ଡୋନାଲ୍ଡ ଟ୍ରମ୍ପଙ୍କ ବିଜୟରୁ ଭାରତକୁ ମିଳିପାରେ ଏହି ୫ଟି ଫାଇଦା, ଜାଣନ୍ତୁ କ୍ଷତି ବିଷୟରେ

ଆମେରିକା ରାଷ୍ଟ୍ରପତି ନିର୍ବାଚନରେ ଡୋନାଲ୍ଡ ଟ୍ରମ୍ପ ବିଜୟୀ ହୋଇଛନ୍ତି। ଫକ୍ସ ନ୍ୟୁଜର ପ୍ରୋଜେକ୍ସନ ଡୋନାଲ୍ଡ ଟ୍ରମ୍ପଙ୍କୁ ବିଜୟୀ ଘୋଷଣା କରିଛି। ଟ୍ରମ୍ପ ତାଙ୍କ ପ୍ରତିଦ୍ୱନ୍ଦ୍ୱୀ କମଳା ହାରିସଙ୍କୁ ପରାସ୍ତ କରିଛନ୍ତି। ଡୋନାଲ୍ଡ ଟ୍ରମ୍ପ ଦ୍ୱିତୀୟ ଥର ପାଇଁ ଆମେରିକାର ରାଷ୍ଟ୍ରପତି ହେବେ। ଆମେରିକା ନିର୍ବାଚନ ମଧ୍ୟ ଭାରତୀୟ ଅର୍ଥନୀତି ପାଇଁ ଅତ୍ୟନ୍ତ ଗୁରୁତ୍ୱପୂର୍ଣ୍ଣ ବୋଲି ବିବେଚନା କରାଯାଏ । ଏଥର ଟ୍ରମ୍ପଙ୍କ ବିଜୟ ଭାରତ ପାଇଁ ଲାଭଦାୟକ ହେବା ସହ କିଛି କ୍ଷତିକାରକ ମଧ୍ୟ ହୋଇପାରେ।

ଏମକେ ଗ୍ଲୋବାଲର ଏକ ବିଶ୍ଳେଷଣରୁ ଜଣାପଡ଼ିଛି ଯେ ରିପବ୍ଲିକାନ୍ ପ୍ରାର୍ଥୀ ଟ୍ରମ୍ପଙ୍କ ବିଜୟ ଭାରତୀୟ ଷ୍ଟକ୍‍ ବଜାରରେ ଉନ୍ନତି ଆଣିପାରେ। ଏହାର ପ୍ରଭାବ ବୁଧବାର ମଧ୍ୟ ଦେଖିବାକୁ ମିଳିଥିଲା। ଏଥିସହିତ ବିଦେଶୀ ପୋର୍ଟଫୋଲିଓ ନିବେଶରେ ଉନ୍ନତି ଓ ପୁଞ୍ଜି ପ୍ରବାହ ବୃଦ୍ଧିର ସମ୍ଭାବନା ବୃଦ୍ଧି ପାଇବ। ଏଥିସହିତ ଭାରତକୁ ମଧ୍ୟ କିଛି କ୍ଷତି ସହିବାକୁ ପଡ଼ିପାରେ।

ଟ୍ରମ୍ପଙ୍କ ବିଜୟରୁ ଭାରତକୁ ମିଳିପାରେ ୫ଟି ଫାଇଦା

୧. ଭାରତୀୟ ରପ୍ତାନି କ୍ଷେତ୍ରକୁ ଯଥେଷ୍ଟ ଲାଭ ମିଳିପାରେ। ଯେହେତୁ ଚୀନ୍ ଉତ୍ପାଦ ଉପରେ ଅଧିକ ଶୁଳ୍କ ଲାଗୁ ହୋଇଛି। ଏହାଦ୍ୱାରା ଆମେରିକା ବଜାରରେ ଅଟୋ ପାର୍ଟସ, ସୌର ଉପକରଣ ଏବଂ ରାସାୟନିକ ଉତ୍ପାଦନ ଭଳି କ୍ଷେତ୍ରରେ ଭାରତୀୟ ନିର୍ମାତାମାନଙ୍କର ପ୍ରତିଦ୍ୱନ୍ଦ୍ୱିତା ବୃଦ୍ଧି ପାଇପାରିବ ।

୨. ଟ୍ରମ୍ପଙ୍କ ଜୀବାଶ୍ମ ଇନ୍ଧନ ନୀତି ଏବଂ ଚିନିର ମନ୍ଥର ଅର୍ଥନୈତିକ ଅଭିବୃଦ୍ଧି ଶକ୍ତି ଖର୍ଚ୍ଚ ହ୍ରାସ କରିପାରେ। ଏହା ଏଚପିସିଏଲ, ବିପିସିଏଲ, ଆଇଓସି ଭଳି ଭାରତୀୟ ତୈଳ କମ୍ପାନୀ ଏବଂ ଆଇଜିଏଲ ଏବଂ ଏମଜିଏଲ ଭଳି ଗ୍ୟାସ ବିତରଣ କମ୍ପାନୀ ପାଇଁ ଲାଭଦାୟକ ହୋଇପାରେ।

୩. ଉତ୍ପାଦନ ଏବଂ ପ୍ରତିରକ୍ଷା କ୍ଷେତ୍ର ତ୍ୱରାନ୍ୱିତ ହୋଇପାରିବ। ଆମେରିକାର ଉତ୍ପାଦନ ଏବଂ ସାମରିକ କ୍ଷମତାକୁ ସୁଦୃଢ଼ କରିବା ଉପରେ ତାଙ୍କର ଧ୍ୟାନ ଭାରତ ଡାଇନାମିକ୍ସ ଏବଂ ହାଲ୍ ଭଳି ଭାରତୀୟ ପ୍ରତିରକ୍ଷା କମ୍ପାନୀପାଇଁ ଭଲ ହୋଇପାରେ।

୪. ଟ୍ରମ୍ପ ବିଶ୍ୱର ଅନେକ ଦେଶରେ ବ୍ୟାପିଥିବା ଉତ୍ତେଜନାକୁ ଶେଷ କରିପାରିବେ। ଏଭଳି ସ୍ଥିତିରେ ଯୋଗାଣ ଶୃଙ୍ଖଳାରେ ଉନ୍ନତି ଆସିବ, ଯାହା ଭାରତୀୟ ବ୍ୟବସାୟକୁ ସହାୟକ ହୋଇପାରିବ। ଆମେରିକାର ଶିଳ୍ପ ବିକାଶ ଉପରେ ଟ୍ରମ୍ପ ଗୁରୁତ୍ୱ ଦେଉଛନ୍ତି। ଏଭଳି ସ୍ଥିତିରେ ଉଭୟ ଦେଶରେ କାମ କରୁଥିବା କମ୍ପାନିଗୁଡ଼ିକ ଲାଭବାନ ହୋଇପାରିବେ। ଏଥିରେ ଏବିବି, ସିମେନ୍ସ, କମିନ୍ସ, ହନିୱେଲ୍, ଜିଇ ଟିଆଣ୍ଡଡି ଏବଂ ହିଟାଚି ଏନର୍ଜି ସାମିଲ ଅଛନ୍ତି।

୫. ଟ୍ରମ୍ପଙ୍କ ନେତୃତ୍ୱରେ ବ୍ୟବସାୟିକ ବାତାବରଣରେ ସୁଧାର ଆସିପାରିବ। ଏହାଦ୍ୱାରା କର୍ପୋରେଟ୍ ଟିକସ ହ୍ରାସ ପାଇବାର ସମ୍ଭାବନା ରହିଛି। ଏଥିସହ ବ୍ୟବସାୟ ଅନୁକୂଳ ନୀତି ମାଧ୍ୟମରେ ଭାରତୀୟ ଷ୍ଟକ ବଜାର ମଧ୍ୟ ଗତି ହାସଲ କରିପାରିବ।

ଟ୍ରମ୍ପଙ୍କ ବିଜୟରେ ଭାରତକୁ ଭୋଗିବାକୁ ପଡ଼ିପାରେ ୫ଟି କ୍ଷତି

୧. ମୁଦ୍ରାସ୍ଫୀତି ବଢ଼ିପାରେ। ବର୍ଦ୍ଧିତ ସୁଧ ହାର ଏବଂ ଆମେରିକୀୟ ସାମଗ୍ରୀର ମୂଲ୍ୟ ବୃଦ୍ଧି ଭାରତୀୟ ବ୍ୟବସାୟକୁ ପ୍ରଭାବିତ କରିପାରେ।

୨. ଟ୍ରମ୍ପଙ୍କ ଅର୍ଥନୈତିକ ନୀତି ଆମେରିକୀୟ ଡଲାରକୁ ସୁଦୃଢ଼ କରିପାରେ । ଟିକସ ହ୍ରାସ ଏବଂ ବିତ୍ତୀୟ ପଦକ୍ଷେପଦ୍ୱାରା ବଣ୍ଡ୍ ୟିଲ୍ଡ ବୃଦ୍ଧି ପାଇପାରେ। ଏହାଦ୍ୱାରା ଟଙ୍କାର ମୂଲ୍ୟରେ ହ୍ରାସ ଘଟିବ। ଡଲାର ମଜବୁତ ହେଲେ ଭାରତ ଆମଦାନୀ କରୁଥିବା ଜିନିଷ, ବିଶେଷ କରି ତୈଳ ପାଇଁ ଅଧିକ ଖର୍ଚ୍ଚ ହେବ। ଏହାଦ୍ୱାରା ଘରୋଇ ମୁଦ୍ରାସ୍ଫୀତି ମଧ୍ୟ ବୃଦ୍ଧି ପାଇବ।

୩. ଟ୍ରମ୍ପଙ୍କ ବିଜୟ ପ୍ରଥମେ ଭାରତୀୟ ଷ୍ଟକ ବଜାରରେ ଉନ୍ନତି ଆଣିଥାଇପାରେ, କିନ୍ତୁ ଏହା ଦୀର୍ଘ ଦିନ ପର୍ଯ୍ୟନ୍ତ ସନ୍ଦେହ ଘେରରେ ରହିବ। ଟ୍ରମ୍ପଙ୍କ ନୀତି ଷ୍ଟକ ବଜାରରେ ଅସ୍ଥିରତା ସୃଷ୍ଟି କରିପାରେ। ଅତୀତର ତଥ୍ୟ ଦର୍ଶାଉଛି ଯେ ଟ୍ରମ୍ପଙ୍କ ପ୍ରଥମ କାର୍ଯ୍ୟକାଳରେ ଆମେରିକୀୟ ବଜାର ଭାରତୀୟ ବଜାରକୁ ପଛରେ ପକାଇଦେଇଛି। ଏହି ସମୟରେ ନାସଡାକ୍ ୭୭% ବୃଦ୍ଧି ପାଇଥିଲା। ସେହିପରି ନିଫ୍ଟି ମାତ୍ର ୩୮% ଉପରକୁ ଉଠିବାରେ ସକ୍ଷମ ହୋଇଥିଲା।

୪. ଭିସା ନେଇ ଭାରତୀୟଙ୍କ ପାଇଁ ମଧ୍ୟ ସମସ୍ୟା ଦେଖାଦେଇପାରେ। ଗତଥର ଟ୍ରମ୍ପ ଏଚ୍-୧ବି ଭିସା ଉପରେ ପ୍ରତିବନ୍ଧକ ଲଗାଇଥିଲେ। ଏହା ଆମେରିକାରେ ଥିବା ଭାରତୀୟ ଆଇଟି କମ୍ପାନିଗୁଡ଼ିକୁ ବହୁତ ପ୍ରଭାବିତ କରିଥିଲା।

୫ ଟ୍ରମ୍ପ ଭାରତର ବାଣିଜ୍ୟ ନୀତିକୁ ସମାଲୋଚନା କରିଛନ୍ତି। ବାଣିଜ୍ୟ ପ୍ରତିବନ୍ଧକ ହ୍ରାସ ପାଇଁ ଟ୍ରମ୍ପ ପ୍ରଶାସନ ଭାରତ ଉପରେ ଚାପ ପକାଇପାରେ। ଏହାଦ୍ୱାରା ଆଇଟି, ଔଷଧ ଓ ବୟନଶିଳ୍ପ ଭଳି କ୍ଷେତ୍ର ପ୍ରଭାବିତ ହେବ।

Previous articlehttps://purvapaksa.com/odisha-marketing-for-world-tourism/

Purva Paksha