋକଙ୍କୁ ନିଯୁକ୍ତ କରାଗଲା।
ପୁସ୍ତକରେ କ’ଣ ଦାବି କରାଯାଇଛି ?
ଓ.ଏମ. ମଥାଇ ତାଙ୍କ ପୁସ୍ତକରେ ଦାବି କରିଛନ୍ତି ଯେ ନ୍ୟାସନାଲ ହେରାଲ୍ଡ ପାଇଁ ବଡ଼ୋଦାର ମହାରାଜାଙ୍କଠାରୁ ୨ ଲକ୍ଷ ଟଙ୍କାର ଲାଂଚ ମାଗଯାଇଥିଲା । ଯେତେବେଳେ ଏହି ଖବର ସରଦାର ବଲ୍ଲଭଭାଇ ପଟେଲଙ୍କୁ ମିଳିଲା, ସେ ଏହାର ଅଭିଯୋଗ ନେହେରୁଙ୍କୁ କରିଥିଲେ। ସେତେବେଳେ ବିଜ୍ଞାପନର ନାମରେ ଅନେକ ବଡ଼ ଶିଳ୍ପ ଗୋଷ୍ଠୀଙ୍କଠାରୁ ଏହି ଖବରକାଗଜ ଲକ୍ଷ ଲକ୍ଷ ଟଙ୍କା ସଂଗ୍ରହ କରିଥିଲା। ନେହେରୁ ପ୍ରଧାନମନ୍ତ୍ରୀ ଥିବା ସମୟରେ ଦିଲ୍ଲୀର ବାହାଦୁର ଶାହ ଜାଫର ମାର୍ଗରେ ନ୍ୟାସନାଲ ହେରାଲ୍ଡ ପାଇଁ ଅଫିସ ନିର୍ମାଣ କରିବାକୁ ଜମି ମଧ୍ୟ ବଣ୍ଟନ କରାଯାଇଥିଲା।
୧୯୫୦ରେ ସରଦାର ପଟେଲ ନେହେରୁଙ୍କୁ ଏକ ପତ୍ର ଲେଖି ନ୍ୟାସନାଲ ହେରାଲ୍ଡର ଲାଭ ପାଇଁ ସରକାରୀ କଳର ଅପବ୍ୟବହାର ଏବଂ ସନ୍ଦେହଜନକ ଅର୍ଥ ସଂଗ୍ରହ ବିଷୟରେ ଚେତାବନୀ ଦେଇଥିଲେ। ସରଦାର ପଟେଲଙ୍କ ପତ୍ରବ୍ୟବହାରରେ ଏହି ଚିନ୍ତାଗୁଡ଼ିକ ଲିପିବଦ୍ଧ ଥିଲା, କିନ୍ତୁ ନେହେରୁ ଏହାକୁ ଖାରଜ କରିଦେଇଥିଲେ, ଯଦିଓ ସେ ଏହାର ଦୀର୍ଘମିଆଦୀ ପ୍ରଭାବ ନେଇ ଆଶଙ୍କା ପ୍ରକାଶ କରିଥିଲେ। ଦଶନ୍ଧି ପରେ ସରଦାର ପଟେଲଙ୍କ ଏହି ଚେତାବନୀ ଏବେ ଲୋକଙ୍କ ସାମ୍ନାକୁ ଆସୁଛି, ଯେତେବେଳେ ଇଡି ଏହି ମାମଲାର ତଦନ୍ତ କରୁଛି।
ସରଦାରଙ୍କ ଚେତାବନୀ ସତ ହେଉଛି
ସରଦାର ବଲ୍ଲଭଭାଇ ପଟେଲଙ୍କ ଚେତାବନୀ ଯେଉଁଟି ପତ୍ର ମାଧ୍ୟମରେ ଆରମ୍ଭ ହୋଇଥିଲା, ତାହା ଏବେ ଏକ ବଡ଼ ଦୁର୍ନୀତି ମାମଲାରେ ପରିଣତ ହୋଇଛି। ଇଡି ସୋନିଆ ଗାନ୍ଧୀ ଏବଂ ରାହୁଲ ଗାନ୍ଧୀଙ୍କ ବିରୁଦ୍ଧରେ ଏହି ମାମଲାରେ ଚାର୍ଜଶିଟ୍ ଦାଖଲ କରିଛି। ଏଥିରେ ସେମାନଙ୍କ ବିରୋଧରେ ୟଙ୍ଗ ଇଣ୍ଡିଆନ ଲିମିଟେଡ ମାଧ୍ୟମରେ ୫,୦୦ କୋଟିକୋଟି ଟଙ୍କାର ସମ୍ପତ୍ତିର ଅପବ୍ୟବହାର କରିବାର ଅଭିଯୋଗ ଲଗାଯାଇଛି, ଯାହା ସେମାନଙ୍କ ନିୟନ୍ତ୍ରଣାଧୀନ ଏବଂ ନ୍ୟାସନାଲ ହେରାଲ୍ଡ ଏବଂ ଏହାର ମୂଳ କମ୍ପାନୀ ଏଜେଏଲ ସହ ଜଡ଼ିତ।
୫ ମଇ ୧୯୫୦ରେ ସରଦାର ପଟେଲ ନେହେରୁଙ୍କୁ ଏକ ପତ୍ର ଲେଖି ଚିନ୍ତା ପ୍ରକାଶ କରିଥିଲେ ଯେ ନ୍ୟାସନାଲ ହେରାଲ୍ଡ ହିମାଳୟନ ଏୟାରୱେଜ ସହ ଜଡ଼ିତ ଦୁଇ ଜଣ ବ୍ୟକ୍ତିଙ୍କଠାରୁ ୭୫,୦୦୦ ଟଙ୍କାରୁ ଅଧିକ ଅର୍ଥ ଗ୍ରହଣ କରିଛି। ସେ ଜଣାଇଥିଲେ ଯେ ଏହି ଏୟାରଲାଇନ ଭାରତୀୟ ବାୟୁସେନାର ଆପତ୍ତିକୁ ଅଣଦେଖା କରି ଅବୈଧ ଭାବେ ରାତ୍ରି ଡାକ ସେବା ପାଇଁ ସରକାରୀ ଚୁକ୍ତି ହାସଲ କରିଥିଲା। ସେହି ପତ୍ରରେ ପଟେଲ ନେହେରୁଙ୍କୁ ସତର୍କ କରିଥିଲେ ଯେ ନ୍ୟାସନାଲ ହେରାଲ୍ଡ ଅଖାନୀ ନାମକ ଜଣେ ବ୍ୟବସାୟୀଙ୍କଠାରୁ ଅର୍ଥ ଗ୍ରହଣ କରିଛି, ଯିଏ ତାଙ୍କ ବିମାନ କମ୍ପାନୀ ପାଇଁ ରାତ୍ରି ଡାକ ଚୁକ୍ତି ହାସଲ କରିବାରେ ଜଡ଼ିତ ଥିଲେ। ପଟେଲ ଆହୁରି ଉଲ୍ଲେଖ କରିଥିଲେ ଯେ ଅଖାନୀ ଟାଟା ଏବଂ ଏୟାର ସର୍ଭିସେସ ଅଫ ଇଣ୍ଡିଆ ପରି କମ୍ପାନୀଗୁଡ଼ିକରୁ ମଧ୍ୟ ଅର୍ଥ ସଂଗ୍ରହ କରୁଥିଲେ।
ପଟେଲଙ୍କ ପତ୍ରରେ କ’ଣ ଥିଲା?
ପତ୍ରରେ ପଟେଲ ଆହୁରି ମଧ୍ୟ ଲେଖିଥିଲେ ଯେ ଅଖାନୀଙ୍କ ବିରୁଦ୍ଧରେ ବ୍ୟାଙ୍କଗୁଡ଼ିକରୁ ପ୍ରତାରଣା କରିବା ଅଭିଯୋଗରେ ବିଭିନ୍ନ ଅଦାଲତରେ ମାମଲା ଚାଲିଛି। ସେ ତତ୍କାଳୀନ କେନ୍ଦ୍ରୀୟ ମନ୍ତ୍ରୀ ଆହମଦ କିଦୱାଇଙ୍କ ଦ୍ୱାରା ନ୍ୟାସନାଲ ହେରାଲ୍ଡ ପାଇଁ ଅର୍ଥ ସଂଗ୍ରହ କରିବା ନେଇ ତାଙ୍କ ପଦର ଅପବ୍ୟବହାର ବିଷୟରେ ମଧ୍ୟ ଚେତାବନୀ ଦେଇଥିଲେ। ଏହା ମଧ୍ୟରେ ଲକ୍ଷ୍ନୌର ବ୍ୟବସାୟୀ ଜେ.ପି. ଶ୍ରୀବାସ୍ତବଙ୍କଠାରୁ ଅର୍ଥ ସଂଗ୍ରହ ମଧ୍ୟ ସାମିଲ ଥିଲା।
ସେହି ଦିନ, ୫ ମଇ ୧୯୫୦ରେ, ନେହେରୁ ପଟେଲଙ୍କୁ ଏକ ପତ୍ର ଲେଖି ଏପରି ଉତ୍ତର ଦେଇଥିଲେ ଯେ ଲାଗୁଥିଲା ସେ ପଟେଲଙ୍କୁ ଶାନ୍ତ କରିବାକୁ ଚେଷ୍ଟା କରୁଛନ୍ତି। ନେହେରୁ ଉଲ୍ଲେଖ କରିଥିଲେ ଯେ ସେ ତାଙ୍କ ଜ୍ୱାଇଁ ଫିରୋଜ ଗାନ୍ଧୀଙ୍କୁ, ଯିଏ ସେତେବେଳେ ନ୍ୟାସନାଲ ହେରାଲ୍ଡର ମହାପ୍ରବନ୍ଧକ ଥିଲେ, ଏହି ଅବୈଧ ଅର୍ଥ ସଂଗ୍ରହ ଅଭିଯୋଗର ତଦନ୍ତ କରିବାକୁ କହିଛନ୍ତି।
ନେହେରୁଙ୍କୁ ପଟେଲଙ୍କ ପୁନଃ ଉତ୍ତର
ଠିକ୍ ପରଦିନ, ୬ ମଇରେ, ପଟେଲ ନେହେରୁଙ୍କ ଦାବିର ଦୃଢ଼ତାର ସହ ଖଣ୍ଡନ କରି ପୁନର୍ବାର ଉତ୍ତର ଦେଇଥିଲେ। ପୁନର୍ବାର ପଟେଲଙ୍କୁ ଶାନ୍ତ କରିବାର ଚେଷ୍ଟା କରାଗଲା, କିନ୍ତୁ ସରଦାର ପଟେଲଙ୍କ ଦ୍ୱାରା ଅବୈଧ ଅର୍ଥ ସଂଗ୍ରହ ବିଷୟରେ ପ୍ରକାଶିତ ଚିନ୍ତାକୁ ଅଣଦେଖା କରାଗଲା। ଯଦିଓ ନେହେରୁ ସ୍ୱୀକାର କରିଥିଲେ ଯେ ଏଥିରେ କିଛି ଭୁଲ ହୋଇଥାଇପାରେ। ଏହାପରେ, ୧୦ ମଇ ୧୯୫୦ରେ ଲେଖାଯାଇଥିବା ତାଙ୍କର ଅନ୍ତିମ ପତ୍ରରେ, ସରଦାର ପଟେଲ ନେହେରୁଙ୍କ ଏହି ମନୋଭାବ ଉପରେ ସ୍ପଷ୍ଟ ଅସନ୍ତୋଷ ପ୍ରକାଶ କରିଥିଲେ। ଗୃହମନ୍ତ୍ରୀ ଭାବେ ସେ ଅର୍ଥ ପ୍ରଦାନ ସହ ଜଡ଼ିତ ଅନୈତିକତା ଏବଂ ନ୍ୟାସନାଲ ହେରାଲ୍ଡର ଅର୍ଥପ୍ରଦାନ ସହ ଜଡ଼ିତ ସନ୍ଦେହଜନକ ବ୍ୟକ୍ତିଙ୍କ ଉପରେ ଗଭୀର ଚିନ୍ତା ପ୍ରକାଶ କରିଥିଲେ।
ବିଜେପିର ଅଭିଯୋଗ
ଏବେ ବିଜେପି ପକ୍ଷରୁ ଦାବି କରାଯାଉଛି ଯେ ନ୍ୟାସନାଲ ହେରାଲ୍ଡ ମାମଲା ଏକ ବିରଳ ଘଟଣା, ଯେଉଁଥିରେ ହଜାର ହଜାର କୋଟି ଟଙ୍କାର ସମ୍ପତ୍ତି ମାତ୍ର ୯୦ କୋଟି ଟଙ୍କାର ଋଣରେ ବିକ୍ରି ହୋଇଗଲା, ଏବଂ ଏହାକୁ କିଣିଥିବା ଓ ବିକ୍ରି କରିଥିବା ପକ୍ଷ ସମାନ । ଅର୍ଥାତ ଯିଏ କିଣିଛି ସିଏ ହିଁ ବିକିଛି । ଯେଉଁ କଂଗ୍ରେସ ଦେଶରେ ଏତେ ବର୍ଷ ଧରି କ୍ଷମତାରେ ରହିଲା, ସେତେବେଳେ ମଧ୍ୟ ୨୦୦୮ରେ ଏହି ଖବରକାଗଜ ବନ୍ଦ ହୋଇଗଲା। ଅର୍ଥାତ୍, କ୍ଷମତାରେ ଥାଇ ମଧ୍ୟ କଂଗ୍ରେସ ନିଜର ଏହି ଐତିହ୍ୟକୁ ବଞ୍ଚାଇ ପାରିଲା ନାହିଁ।
ବିଜେପି ପକ୍ଷରୁ ଏହା ମଧ୍ୟ ଦାବି କରାଯାଇଛି ଯେ କଂଗ୍ରେସ ପାର୍ଟି ଏବଂ ଏହାର ନେତାମାନେ ଚାହୁଁନଥିଲେ ଯେ ଏହି ଖବରକାଗଜ ଚାଲୁ। ବିଜେପି ଆହୁରି କହିଛି ଯେ ୫ ମଇ ପୂର୍ବରୁ, ୩ ମଇ ୧୯୫୦ରେ, ସରଦାର ବଲ୍ଲଭଭାଇ ପଟେଲ ନ୍ୟାସନାଲ ହେରାଲ୍ଡ ମାମଲା ନେଇ ପଣ୍ଡିତ ଜବାହରଲାଲ ନେହେରୁଙ୍କୁ ଏକ ପତ୍ର ଲେଖିଥିଲେ, ଯାହାର ସ୍ପଷ୍ଟ ଉଲ୍ଲେଖ ‘କରେସପଣ୍ଡେନ୍ସ ଅଫ ସରଦାର ପଟେଲ’ରେ ମିଳିଥାଏ। ଏହି ପତ୍ରରେ ସେ ଲେଖିଥିଲେ ଯେ ଯଦି ଏହା ସ୍ୱାଧୀନତା ସଂଗ୍ରାମୀଙ୍କ ଦ୍ୱାରା ଆରମ୍ଭ ହୋଇଥିବା ଖବରକାଗଜ ଥିଲା, ତେବେ ସରକାର ସହ ଜଡ଼ିତ ଲୋକଙ୍କର ଏଥିରେ ଏତେ ସଂପୃକ୍ତି ଆପତ୍ତିଜନକ ବିଷୟ ଅଟେ ।
ALSO READ: https://purvapaksa.com/gst-on-upi-transactions-over-rs-2000-centre-issues-important-statement/
୨୦୦୦ ଟଙ୍କାରୁ ଅଧିକ ୟୁପିଆଇ କାରବାର ଉପରେ ଜିଏସଟି: ଗୁରୁତ୍ୱପୂର୍ଣ୍ଣ ବୟାନ ଜାରି କଲା କେନ୍ଦ୍ର ସରକାର
