ନୂଆବର୍ଷ ପୂର୍ବରୁ ରାଜ୍ୟରେ ମଦ ବିକ୍ରି ପାଇଁ ଅସ୍ଥାୟୀ ଲାଇସେନ୍ସ ଉପରେ କଟକଣା ସହ ରାଜ୍ୟ ସରକାର ମଦ କାରବାର ଉପରେ କଡ଼ା ପଦକ୍ଷେପ ଗ୍ରହଣ କରିଛନ୍ତି ବୋଲି ଅବକାରୀ ମନ୍ତ୍ରୀ ପୃଥ୍ୱୀରାଜ ହରିଚନ୍ଦନ କହିଛନ୍ତି।
ଭୁବନେଶ୍ୱରରେ ଆୟୋଜିତ ଏକ ସାମ୍ବାଦିକ ସମ୍ମିଳନୀରେ ସରକାରଙ୍କ ପଦକ୍ଷେପ ସମ୍ପର୍କରେ ସୂଚନା ଦେଇ ହରିଚନ୍ଦନ କହିଛନ୍ତି ଯେ ଜିରୋ ନାଇଟ ପାଳନ ସମୟରେ ବେଆଇନ ଭାବେ ମଦ ପରିବେଷଣ କରୁଥିବା ବ୍ୟକ୍ତି କିମ୍ବା ଅନୁଷ୍ଠାନ ବିରୋଧରେ କଠୋର କାର୍ଯ୍ୟାନୁଷ୍ଠାନ ଗ୍ରହଣ କରାଯିବ। ୨୦୨୫ ଜାନୁଆରି ଶେଷ ପର୍ଯ୍ୟନ୍ତ କଟକଣା ଲାଗୁ କରିବା ପାଇଁ ହୋଟେଲ,ବାର ଓ ଅନ୍ୟାନ୍ୟ ସୁବିଧା ଉପରେ ନିୟମିତ ଯାଞ୍ଚ କରିବାକୁ ବିଭାଗକୁ ନିର୍ଦ୍ଦେଶ ଦିଆଯାଇଛି।
ବିଭାଗୀୟ ଅଧିକାରୀଙ୍କ ସହ ବୈଠକ ପରେ ଏହି ନିର୍ଦ୍ଦେଶନାମା ଜାରି କରାଯାଇଥିବା ଦର୍ଶାଇ ମନ୍ତ୍ରୀ କହିଛନ୍ତି ଯେ ଶୁକ୍ରବାରଠାରୁ ଜାନୁଆରି ଶେଷ ପର୍ଯ୍ୟନ୍ତ ବେଆଇନ ମଦ ବିକ୍ରି ଉପରେ କଟକଣା ଜାରି ରହିବ।
ସେହିପରି ନୂଆବର୍ଷ ପାଳନ ସମୟରେ ମଦ ବିକ୍ରି ଓ ସମୟ ସମ୍ପର୍କିତ ସରକାରୀ ନିୟମକୁ କଡ଼ାକଡ଼ି ଭାବେ ପାଳନ କରାଯିବ। ଏ ନେଇ ଜିଲ୍ଲାପାଳମାନଙ୍କୁ ନିର୍ଦ୍ଦେଶ ଦିଆଯାଇଛି ବୋଲି ହରିଚନ୍ଦନ କହିଛନ୍ତି।
