ବିଜେଡି ଶିବିରରେ ନୀରବତା, ବିଜେପିରେ ନୂତନ ଉତ୍ସାହ ,ଓଡ଼ିଶାର ରାଜନୀତିକ ପଟଭୂମିରେ ଗତ ମାସଗୁଡ଼ିକ ରହିଛି ଅତ୍ୟନ୍ତ ଅସ୍ଥିର। ବିଜୁ ଜନତା ଦଳ (ବିଜେଡି) ଯେଉଁ ଦଳ ଦୁଇ ଦଶନ୍ଧିରୁ ଅଧିକ ସମୟ ଧରି ରାଜ୍ୟରେ ନିରବିଛିନ୍ନ ଶାସନ କରିଆସିଛି, ସେହି ଦଳରୁ ଜଣକ ପରେ ଜଣେ ନେତା ବାହାରି ଯାଉଛନ୍ତି। ବିଶେଷ କରି ବିଗତ କିଛି ଦିନ ମଧ୍ୟରେ ଅମର ପଟ୍ଟନାୟକ ଓ ଲମ୍ବୋଦର ନିଆଲଙ୍କ ବିଜେପିରେ ଯୋଗଦାନ, ରାଜ୍ୟର ରାଜନୀତିକ ସମୀକରଣକୁ ନୂଆ ଦିଗ ଦେଇଛି। ଏହି ଘଟଣା, ବିଜେପି ନେତା ଜୟନାରାୟଣ ମିଶ୍ରଙ୍କ ପୂର୍ବ ଭବିଷ୍ୟବାଣୀକୁ ପ୍ରାୟ ସତ୍ୟ ପ୍ରମାଣିତ କରିଛି ଯେ, “ବିଜେଡି ଭିତରୁ ବିଜେପିରେ ବଡ଼ ଧାରା ଆସିବ, ଏହା ଅବଶ୍ୟମ୍ଭାବୀ।”
ବିଜେପିରେ ଯୋଗଦେବା ଧାରା ଚାଲିଛି
ବିଜେପି ରାଜ୍ୟରେ ଶାସନ କ୍ଷମତାକୁ ଆସିବା ପରେ ଓଡ଼ିଶାରେ ଦଳର ଶକ୍ତି ବୃଦ୍ଧି ପାଇଛି। ବିଜେଡିର ଅନେକ ନେତା, ବିଶେଷ କରି ପାଣ୍ଡିଆନ୍ଙ୍କ ବୃଦ୍ଧିଶୀଳ ପ୍ରଭାବ ପ୍ରତି ଅସନ୍ତୋଷରେ ଅଛନ୍ତି। ଏହାକୁ ଆଧାର କରି ବିଜେପି ରାଜ୍ୟ ଅଧ୍ୟକ୍ଷ ମନମୋହନ ସାମଲଙ୍କ ନେତୃତ୍ୱରେ ଦଳ ତାର ସମ୍ପ୍ରସାରଣ ଅଭିଯାନ ଚଳାଇଛି। ଅମର ପଟ୍ଟନାୟକଙ୍କ ଯୋଗଦାନକୁ ଆଗାମୀ ଦିନରେ ରାଜ୍ୟ ରାଜନୀତିର “ରାଜନୈତିକ ସଂକେତ” ବୋଲି ଅନେକ ରାଜନୀତି ବିଶ୍ଳେଷକ ଦେଖୁଛନ୍ତି। ଏହା ପୂର୍ବରୁ ରାଜ୍ୟସଭା ସାଂସଦ ମମତା ମହାନ୍ତ, ସୁଜିତ କୁମାର ବିଜେଡି ଛାଡ଼ି ବିଜେପିରେ ଯୋଗ ଦେଇଛନ୍ତି।
ଅମର ପଟ୍ଟନାୟକ — ଏକ ସୁସଂଘଟିତ ଯୋଗଦାନ
ସରକାରୀ ଚାକିରି ଛାଡ଼ିବା ପରେ ଅମର ପଟ୍ଟନାୟକ ୨୦୧୮ ଅଗଷ୍ଟ ୨୯ ତାରିଖରେ ବିଜେଡିରେ ସାମିଲ ହୋଇଥିଲେ। ଏହାପରେ ଦଳର ଆଭିମୁଖ୍ୟ, ବାର୍ତ୍ତା ଓ ସରକାରଙ୍କ ବିଭିନ୍ନ କାର୍ଯ୍ୟକ୍ରମ ସମ୍ପର୍କରେ ଲୋକମାନଙ୍କୁ ସଠିକ୍ ଓ ତ୍ଵରିତ ସୂଚନା ପ୍ରଦାନ କରିବା ପାଇଁ ଅମରଙ୍କ ନେତୃତ୍ୱରେ ବିଜେଡି ଆଇଟି ସେଲ୍ ଗଠନ ହୋଇଥିଲା। ଏହାର ଅଧ୍ୟକ୍ଷଭାବେ ଦଳର ମୁଖପାତ୍ର ଅମର ପଟ୍ଟନାୟକଙ୍କୁ ବିଜେଡି ସଭାପତି ନବୀନ ପଟ୍ଟନାୟକ ନିଯୁକ୍ତ ଦେଇଥିଲେ ।
ଏହାପରେ ୨୦୧୯ରେ ବିଜୁ ଜନତା ଦଳ ଅମର ପଟ୍ଟନାୟକ ରାଜ୍ୟସଭା ପ୍ରାର୍ଥୀ ଭାବେ ଘୋଷଣା କରିଥିଲେ। ୨୦୧୯ରେ ସେ ନିର୍ଦ୍ଵନ୍ଦ୍ଵରେ ରାଜ୍ୟସଭାକୁ ନିର୍ବାଚିତ ହୋଇଥିଲେ ।
ପୂର୍ବତନ ରାଜ୍ୟସଭା ସାଂସଦ ଅମର ପଟ୍ଟନାୟକ, ଅନେକଙ୍କ ଦୃଷ୍ଟିରେ ବିଜେଡିର ବିଶ୍ୱସ୍ତ ନେତାଙ୍କ ମଧ୍ୟରୁ ଜଣେ ଥିଲେ। ପାଣ୍ଡିଆନ୍ କ୍ୟାମ୍ପରେ ତାଙ୍କ ସ୍ଥାନ ସୁଦୃଢ଼ ଥିଲେ ମଧ୍ୟ, ଶେଷରେ ତାଙ୍କ ନିଜସ୍ୱ ସ୍ଥିତି ଦୁର୍ବଳ ହେଲା। ପର୍ଯ୍ୟବେକ୍ଷକମାନେ ମନେକରନ୍ତି; ପାର୍ଟିର ନିଷ୍ପତ୍ତି ନେବା ପ୍ରକ୍ରିୟା ଏବେ ପ୍ରାୟ ସମ୍ପୂର୍ଣ୍ଣ ଭାବେ ଏକ ପ୍ରଶାସନିକ ଦଳ ଓ କୋର୍ ଗ୍ରୁପ୍ ନିୟନ୍ତ୍ରଣ କରୁଛି। ଏବେ ଦଳର ଅନେକ ଜ୍ଞାନୀ, ଅଭିଜ୍ଞ ଓ ଜନସମ୍ପୃକ୍ତ ନେତା ଅବହେଳିତ ମନେ କରୁଛନ୍ତି। ଅମରଙ୍କ ବିଜେପିରେ ଯୋଗଦାନ, ସେହି ସନ୍ତୋଷବିହୀନ ଶିବିର ପାଇଁ ଏକ ପଥ ଖୋଲିଦେଇଛି।
ପୂର୍ବତନ ସାଂସଦଙ୍କୁ ସ୍ୱାଗତ କରି ମୁଖ୍ୟମନ୍ତ୍ରୀ ମୋହନ ମାଝୀ କହିଛନ୍ତି ଯେ ପଟ୍ଟନାୟକ ବିଜେଡି ଭିତରେ ଥିବା “ରାଜନୈତିକ ଶ୍ୱାସରୁଦ୍ଧ” ପରିବେଶରୁ ନିଜକୁ “ମୁକ୍ତ” କରିଛନ୍ତି। “ଅମର ପଟ୍ଟନାୟକ ବିଜେଡି ପାଇଁ କାମ କରିବା ସମୟରେ ଶ୍ୱାସରୁଦ୍ଧ ଅନୁଭବ କରିଥିଲେ। ତାଙ୍କ ପାଇଁ କୌଣସି ସୁଯୋଗ ନ ଥିଲା। ଆଜି, ସେ ଏକ ଏକୀକୃତ ଜାତୀୟ ଦୃଷ୍ଟିକୋଣକୁ ମନରେ ରଖି ବିଜେପିରେ ଯୋଗ ଦେଇଛନ୍ତି। ଏଠାରେ ଦେଶ ପାଇଁ କାମ କରିବାର ପ୍ରଚୁର ସୁଯୋଗ ଅଛି। ମୁଁ ନିଶ୍ଚିତ ଯେ ସେ ଆମ ପାଇଁ କାମ କରିବା ସହିତ ମହାନ କୀର୍ତ୍ତିମାନ ହାସଲ କରିବେ ଏବଂ ମୁଁ ମଧ୍ୟ ତାଙ୍କ ସହିତ ସମସ୍ତ ଦିଗରେ ସହଯୋଗ କରିବି ବୋଲି ମୁଖ୍ୟମନ୍ତ୍ରୀ ମାଝୀ କହିଛନ୍ତି।
ପାଣ୍ଡିଆନ୍ କ୍ୟାମ୍ପରେ ଅସନ୍ତୋଷ?
ଅମର ପଟ୍ଟନାୟକ ଓ ଲମ୍ବୋଦର ନିଆଲ ଦୁଇଜଣ ମଧ୍ୟ, ପାଣ୍ଡିଆନଙ୍କ ସହିତ ସମ୍ପର୍କିତ ଥିଲେ। ତେଣୁ ସେମାନଙ୍କର ଦଳ ଛାଡ଼ିବାକୁ “ସଂଗଠନ ଭିତରେ ଅସନ୍ତୋଷର ସ୍ପଷ୍ଟ ପ୍ରମାଣ”ଭାବେ ଅନେକେ ଦେଖୁଛନ୍ତି । ଏହାକୁ ବିଜେପି ନେତାମାନେ ତାଙ୍କ ପକ୍ଷରେ ରାଜନୀତିକ ରାଣନୀତି ଭାବେ ବ୍ୟବହାର କରୁଛନ୍ତି। ଜୟନାରାୟଣ ମିଶ୍ର ସମ୍ପ୍ରତି କହିଥିଲେ- “ଓଡ଼ିଶାର ଲୋକ ଏବେ ପରିବର୍ତ୍ତନ ଚାହୁଁଛନ୍ତି। ବିଜେଡି ମଧ୍ୟରେ ଯେଉଁମାନେ ଅସନ୍ତୁଷ୍ଟ, ସେମାନେ ବିଜେପିରେ ନୂଆ ଆଶା ଦେଖୁଛନ୍ତି।” ତାଙ୍କର ଏହି ମନ୍ତବ୍ୟ ପରେ ଗୋଟିଏ ମାସ ଭିତରେ ଦୁଇଜଣ ବିଜେଡି ନେତା ବିଜେପିରେ ଯୋଗଦେଲେ —ଏହାକୁ ଦେଖି ଦଳ ମଧ୍ୟରେ “ଜୟନାରାୟଣଙ୍କ ଭବିଷ୍ୟବାଣୀ ସତ ହେଉଛି” ଭାବରେ ଚର୍ଚ୍ଚା ଚାଲିଛି।
ନୂଆପଡ଼ା ଉପନିର୍ବାଚନ — ପରିବର୍ତ୍ତନର ଟେଷ୍ଟ କେସ୍
ନୂଆପଡ଼ା ଉପନିର୍ବାଚନକୁ ଏବେ ସବୁ ଦଳ ରାଜ୍ୟ ରାଜନୀତିର “ଅଗ୍ନି ପରୀକ୍ଷା” ଭାବେ ଦେଖୁଛନ୍ତି। ବିଜେଡି ପାଇଁ ଏହା ହେଉଛି ନିଜ ଗଡ଼ରେ ନିଜର ସ୍ଥିତିକୁ ବଞ୍ଚାଇ ରଖିବା ଯୁଦ୍ଧ ଭଳି, ଯେଉଁଠାରେ ବିଜେପିରେ ସ୍ଥାନୀୟ ନେତାଙ୍କ ଯୋଗଦାନ ଦ୍ୱାରା ଦୃଢ଼ ହେବାରେ ଲାଗିଛି। ବିଶେଷଜ୍ଞମାନଙ୍କ ମତ-ଅମର ପଟ୍ଟନାୟକଙ୍କ ଅଭିଜ୍ଞ ଇମେଜ୍ ଓ ଅଧିକାରିକ ପ୍ରଭାବ, ନୂଆପଡ଼ା ଭୋଟ୍ରେ ବିଜେପିକୁ ଅତିରିକ୍ତ ଭରସା ଦେଇପାରେ।
ଦଳ ଭିତରେ ଚାପ ଓ ନୂତନ ରାଜନୀତିକ ହିସାବ
ବିଜେଡି ଭିତରେ ଯେଉଁପରି ଅସନ୍ତୋଷ ବଢ଼ୁଛି, ବିଜେପି ସେହି ଧାରାକୁ “ସଂଗଠିତ ଭାବେ” ଆକର୍ଷଣ କରୁଛି। ଏହି ପରିସ୍ଥିତିରେ ନିଜ ଦଳର ଯୋଗସଜାଗ, ନେତା-କର୍ମକର୍ତ୍ତା ଭିତ୍ତି ଓ ଭୋଟ୍ ବ୍ୟାଙ୍କ ରକ୍ଷା- ବିଜେଡି ପାଇଁ ମୁଖ୍ୟ ଚାଲେଞ୍ଜ। ସେପରି, ବିଜେପି ଏବେ ସଂଗଠନରେ “ନୂତନ ମୁଖ + ପୁରୁଣା ଅଭିଜ୍ଞ” ମିଶ୍ରଣ ଆଣିବା ରଣନୀତି ନେଇଛି।
ଓଡ଼ିଶାର ରାଜନୀତି ଏବେ ଗୋଟିଏ ପରିବର୍ତ୍ତନଶୀଳ ଅବସ୍ଥାରେ ଅଛି। ପାଣ୍ଡିଆନ୍ଙ୍କ ପ୍ରଭାବ, ବିଜେଡି ଭିତରେ କେନ୍ଦ୍ରୀକୃତ ନିୟନ୍ତ୍ରଣ ଓ ତଳସ୍ତରର ଅସନ୍ତୋଷ- ଏହି ତିନି ମିଶି ଦଳର ଅଭ୍ୟନ୍ତରୀଣ ଆଧାରକୁ ଅସ୍ଥିର କରିଦେଇଛି। ବିଜେପି ସେହି ଅସନ୍ତୋଷକୁ ରାଜନୀତିକ ପ୍ରାସଙ୍ଗିକତା ଦେଇ ନିଜ ପକ୍ଷରେ ଟାଣିବାରେ ସଫଳ ହେଉଛି।
ଜୟନାରାୟଣ ମିଶ୍ରଙ୍କ ଭବିଷ୍ୟବାଣୀ ସତ ହେଉଛି କି ନୁହେଁ, ଏହା ଅଗାମୀ କିଛି ମାସର ରାଜନୀତିକ ପରିଣାମ ନିର୍ଣ୍ଣୟ କରିଦେବ। କିନ୍ତୁ ଏକ କଥା ନିଶ୍ଚିତ-ଓଡ଼ିଶାର ରାଜନୀତିକ ଧାରା ଆଉ ପୂର୍ବବର୍ତ୍ତୀ ନୁହେଁ, ଏବଂ ପରିବର୍ତ୍ତନର ପବନ ଏବେ ପ୍ରକାଶ ହେଉଛି।
also read https://purvapaksa.com/crime-among-indians-living-in-america-increases-by-91-percent/
