ସୁପ୍ରିମକୋର୍ଟଙ୍କ ଐତିହାସିକ ରାୟର ଏକ ଗଭୀର ଅନ୍ତର୍ଦୃଷ୍ଟି
ଭାରତୀୟ ସମ୍ବିଧାନର ଆତ୍ମା ସମାନତା ଏବଂ ସାମାଜିକ ନ୍ୟାୟ ଉପରେ ପ୍ରତିଷ୍ଠିତ। କିନ୍ତୁ ଦଶନ୍ଧି ଦଶନ୍ଧି ଧରି ‘ଅନୁସୂଚିତ ଜାତି’ (SC) ମାନ୍ୟତାକୁ ନେଇ ଯେଉଁ ଆଇନଗତ ଏବଂ ଧାର୍ମିକ ଦ୍ୱନ୍ଦ୍ୱ ରହିଥିଲା, ୨୦୨୬ ମାର୍ଚ୍ଚ ୨୪ ତାରିଖରେ ସୁପ୍ରିମକୋର୍ଟଙ୍କ ଏକ ଗୁରୁତ୍ୱପୂର୍ଣ୍ଣ ରାୟ ସେଥିରେ ପୂର୍ଣ୍ଣଚ୍ଛେଦ ପକାଇଛି। ମୁଖ୍ୟ ବିଚାରପତି ଜଷ୍ଟିସ୍ ସୂର୍ଯ୍ୟକାନ୍ତ ଏବଂ ଜଷ୍ଟିସ୍ ପିକେ ମିଶ୍ରଙ୍କୁ ନେଇ ଗଠିତ ଖଣ୍ଡପୀଠ ଯେଉଁ ନିଷ୍ପତ୍ତି ଶୁଣାଇଛନ୍ତି, ତାହା କେବଳ ଏକ ଆଇନଗତ ବ୍ୟାଖ୍ୟା ନୁହେଁ, ବରଂ ଭାରତର ବଦଳୁଥିବା ଜନସଂଖ୍ୟା ଗଠନ (Demography) ଏବଂ ବିଦେଶୀ ଷଡ଼ଯନ୍ତ୍ର ବିରୋଧରେ ଏକ ଶକ୍ତ ପ୍ରହାର।
ମାମଲାର ପୃଷ୍ଠଭୂମି: ଆନ୍ଧ୍ରପ୍ରଦେଶରୁ ସର୍ବୋଚ୍ଚ ଅଦାଲତ ପର୍ଯ୍ୟନ୍ତ
ଏହି ବିବାଦର ସୂତ୍ରପାତ ହୋଇଥିଲା ଆନ୍ଧ୍ରପ୍ରଦେଶରୁ। ଜଣେ ବ୍ୟକ୍ତି, ଚିନ୍ତାଦା ଆନନ୍ଦ, ଯିଏ କି ଜଣେ ଖ୍ରୀଷ୍ଟଧର୍ମ ପ୍ରଚାରକ ବା ‘ପାଷ୍ଟର’ ଭାବେ କାର୍ଯ୍ୟ କରୁଥିଲେ, ସେ ନିଜକୁ ଅନୁସୂଚିତ ଜାତିର ଦର୍ଶାଇ କିଛି ବ୍ୟକ୍ତିଙ୍କ ବିରୋଧରେ ଅନୁସୂଚିତ ଜାତି / ଅନୁସୂଚିତ ଜନଜାତି ଅତ୍ୟାଚାର ନିରୋଧ ଆଇନ (Prevention of Atrocities Act) ଅଧୀନରେ ମାମଲା ରୁଜୁ କରିଥିଲେ। ଅଭିଯୁକ୍ତଙ୍କ ପକ୍ଷରୁ ଯୁକ୍ତି ଦର୍ଶାଯାଇଥିଲା ଯେ, ଆନନ୍ଦ ଦୀର୍ଘ ୧୦ ବର୍ଷରୁ ଅଧିକ ସମୟ ଧରି ଖ୍ରୀଷ୍ଟଧର୍ମ ପାଳନ କରୁଛନ୍ତି ଏବଂ ଜଣେ ପାଷ୍ଟର ଭାବେ ଚର୍ଚ୍ଚରେ ସେବା କରୁଛନ୍ତି। ତେଣୁ ସେ ଆଉ ‘ହିନ୍ଦୁ ଦଳିତ’ ବା ଅନୁସୂଚିତ ଜାତି ବର୍ଗର ହୋଇ ରହିନାହାନ୍ତି।
ଆନ୍ଧ୍ରପ୍ରଦେଶ ହାଇକୋର୍ଟ ଏହି ଯୁକ୍ତିକୁ ଗ୍ରହଣ କରିଥିଲେ। ହାଇକୋର୍ଟ କହିଥିଲେ ଯେ, ଥରେ ଜଣେ ବ୍ୟକ୍ତି ଖ୍ରୀଷ୍ଟଧର୍ମ ଗ୍ରହଣ କଲେ, ସେ ତାଙ୍କର ପୁରୁଣା ଜାତିଗତ ପରିଚୟ ହରାନ୍ତି, କାରଣ ଖ୍ରୀଷ୍ଟଧର୍ମରେ ଜାତିପ୍ରଥା ବା ଛୁଆଁଅଛୁଆଁ ଭେଦଭାବକୁ ସ୍ୱୀକୃତି ଦିଆଯାଏ ନାହିଁ। ଏହି ନିଷ୍ପତ୍ତି ବିରୋଧରେ ଆନନ୍ଦ ସୁପ୍ରିମକୋର୍ଟଙ୍କ ଦ୍ୱାରସ୍ଥ ହୋଇଥିଲେ, ଯେଉଁଠାରେ ସର୍ବୋଚ୍ଚ ଅଦାଲତ ହାଇକୋର୍ଟଙ୍କ ରାୟକୁ କାଏମ ରଖିବା ସହ ଏକ ବଡ଼ ସାମ୍ବିଧାନିକ ବ୍ୟାଖ୍ୟା ପ୍ରଦାନ କରିଛନ୍ତି।
ସମ୍ବିଧାନର ଧାରା ଏବଂ ୧୯୫୦ର ଐତିହାସିକ ନିର୍ଦ୍ଦେଶନାମା
ସୁପ୍ରିମକୋର୍ଟ ନିଜ ରାୟରେ The Constitution (Scheduled Castes) Order, 1950କୁ ଆଧାର କରିଛନ୍ତି। ଏହି ନିର୍ଦ୍ଦେଶନାମା ଅନୁଯାୟୀ, କେବଳ ହିନ୍ଦୁ ଧର୍ମାବଲମ୍ବୀମାନଙ୍କୁ ହିଁ ଅନୁସୂଚିତ ଜାତି ମାନ୍ୟତା ଦିଆଯାଇଥିଲା। ପରବର୍ତ୍ତୀ ସମୟରେ ୧୯୫୬ରେ ଶିଖ୍ ଏବଂ ୧୯୯୦ରେ ବୌଦ୍ଧ ଧର୍ମକୁ ଏଥିରେ ସାମିଲ କରାଗଲା। କୋର୍ଟ ସ୍ପଷ୍ଟ କରିଛନ୍ତି ଯେ:
“କୌଣସି ବ୍ୟକ୍ତି ଯିଏ ହିନ୍ଦୁ, ଶିଖ କିମ୍ବା ବୌଦ୍ଧ ଧର୍ମ ବ୍ୟତୀତ ଅନ୍ୟ କୌଣସି ଧର୍ମ ଗ୍ରହଣ କରନ୍ତି, ସେ ଅନୁସୂଚିତ ଜାତିର ସଦସ୍ୟ ଭାବେ ବିବେଚିତ ହେବେ ନାହିଁ।”
ଏହାର ମୁଖ୍ୟ କାରଣ ହେଉଛି, ଭାରତରେ ଅସ୍ପୃଶ୍ୟତା (Untouchability) ଭଳି କୁପ୍ରଥା ହିନ୍ଦୁ ସମାଜର ଏକ ଅଂଶ ଥିଲା। ସେହି ଅଭିଶାପରୁ ମୁକ୍ତି ଦେବା ପାଇଁ ଏବଂ ସାମାଜିକ ସ୍ଥିତିରେ ସଂସ୍କାର ଆଣିବା ପାଇଁ ସଂରକ୍ଷଣର ବ୍ୟବସ୍ଥା କରାଯାଇଥିଲା। ଯେହେତୁ ଇସଲାମ ଏବଂ ଖ୍ରୀଷ୍ଟଧର୍ମ ନିଜକୁ ଏକ ‘ସମାନତାବାଦୀ’ ଧର୍ମ ବୋଲି ଦାବି କରନ୍ତି, ସେଠାରେ ଜାତିଗତ ସଂରକ୍ଷଣର କୌଣସି ସାମ୍ବିଧାନିକ ଆଧାର ନାହିଁ।
ଧର୍ମ ପରିବର୍ତ୍ତନ ଏବଂ ସାମ୍ବିଧାନିକ ସୁରକ୍ଷା କବଚ
କୋର୍ଟଙ୍କ ଏହି ରାୟରୁ ଏକ ପ୍ରମୁଖ ଦିଗ ସାମ୍ନାକୁ ଆସିଛି ଯେ, ଧର୍ମାନ୍ତରଣ କେବଳ ଏକ ବ୍ୟକ୍ତିଗତ ପସନ୍ଦ ନୁହେଁ, ବରଂ ଏହା ସମ୍ବିଧାନ ପ୍ରଦତ୍ତ ସୁବିଧା ସୁଯୋଗର ଅନ୍ତ ଘଟାଏ। ଅନେକ ସମୟରେ ଦେଖାଯାଏ ଯେ, ଲୋକମାନେ ଧର୍ମ ପରିବର୍ତ୍ତନ କରିବା ପରେ ମଧ୍ୟ ସରକାରୀ ସୁବିଧା ପାଇବା ପାଇଁ ନିଜର ପୁରୁଣା ଜାତି ପ୍ରମାଣପତ୍ର ବ୍ୟବହାର କରନ୍ତି। ଏହା ପ୍ରକୃତ ଅନୁସୂଚିତ ଜାତି ବର୍ଗର ଲୋକଙ୍କ ଅଧିକାରକୁ କ୍ଷୁର୍ଣ୍ଣ କରେ।
ସୁପ୍ରିମକୋର୍ଟ କହିଛନ୍ତି ଯେ, ଯଦି ଜଣେ ବ୍ୟକ୍ତି ଖ୍ରୀଷ୍ଟଧର୍ମ ଗ୍ରହଣ କରିସାରିଛନ୍ତି, ତେବେ ସେ ଅନୁସୂଚିତ ଜାତି / ଅନୁସୂଚିତ ଜନଜାତି ଅତ୍ୟାଚାର ଆଇନ ଅଧୀନରେ ସୁରକ୍ଷା ପାଇପାରିବେ ନାହିଁ। ଏହା ଦ୍ୱାରା ନକଲି ଜାତି ପ୍ରମାଣପତ୍ର ଜରିଆରେ ହେଉଥିବା ଜାଲିଆତି ଉପରେ ରୋକ୍ ଲାଗିବ।
ପୁନଃ-ଧର୍ମାନ୍ତରଣ’ (Re-conversion) ପାଇଁ କଡ଼ା ନିୟମ
ଏହି ରାୟରେ କୋର୍ଟ ‘ବୋନାଫାଇଡ୍ ରି-କନଭର୍ସନ’ ବା ପ୍ରକୃତ ଧର୍ମ ପ୍ରତ୍ୟାବର୍ତ୍ତନ ପାଇଁ ତିନୋଟି ମୁଖ୍ୟ ସର୍ତ୍ତ ରଖିଛନ୍ତି:
1. ଐତିହାସିକ ପ୍ରମାଣ: ବ୍ୟକ୍ତିଜଣକ ପ୍ରମାଣ କରିବେ ଯେ ସେ ମୂଳତଃ ଏକ SC ଜାତିର ଥିଲେ।
2. ସମ୍ପୂର୍ଣ୍ଣ ପରିତ୍ୟାଗ: ସେ ଗ୍ରହଣ କରିଥିବା ଅନ୍ୟ ଧର୍ମକୁ (ଯଥା ଖ୍ରୀଷ୍ଟଧର୍ମ) ସମ୍ପୂର୍ଣ୍ଣ ଭାବେ ତ୍ୟାଗ କରିଛନ୍ତି ଏବଂ ତାଙ୍କର ପୁରୁଣା ଧର୍ମର ରୀତିନୀତି ପାଳନ କରୁଛନ୍ତି।
3. ସାମାଜିକ ସ୍ୱୀକୃତି: ସବୁଠାରୁ ଗୁରୁତ୍ୱପୂର୍ଣ୍ଣ ସର୍ତ୍ତ ହେଉଛି, ଯେଉଁ ହିନ୍ଦୁ/ଶିଖ/ବୌଦ୍ଧ ସମାଜକୁ ସେ ଫେରିବାକୁ ଚାହୁଁଛନ୍ତି, ସେହି ସମାଜ ତାଙ୍କୁ ଗ୍ରହଣ କରିବା ଆବଶ୍ୟକ।
ଏହି ତିନିଟି ସର୍ତ୍ତ ମଧ୍ୟରୁ ଯଦି ଗୋଟିଏ ବି ପୂରଣ ନ ହୁଏ, ତେବେ ତାଙ୍କୁ ଅନୁସୂଚିତ ଜାତି ମାନ୍ୟତା ଫେରସ୍ତ ମିଳିବ ନାହିଁ। ଏହା ସଂରକ୍ଷଣର ଅପବ୍ୟବହାର ରୋକିବା ପାଇଁ ଏକ ବଡ଼ ପଦକ୍ଷେପ।
ବିଦେଶୀ ଷଡ଼ଯନ୍ତ୍ର ଏବଂ ଭାରତର ଆଭ୍ୟନ୍ତରୀଣ ସୁରକ୍ଷା
ଏହି ମାମଲାରେ ଆଉ ଏକ ଗୁରୁତ୍ୱପୂର୍ଣ୍ଣ ଦିଗ ରହିଛି। ସୁପ୍ରିମକୋର୍ଟ ଅନ୍ୟ ଏକ ମାମଲାରେ (ଯାଯାବର ଜାତିର ସ୍ୱତନ୍ତ୍ର ଶ୍ରେଣୀକରଣ) ଟିପ୍ପଣୀ ଦେଇ କହିଛନ୍ତି ଯେ, ଭାରତୀୟ ସମାଜକୁ ଛୋଟ ଛୋଟ ଭାଗରେ ବିଭକ୍ତ କରିବା ପାଇଁ ବିଦେଶୀ ଶକ୍ତିମାନେ ଚେଷ୍ଟା କରୁଛନ୍ତି।
ମୁଖ୍ୟ ବିଚାରପତି ସ୍ପଷ୍ଟ କରିଛନ୍ତି ଯେ, ଏଭଳି ଆବେଦନଗୁଡ଼ିକ ଭାରତ ବାହାରୁ ପ୍ରାୟୋଜିତ ହୋଇ ଆସୁଛି। ଏହାର ଉଦ୍ଦେଶ୍ୟ ହେଉଛି ଭାରତର ସଂସ୍କୃତିକୁ ଦୁର୍ବଳ କରିବା ଏବଂ ଲୋକଙ୍କୁ ଜାତିଗତ ଭିତ୍ତିରେ ପରସ୍ପର ବିରୋଧରେ ଛିଡ଼ା କରିବା। ସର୍ବୋଚ୍ଚ ଅଦାଲତ ଏହି ଷଡ଼ଯନ୍ତ୍ରକୁ ବୁଝିପାରିଥିବାରୁ ଏଭଳି ଦୃଢ଼ ଆଭିମୁଖ୍ୟ ଗ୍ରହଣ କରିଛନ୍ତି।
ଇତିହାସରୁ ଶିକ୍ଷା: ରାଜନୈତିକ ହସ୍ତକ୍ଷେପ ବନାମ ସାମ୍ବିଧାନିକ ମର୍ଯ୍ୟାଦା
ଏଠାରେ ଆମେ ଅତୀତର କିଛି କଳା ଅଧ୍ୟାୟକୁ ମନେ ପକାଇବା ଉଚିତ। ଗୋଟିଏ ସମୟ ଥିଲା ଯେତେବେଳେ କଂଗ୍ରେସ ସରକାର ନିଜ ଇଚ୍ଛାରେ ବିଚାରପତି ନିଯୁକ୍ତି କରୁଥିଲେ। ଜଷ୍ଟିସ୍ ବେହରୁଲ୍ ଇସଲାମ୍ ହେଉଛନ୍ତି ଏହାର ଶ୍ରେଷ୍ଠ ଉଦାହରଣ। ଜଷ୍ଟିସ୍ ବେହରୁଲ୍ ଇସଲାମ୍ ଦୁଇଥର ରାଜ୍ୟସଭା ସାଂସଦ ହେବା ପରେ ତାଙ୍କୁ କଂଗ୍ରେସ ନିଜର ନେତା ଜଗନ୍ନାଥ ମିଶ୍ରଙ୍କୁ ଦୁର୍ନୀତି ମାମଲାରୁ ବଞ୍ଚାଇବା ପାଇଁ ହାଇକୋର୍ଟ ଏବଂ ପରେ ସୁପ୍ରିମକୋର୍ଟ ବିଚାରପତି କରାଯାଇଥିଲା। ଏହାପରେ ସେ ଲୋକସଭା ନିର୍ବାଚନ ଲଢ଼ିଥିଲେ।
କିନ୍ତୁ ଆଜିର ସୁପ୍ରିମକୋର୍ଟ ଦେଶର ହିତ ଏବଂ ସମ୍ବିଧାନର ସୁରକ୍ଷା ପାଇଁ କାମ କରୁଛନ୍ତି। ସେଥିପାଇଁ ଏଭଳି ଦେଶହିତକର ରାୟ ଆସିପାରୁଛି।
ସାମାଜିକ ପ୍ରଭାବ ଏବଂ ଡେମୋଗ୍ରାଫିରେ ପରିବର୍ତ୍ତନ
ପଞ୍ଜାବ, ଆନ୍ଧ୍ରପ୍ରଦେଶ ଏବଂ ଛତିଶଗଡ଼ ଭଳି ରାଜ୍ୟରେ ଆଜି ଧର୍ମାନ୍ତରଣ ଏକ ବଡ଼ ସମସ୍ୟା ଭାବେ ଉଭା ହୋଇଛି। ବିଶେଷ କରି ସୀମାନ୍ତବର୍ତ୍ତୀ ରାଜ୍ୟ ଏବଂ ଜନଜାତି ଅଧ୍ୟୁଷିତ ଅଞ୍ଚଳରେ ଲୋକଙ୍କୁ ଭ୍ରମିତ କରି ଧର୍ମ ପରିବର୍ତ୍ତନ କରାଯାଉଛି। ଏହି ଧର୍ମାନ୍ତରଣ କେବଳ ଧର୍ମ ବଦଳାଉ ନାହିଁ, ବରଂ ଦେଶର ରାଜନୈତିକ ଏବଂ ସାମାଜିକ ସ୍ଥିରତାକୁ ମଧ୍ୟ ପ୍ରଭାବିତ କରୁଛି।
ସୁପ୍ରିମକୋର୍ଟଙ୍କ ଏହି ରାୟ ପରେ, ଧର୍ମାନ୍ତରଣର ଗତି ହ୍ରାସ ପାଇବାର ସମ୍ଭାବନା ରହିଛି। ଯେଉଁମାନେ କେବଳ ସଂରକ୍ଷଣ ସୁବିଧାକୁ ଅସ୍ତ୍ର କରି ଧର୍ମ ବଦଳାଉଥିଲେ, ସେମାନେ ଏବେ ସଚେତନ ହେବେ।
ଯଦି ଏହି ବ୍ୟବସ୍ଥା ଭାରତ ସ୍ୱାଧୀନତା ପରଠାରୁ ଲାଗୁ ହୋଇଥାନ୍ତା ତେବେ କାଞ୍ଚିପୁରମର ଜଣେ ମନ୍ଦିର ପରିଚାଳକ ଶଙ୍କରାରମଣଙ୍କୁ ହତ୍ୟା ଷଡ଼ଯନ୍ତ୍ର ଅଭିଯୋଗରେ କାଞ୍ଚି କାମକୋଟି ପୀଠମର ୬୯ତମ ଶଙ୍କରାଚାର୍ଯ୍ୟ ଜୟେନ୍ଦ୍ର ସରସ୍ୱତୀଙ୍କୁ ତାମିଲନାଡୁ ପୋଲିସ ୧୧ ନଭେମ୍ବର ୨୦୦୪ରେ ଦୀପାବଳି ରାତିରେ ଗିରଫ କରିଥିଲା। ଶଙ୍କରାଚାର୍ଯ୍ୟ ଜୟେନ୍ଦ୍ର ସରସ୍ୱତୀ ଗିରଫ ହେବା ସାରା ଭାରତରେ ଆତଙ୍କ ସୃଷ୍ଟି କରିଥିଲା। ୨୦୧୩ରେ ପୁଡୁଚେରୀ କୋର୍ଟ ତାଙ୍କୁ ସମସ୍ତ ଅଭିଯୋଗରୁ ମୁକ୍ତ କରିଥିଲେ। ସେ ଧର୍ମାନ୍ତରୀକରଣକୁ ବିରୋଧ କରୁଥିବାରୁ ଜୟଲଳିତାଙ୍କ ସରକାର ତାଙ୍କୁ ଗିରଫ କରିଥିଲା।
କେବଳ ସେହି ଗୋଟିଏ ଘଟଣା ନୁହେଁ। ଆମ ରାଜ୍ୟ ଫୁଲବାଣୀରେ ଧର୍ମାନ୍ତରୀକରଣକୁ ନେଇ କନ୍ଧ-ଖ୍ରୀଷ୍ଟିଆନ ଧର୍ମକୁ ଧର୍ମାନ୍ତରିତ ହୋଇଥିବା ଅନୁସୂଚିତ ଜାତି ମଧ୍ୟରେ ୧୯୯୦, ୨୦୦୭ ଓ ୨୦୦୮ରେ ଜାତିଗତ ଦଙ୍ଗା ହୋଇନଥାନ୍ତା। ଏପରିକି ସ୍ୱାମୀ ଲକ୍ଷ୍ମଣାନନ୍ଦ ସରସ୍ୱତୀଙ୍କୁ ଧର୍ମାନ୍ତରୀକରଣ ଆନ୍ଦୋଳନ କରିବାକୁ ପଡ଼ିନଥାନ୍ତା ଓ ୨୦୦୮ ଅଗଷ୍ଟ ୨୩ରେ ଆତତାୟୀଙ୍କ ଗୁଳିରେ ତାଙ୍କ ମୃତ୍ୟୁ ହୋଇନଥାନ୍ତା।
୧୯୯୯ରେ ଧର୍ମାନ୍ତରଣ କରୁଥିବା ଅଷ୍ଟ୍ରେଲୀୟ ମିଶନାରୀ ଗ୍ରାହାମ ଷ୍ଟେନ୍ସ ଓ ତାଙ୍କ ଦୁଇ ଶିଶୁ ପୁତ୍ରଙ୍କର ହତ୍ୟାକାଣ୍ଡ ହୋଇନଥାନ୍ତା। ଏହି ହତ୍ୟାକାଣ୍ଡ ଅଭିଯୋଗରେ ରବିନ୍ଦ୍ର ପାଲ ଓରଫ ଦାରା ସିଂହ ଗତ ୨୭ ବର୍ଷ ହେଲା ଜେଲରେ ରହି ନିଜ ଭାଗ୍ୟକୁ ନିନ୍ଦୁ ନ ଥାନ୍ତେ।
ଶେଷରେ ଏତିକି କହିବି, ଆମ ସମାଜକୁ ଭିତରୁ ଓ ବାହାରୁ ଭାଙ୍ଗିବା ପାଇଁ ଅନେକ ଶକ୍ତି ଲାଗି ପଡ଼ିଛନ୍ତି। ଏଭଳି ସମୟରେ ଆମକୁ ଏବଂ ଆମ ସମ୍ବିଧାନକୁ ସଜାଗ ରହିବାକୁ ହେବ। ସୁପ୍ରିମକୋର୍ଟଙ୍କ ଏହି ଦୁଇଟି ରାୟ ଦର୍ଶାଉଛି ଯେ ଭାରତ ଏବେ ନିଜର ଅସ୍ତିତ୍ୱ ରକ୍ଷା ପାଇଁ ପ୍ରସ୍ତୁତ।
AlsoRead; https://purvapaksa.com/naveen-misquoted-the-party-leader/
ଦଳୀୟ ନେତାଙ୍କୁ ମିଛୁଆ କଲେ ନବୀନ! || Naveen misquoted the party leader!
