Pandian has cleverly outmaneuvered Naveen II ନବୀନଙ୍କୁ ପଦାରେ ପକାଇଦେଲେ ପାଣ୍ଡିଆନ!

ଓଡ଼ିଶା ରାଜନୀତିରେ ବିଜୁ ଜନତା ଦଳର ସଭାପତି ତଥା ବିଗତ ୨୪ବର୍ଷର ପୂର୍ବତନ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଏକ ଅବିସ୍ମରଣୀୟ ଅଧ୍ୟାୟ। ଜଣେ ଶାନ୍ତ, ସରଳ, କିନ୍ତୁ ଅଦମ୍ୟ ସଂକଳ୍ପବାନ ନେତା ଯିଏ ଦୁଇ ଦଶକ ଧରି ରାଜ୍ୟର ଶାସନ ଡୋରୀକୁ ନିଜ ନିୟନ୍ତ୍ରଣରେ ରଖିଥିଲେ। କିନ୍ତୁ ୨୦୨୪ର ନିର୍ବାଚନ ଓ ତାହା ପରବର୍ତ୍ତୀ ଘଟଣାବଳୀ ଏହି ଦୀର୍ଘ ଯୁଗରେ ଏକ ନୂତନ ମୋଡ଼ ଆଣିଦେଲା। ଏବେ ଲୋକମାନେ ଯେଉଁ ପ୍ରଶ୍ନ ଉଠାଉଛନ୍ତି, ତାହା ହେଲା ନବୀନଙ୍କୁ ଏପରି ଅବସ୍ଥାରେ କିଏ ପକାଇଲା? ଏହାର ଉତ୍ତର ନିଶ୍ଚିତ ଭାବରେ ଆସିବ, ଆଉ କେହି ନୁହନ୍ତି; ସେ ହେଉଛନ୍ତି ନବୀନଙ୍କ ଅତ୍ୟନ୍ତ ବିଶ୍ୱସ୍ତ ଭୈରବ କାର୍ତ୍ତିକେୟନ ପାଣ୍ଡିଆନ।

ପାଣ୍ଡିଆନ: ସେବାକାରୀରୁ ରାଜନୀତିକ ମସ୍ତିଷ୍କ ପର୍ଯ୍ୟନ୍ତ

ଭୈରବ କାର୍ତ୍ତିକେୟନ ପାଣ୍ଡିଆନନବୀନଙ୍କ ବିଶ୍ୱସ୍ତ ଅଧିକାରୀ ଭାବରେ ଓଡ଼ିଶା ଶାସନ ବ୍ୟବସ୍ଥାରେ ପ୍ରବେଶ କରିଥିଲେ। ପ୍ରାରମ୍ଭିକ ଅବସ୍ଥାରେ ସେ ଥିଲେ ଅତ୍ୟନ୍ତ ଶିଷ୍ଟ, ସଂଯମୀ, ଓ ଦକ୍ଷ- ଯାହା ତାଙ୍କୁ ନବୀନଙ୍କ ଆସ୍ଥା ଜିତିବାରେ ସାହାଯ୍ୟ କରିଥିଲା। କିନ୍ତୁ ସେଇ ଆସ୍ଥା ପାଇବା ପରେ ରାଜ୍ୟ ଶାସନ ଓ ବିଜେଡି ରାଜନୀତିରେ ତାଙ୍କ ପ୍ରଭାବ ଏତେ ପ୍ରଗାଢ଼ ହେଲା ଯେ ନବୀନଙ୍କ ଅଧିକାଂଶ ନିଷ୍ପତ୍ତି ତାଙ୍କ ପରାମର୍ଶ ଉପରେ ନିର୍ଭର କରିବା ଆରମ୍ଭ କଲା।

୨୦୨୪ ନିର୍ବାଚନ ପୂର୍ବରୁ, ଯେତେବେଳେ ବିଜେଡି ରାଜ୍ୟରେ ଅଭୂତପୂର୍ବ ଚାପ ମୁହାଁ ହେଉଥିଲା, ସେତେବେଳେ ପାଣ୍ଡିଆନ ଦଳର ସମଗ୍ର ନିର୍ବାଚନ ପରିଚାଳନାକୁ ନିଜ ହାତକୁ ନେଲେ। ନବୀନଙ୍କୁ ରୁଗୁଣ ଦେଖି ସେ ନିଜକୁ “ଷ୍ଟାର ପ୍ରଚାରକ” ଭାବେ ପ୍ରକାଶ କଲେ- ଏକ ଅଦ୍ଭୁତ ଘଟଣା ଯେଉଁଥିରେ ଜଣେ ପୂର୍ବ ପ୍ରଶାସନିକ ଅଧିକାରୀ ରାଜନୀତିର ମଞ୍ଚରେ ମୁଖ୍ୟ ପ୍ରଚାରକ ହେଲେ। ବିଜେଡିର ଆଉ କୌଣସି ପ୍ରଭାବଶାଳୀ ତଥା ଲୋକପ୍ରିୟ ରାଜନେତାଙ୍କୁ ଏଥିରେ ସାମିଲ କରାଗଲା ନାହିଁ। କାରଣ ଥିଲା ପାଣ୍ଡିଆନ ନିଜକୁ ସବୁଠାରୁ ବଡ଼ ରାଜନେତା ଭାବେ ପ୍ରତିଷ୍ଠା କରିବା ସହିତ ଦଳର ନେତୃତ୍ୱ ନେବେ ଓ ରାଜ୍ୟକୁ ଶାସନ କରିବା ଯୋଜନାରେ ଥିଲେ।

ନବୀନଙ୍କ ସ୍ୱାସ୍ଥ୍ୟ: ଗୋପନୀୟତାରୁ ଖୋଲା ଆଲୋଚନା ପର୍ଯ୍ୟନ୍ତ

୨୦୨୪ ନିର୍ବାଚନ ପରିଚାଳନାବେଳେ ପାଣ୍ଡିଆନ ସବୁ ସମୟରେ ନବୀନଙ୍କ ପାଖେ ପାଖେ ରହୁଥିଲେ। ସଭାସ୍ଥଳରେ ନବୀନଙ୍କ ହାତ ଥରିଲେ ସେ ମାଇକ ଧରିବା ବାହାନାରେ ଭାଷଣ ସମୟରେ ତାଙ୍କ ହାତକୁ ସମ୍ଭାଳୁ ଥିଲେ। ଏହି ସବୁ ଚିତ୍ର ଓ ଭିଡିଓ ଜନସାଧାରଣ ଦେଖିବାରୁ ଏକ ଚିନ୍ତାଜନକ ଚିତ୍ର ସେମାନଙ୍କ ମନରେ ଗଢ଼ି ଉଠିଲା- “ନବୀନ କ’ଣ ପୂର୍ବଭଳି ସୁସ୍ଥ ନାହାନ୍ତି କି?”

ପାଣ୍ଡିଆନ ଯେତେବେଳେ ନବୀନଙ୍କ ରୁଗୁଣ ସ୍ୱାସ୍ଥ୍ୟକୁ ଲୁଚାଇବାରେ ଶେଷ ଚେଷ୍ଟା କରୁଥିଲେ, ସେତେବେଳେ ନିର୍ବାଚନ ଫଳାଫଳ ତାଙ୍କ ପ୍ରୟାସ ଓ ଲୁକ୍‍କାୟିତ ଯୋଜନାକୁ ବିଫଳ କଲା। ବିଜେଡି ଦଳ ପ୍ରଥମ ଥର ପାଇଁ ଏତେ ଭାରୀ ଆଘାତ ପାଇଲା ଯେ ଏହାକୁ ଦଳୀୟ ମହଲରେ “ନବୀନଙ୍କ ସ୍ୱାସ୍ଥ୍ୟ ରାଜନୀତି” ବୋଲି କୁହାଯାଇ ଦଳୀୟ ନେତାମାନଙ୍କୁ ଚୁପ୍‍ କରାଗଲା।

ପରଦା ପଛରେ ରହିଲେ ନବୀନ- ପାଣ୍ଡିଆନ ଆଗରେ

ନିର୍ବାଚନ ପରେ ନବୀନ ପଟ୍ଟନାୟକ ଦଳୀୟ ମଞ୍ଚରେ ବହୁତ କମ୍ ଦେଖା ଦେଲେ। ତାଙ୍କ ପକ୍ଷରୁ ବିଭିନ୍ନ ନିଷ୍ପତ୍ତି, ନିୟୋଜନ, ବିଜେଡିର ପଲିଟିକାଲ ଆଫେୟାର କମିଟିର କାର୍ଯ୍ୟସୂଚୀ- ସବୁକିଛି ଏବେ ପାଣ୍ଡିଆନ ମାଧ୍ୟମରେ ଚାଲିଛି ବୋଲି ଦଳୀୟ ମହଲ ସ୍ୱୀକାର କରୁଛି।

ବିଜେଡି ନେତାମାନଙ୍କ କହିବା ଅନୁସାରେ; “ନବୀନ ସାର ଏବେ ବି ବିଜେଡିର ଆତ୍ମା ଅଟନ୍ତି, କିନ୍ତୁ ଶରୀର ଚାଳାଉଛନ୍ତି ପାଣ୍ଡିଆନ।”

ଏହି ବାକ୍ୟ ବାସ୍ତବରେ ବିଜେଡିର ଆଜିର ରାଜନୀତିକ ସତ୍ୟକୁ ଉଦ୍‌ଘାଟିତ କରୁଛି।

ପାଣ୍ଡିଆନଙ୍କ ଯୋଜନା: ନୂତନ ଶକ୍ତି ସଂରଚନାର ସୂଚନା?

ନବୀନଙ୍କ ରୁଗୁଣ ସ୍ୱାସ୍ଥ୍ୟକୁ ଏବେ ପାଣ୍ଡିଆନ ଆଉ ଲୁଚାଇବାକୁ ଚେଷ୍ଠା କରୁନାହାନ୍ତି। ବିପରୀତ ଭାବେ, ତାହାକୁ ସାମ୍ନାକୁ ଆଣିବା ମାଧ୍ୟମରେ ସେ ଏକ ନୂତନ ନାରେଟିଭ ଗଢ଼ୁଛନ୍ତି- ଯେଉଁଥିରେ “ନବୀନ ହେଉଛନ୍ତି ଗୁରୁ, ମୁଁ ଶିଷ୍ୟ; ଏବେ ଶିଷ୍ୟ ଗୁରୁଙ୍କ ଅସୁସ୍ଥତା ସମୟରେ ଦାୟିତ୍ୱ ନେଉଛି।” ଏହି ରାଜନୀତିକ ସଂକେତ ଦଳର ଭିତରେ ଗଭୀର ଅର୍ଥ ରଖିଛି।

ଏହା ପଛରେ ପାଣ୍ଡଆନଙ୍କର କିଛି ସୁଚିନ୍ତିତ ଚାଲ ଥାଇପାରେ ବୋଲି ଆଲୋଚନା ହେଉଛି।

ନବୀନଙ୍କୁ ରୁଗୁଣ ଓ କ୍ଳାନ୍ତ ଦର୍ଶାଇ ପାଣ୍ଡିଆନ ତାଙ୍କ ପତ୍ନୀ ତାମିଲ ବୋହୁ ସୁଜାତା ରାଉତ କାର୍ତ୍ତିକେୟନଙ୍କ ମାଧ୍ୟମରେ ଦଳ ହଡ଼ପ ଯୋଜନା କରିଥିବା ଦଳୀୟ ମହଲରେ ଆଲୋଚନା ଏବେ ଜୋର୍‍ ଧରିଛି।

ବିଜେଡିର ପଲିଟିକାଲ ଆଫେୟାର କମିଟିର କିଛି ପ୍ରଭାବଶାଳୀ ନେତାଙ୍କ ସମର୍ଥନ ମିଳିଲେ, ପାଣ୍ଡିଆନ ସଂଗଠନ ଓ ଦଳ ଦୁହିଁକୁ ନିଜ ଅକ୍ତିଆରରେ ନେବା ଯୋଜନା ରଖିଛନ୍ତି ବୋଲି ଦଳ ଭିତରେ ଏବେ ଚର୍ଚ୍ଚା ଚାଲିଛି। ତାଙ୍କ ପତ୍ନୀ ସୁଜାତା ରାଉତ କାର୍ତ୍ତିକେୟନ ବିଜେଡି ଭିତରେ ଭବିଷ୍ୟତ ଶାସକ ମଣ୍ଡଳୀ ଗଢ଼ିବା ଯୋଜନାର ଅଂଶ ହେବେ ବୋଲି କୁହାଯାଉଛି।

ନୂଆପଡ଼ା ଉପନିର୍ବାଚନ: ଆଗାମୀ ରାଜନୀତିର ଆଭାସ

ଏବେ ସମସ୍ତଙ୍କ ନଜର ନୂଆପଡ଼ା ଉପନିର୍ବାଚନ ଉପରେ। ଏହି ନିର୍ବାଚନ କେବଳ ଏକ ଆସନର ଲଢ଼େଇ ନୁହେଁ; ଏହା ହେଉଛି ନବୀନ ଓ ପାଣ୍ଡିଆନଙ୍କ ମଧ୍ୟରେ ଆସନ୍ତା କ୍ଷମତା ହସ୍ତାନ୍ତରର ପ୍ରାରମ୍ଭ।

ଯଦି ବିଜେଡି ଏଠାରେ ହାରିଯାଏ, ତେବେ ପାଣ୍ଡିଆନ ସହଜ ଭାବରେ ଦଳ ଭିତରେ ଏହାକୁ “ନବୀନଙ୍କ ଦୁର୍ବଳ ସ୍ୱାସ୍ଥ୍ୟ” ଉପରେ ଦୋଷ ଦେବେ ଓ “ନୂତନ ନେତୃତ୍ୱ” ଆବଶ୍ୟକ ବୋଲି ପ୍ରସଙ୍ଗ ଉଠାଇବେ। ଏହା ହେଲା ତାଙ୍କର ଦଳୀୟ ନେତୃତ୍ୱ ଜାହିର କରିବାର ପ୍ରଥମ ଦଉଡ଼।

ଏହି ସମୟରେ ବିଜେଡିର ପଲଟିକାଲ ଆଫେୟାର କମିଟିରେ ଥିବା ନେତାଙ୍କ ସମର୍ଥନରେ ପାଣ୍ଡିଆନ ବିଜେଡିକୁ ଅକ୍ତିଆର କରିନେବାର ଯୋଜନା କରିଥିବା ମଧ୍ୟ ଆଲୋଚନା ହେଉଛି।

ନବୀନଙ୍କ ନୀରବତା

ନବୀନ ପଟ୍ଟନାୟକଙ୍କ ନୀରବତା ଏହି ସମୟରେ ଅନେକ ଅର୍ଥ ବୁଝାଉଛି। ତାଙ୍କ ସମର୍ଥକମାନେ ମନେ କରୁଛନ୍ତି ଯେ ସେ ଅସୁସ୍ଥ ଓ କ୍ଳାନ୍ତ, କିନ୍ତୁ ତାଙ୍କ ମନ ଆହୁରି ସତର୍କ ଅଛି। ସେ ବିଜେଡିକୁ “ଜନସେବା ରାଜନୀତି” ଭାବେ ଗଢ଼ିଥିଲେ, ଯେଉଁଠି ଦଳୀୟ ସଂଗଠନ ମଧ୍ୟରେ କେହି କ୍ଷମତାଶାଳୀ ହୋଇପାରିବେ ନାହିଁ। କିନ୍ତୁ ଏବେ ଏହି ଆଦର୍ଶ ଗଭୀର ସମସ୍ୟାରେ ପଡ଼ିଛି।

ନବୀନଙ୍କ ଅନୁପସ୍ଥିତିରେ ଦଳ ଭିତରେ ଯେଉଁ “ପାଣ୍ଡିଆନଙ୍କୁ କ୍ଷମତାଶାଳୀ” ଦେଖାଯାଉଛି, ସେ ଦୀର୍ଘମିଆଦି ଭାବେ ଦଳର ସଂଗଠନ ଭିତ୍ତିଭୂମିକୁ ଦୁର୍ବଳ କରିଦେବେ। ଦଳ ଭିତ୍ତିଭୂମି ଦୋହଲିଲେ ପାଣ୍ଡିଆନ ତ୍ରାଣକର୍ତ୍ତା ଭାବେ ବାହାରି ପୁଣି ନିଜର ରାଜନୈତିକ ଇଚ୍ଛାକୁ ଜାହିର କରିବେ।

ସାମାଜିକ ଓ ରାଜନୀତିକ ପ୍ରତିଫଳନ

ଓଡ଼ିଶା ଜନସାଧାରଣ ନବୀନଙ୍କୁ ଜଣେ “ସ୍ଵଚ୍ଛ ଓ ଭିନ୍ନ ନେତା” ଭାବେ ଦେଖି ଆସୁଛନ୍ତି। ତାଙ୍କ ସ୍ଥାନରେ ଯଦି ଜଣେ ତାମିଲ ଅଧିକାରୀ ବିଜୁ ଜନତା ଦଳ ନିୟନ୍ତ୍ରଣ କରିବେ- ଏହା ଓଡ଼ିଆ ଆତ୍ମସମ୍ମାନ ଓ ରାଜ୍ୟ ଗୌରବର ପ୍ରଶ୍ନ ହେଇପାରେ। ଏହି ଭାବନାକୁ ବିପକ୍ଷ ଦଳଗୁଡ଼ିକ ଆଗାମୀ ନିର୍ବାଚନରେ ଜୋରଦାର ଭାବେ ଉଠାଇବାକୁ ପୁଣି ସୁଯୋଗ ମିଳିବା ନିଶ୍ଚିତ।

ନବୀନଙ୍କ ଛାୟାରେ ପାଣ୍ଡିଆନ ରାଜନୀତି

ନବୀନ ପଟ୍ଟନାୟକଙ୍କ ଶକ୍ତି ସବୁବେଳେ ତାଙ୍କ ନିରୀହ, ଶିଷ୍ଟ ଓ ମୃଦୁ ଭାଷାରେ ଥିଲା। ପାଣ୍ଡିଆନଙ୍କ ଶକ୍ତି ଥିଲା ଦକ୍ଷ ପରିଚାଳନା, ଅଦ୍ଭୁତ ରାଜନୀତିକ ଗଣନା ଓ ସଂଘଟିତ ପ୍ରଶାସନିକ ଦୃଷ୍ଟିକୋଣ। କିନ୍ତୁ ଦଳ ଭିତରେ ଏହି ଦୁଇ ଶୈଳୀର ସଂଘର୍ଷ ଏବେ ସ୍ପଷ୍ଟ ହେବାରେ ଲାଗିଛି।

ପାଣ୍ଡିଆନ ଯଦି ନବୀନଙ୍କ ଆଶୀର୍ବାଦ ନେଇ ଦଳର ନେତୃତ୍ୱ ଗ୍ରହଣ କରନ୍ତି, ତେବେ ଏହା ଏକ ସୁଚିନ୍ତ୍ରିତ କ୍ଷମତା ହସ୍ତାନ୍ତର ହେବ। କିନ୍ତୁ ଯଦି ସେ ଶକ୍ତି ହଡ଼ପ କରିବା ପ୍ରୟାସ କରନ୍ତି, ତେବେ ବିଜେଡି ରାଜନୀତି ଏକ ଗଭୀର ଆନ୍ତରିକ ସଂକଟ ଦେଖିପାରେ।

ଉପସଂହାର

୨୦୨୪ ପରେ ଓଡ଼ିଶାର ରାଜନୀତି ନୂଆ ଦିଗରେ ଗତି ନେଇଛି। ନବୀନ ପଟ୍ଟନାୟକ ଏବେ ବିଜେଡିର ପ୍ରତୀକ ଅଛନ୍ତି, କିନ୍ତୁ ତାହାର ଚାଳକ ଆସନରେ ବସିଛନ୍ତି ଜଣେ ତାମିଲନାଡ଼ୁର ମୂଳନିବାସୀ ପୂର୍ବତନ ପ୍ରଶାସନିକ ଅଧିକାରୀ ଭୈରବ କାର୍ତ୍ତିକେୟନ ପାଣ୍ଡିଆନ।

ପାଣ୍ଡିଆନଙ୍କ ଚାଲ ନବୀନଙ୍କୁ ପଦାରେ ପକାଇ ସେ ନିଜକୁ ଦଳର କେନ୍ଦ୍ରବିନ୍ଦୁ କରିଛନ୍ତି। ପ୍ରଶ୍ନ ହେଲା- ଏହା କି ଗୁରୁଙ୍କ ଆଶୀର୍ବାଦ ଫଳ, ନା ଶିଷ୍ୟଙ୍କ ଚତୁର ଚାଲ?

ଓଡ଼ିଶା ଏହି ଉତ୍ତର ଅପେକ୍ଷାରେ ଅଛି।

Also readhttps://purvapaksa.com/naveens-poor-health-a-disaster-or-an-asset-for-bjd/

Naveen’s poor health – a disaster or an asset for BJD? ।। ନବୀନଙ୍କ ରୁଗୁଣ ସ୍ୱାସ୍ଥ୍ୟ – ବିଜେଡି ପାଇଁ ବିପତ୍ତି ନା ସମ୍ପତ୍ତି?

Purva Paksha