ଆମେରିକାର ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ ବାଣିଜ୍ୟ ପରାମର୍ଶଦାତା ପିଟର ନାଭାରୋ ଏସସିଓ ସମ୍ମିଳନୀରେ ଭାଗ ନେବା ପାଇଁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କୁ ସମାଲୋଚନା କରିଛନ୍ତି। ନରେନ୍ଦ୍ର ମୋଦୀଙ୍କ ଋଷ ରାଷ୍ଟ୍ରପତି ଭ୍ଲାଦିମିର ପୁଟିନ ଓ ଚୀନ ରାଷ୍ଟ୍ରପତି ସି ଜିନପିଙ୍ଗଙ୍କ ସହ ନିକଟତାକୁ ନାଭାରୋ ରଣନୀତିକ ଭୁଲ ବୋଲି ଅଭିହିତ କରିଛନ୍ତି। ସେ କହିଛନ୍ତି ଯେ ମୋଦୀ ଯେଉଁଭଳି ଭାବେ ଜିନପିଙ୍ଗ ଓ ପୁଟିନଙ୍କ ସହ ଘନିଷ୍ଠତା ଦେଖାଇଛନ୍ତି, ତାହା ଦେଖିବା ଲଜ୍ଜାଜନକ ଥିଲା। ତାଙ୍କର ବୁଝିବା ଉଚିତ ଯେ ସେ ଆମ ସହ ରହିବା ଦରକାର। ଚୀନର ତିଆନଜିନରେ ଶାଙ୍ଘାଇ ସହଯୋଗ ସଂଗଠନ (ଏସସିଓ) ଶିଖର ସମ୍ମିଳନୀ ସମୟରେ ଜିନପିଙ୍ଗ, ମୋଦୀ ଓ ପୁଟିନଙ୍କ ମଧ୍ୟରେ ହୋଇଥିବା ବୈଠକ ଉପରେ ସେ ଏହା କହିଛନ୍ତି।
ଏସସିଓ ସମ୍ମିଳନୀ ଉପରେ ବୟାନବାଜୀ କରି ପିଟର ନାଭାରୋ ଅତ୍ୟନ୍ତ ହାଲୁକା ଭାଷା ବ୍ୟବହାର କରିଛନ୍ତି। ସେ କହିଛନ୍ତି, ‘ମୁଁ ବୁଝି ପାରୁନାହିଁ କାହିଁକି ନରେନ୍ଦ୍ର ମୋଦୀ ଭ୍ଲାଦିମିର ପୁଟିନ ଓ ସି ଜିନପିଙ୍ଗଙ୍କ ସହ ଏକାଠି ହେଉଛନ୍ତି। ନରେନ୍ଦ୍ର ମୋଦୀଙ୍କୁ ଚୀନ ଓ ଋଷର ରାଷ୍ଟ୍ରପତିଙ୍କ ସହ ନିକଟତା ଦେଖିବା ନିଶ୍ଚିତ ଭାବେ ଖରାପ ଥିଲା। ମୋ ମନେ ହୁଏ ଯେ ଭାରତୀୟ ପ୍ରଧାନମନ୍ତ୍ରୀ ଏହାକୁ ଏଡ଼ାଇ ଦେବା ଉଚିତ ଥିଲା।’ ଆମେରିକା ସହ ଟାରିଫ ମାମଲାରେ ଉତ୍ତେଜନା ମଧ୍ୟରେ ପ୍ରଧାନମନ୍ତ୍ରୀ ମୋଦୀଙ୍କର ରୁଷ ଓ ଚୀନର ନେତାଙ୍କ ସହ ବୈଠକ ହୋଇଛି। ଏହା ଆମେରିକାରେ ଏକ ଅସନ୍ତୋଷ ସୃଷ୍ଟି କରିଛି।
ନାଭାରୋଙ୍କ ନିଶାନାରେ ଭାରତ
ଭାରତ ଓ ଆମେରିକା ମଧ୍ୟରେ ଟାରିଫ ଉପରେ ବୃଦ୍ଧି ପାଉଥିବା ଉତ୍ତେଜନା ମଧ୍ୟରେ ନାଭାରୋ ନିରନ୍ତର ମନ୍ତବ୍ୟ ଦେଉଛନ୍ତି। ନାଭାରୋ କହିଛନ୍ତି ଯେ ଭାରତ ପ୍ରମୁଖ ଅର୍ଥନୀତିଗୁଡ଼ିକ ମଧ୍ୟରେ ସର୍ବାଧିକ ଟାରିଫ ହାର ଲାଗୁ କରୁଛି ଏବଂ ଏହାକୁ ସ୍ୱୀକାର କରୁନାହିଁ। ଭାରତ ସମସ୍ତଙ୍କୁ ଏହା କହିବାକୁ ଚେଷ୍ଟା କରୁଛି ଯେ ଏହା ସତ୍ୟ ନୁହେଁ, କିନ୍ତୁ ଏହା ସ୍ପଷ୍ଟ ଭାବେ ସତ୍ୟ।
ନାଭାରୋ ଭାରତର ଆଭିମୁଖ୍ୟକୁ ଆମେରିକାର ଅନ୍ୟ ବାଣିଜ୍ୟ ବନ୍ଧୁମାନଙ୍କ ସହ ତୁଳନା କରିଛନ୍ତି। ସେ କହିଛନ୍ତି, ଭାରତ ଆମ ସହ ଜାପାନ, କୋରିଆ, ଫିଲିପାଇନ୍ସ, ଇଣ୍ଡୋନେସିଆ ଓ ଇଉରୋପୀୟ ସଂଘ ଭଳି ଆଲୋଚନା କରିନାହିଁ। ସେମାନେ କେବଳ ମନେ କରୁଛନ୍ତି ଯେ ସେମାନେ ଆମ ସହ ନିଜର ମନମାନି ଜାରି ରଖିପାରିବେ। ସେମାନଙ୍କୁ ବୁଝିବା ଉଚିତ ଯେ ଟ୍ରମ୍ପ ଏହାକୁ ହେବାକୁ ଦେବେ ନାହିଁ।
ଋଷ ତୈଳରୁ ମୁନାଫାଖୋରୀ
ଡୋନାଲ୍ଡ ଟ୍ରମ୍ପଙ୍କ ବାଣିଜ୍ୟ ମାମଲା ପରାମର୍ଶଦାତା ପିଟର ନାଭାରୋ ପୂର୍ବରୁ କହିଥିଲେ ଯେ ଋଷରୁ ତୈଳ କ୍ରୟର ଲାଭ ଭାରତର ଏକ ଛୋଟ ଗୋଷ୍ଠୀ (ବ୍ରାହ୍ମଣ) ଉଠାଉଛି। ସେ କହିଥିଲେ ଯେ ରୁଷରୁ ତୈଳ କ୍ରୟ ମାଧ୍ୟମରେ ମୁନାଫା ବ୍ରାହ୍ମଣମାନେ କମାଉଛନ୍ତି, ଯେତେବେଳେ ଏହାରୁ ହେଉଥିବା କ୍ଷତି ସମଗ୍ର ଦେଶର ଲୋକେ ଭୋଗୁଛନ୍ତି।
ନାଭାରୋ କହିଛନ୍ତି ଯେ ଭାରତୀୟ ରିଫାଇନରମାନେ ଋଷରୁ ଶସ୍ତା ଦରରେ ଅଶୋଧିତ ତୈଳ କିଣୁଛନ୍ତି। ଏହାକୁ ପ୍ରକ୍ରିୟାକରଣ କରି ମହଙ୍ଗା ଦରରେ ବିକ୍ରି କରୁଛନ୍ତି। ବିଶେଷତଃ ଭାରତର ବ୍ରାହ୍ମଣମାନେ ନିଜ ଦେଶର ଲୋକଙ୍କ ମୂଲ୍ୟରେ ମୁନାଫାଖୋରୀ କରୁଛନ୍ତି। ରୁଷ ଏହି ଅର୍ଥର ବ୍ୟବହାର ୟୁକ୍ରେନ ଯୁଦ୍ଧରେ କରୁଛି। ଏପରି ସ୍ଥିତିରେ ଆମକୁ ଏହାକୁ ରୋକିବାକୁ ହେବ।
Also Read https://purvapaksa.com/last-nizam-mir-osman-ali-khan-conspiracy-with-pakistan-against-india/
