ଉପରାଷ୍ଟ୍ରପତି ଜଗଦୀପ ଧନଖଡ଼ ସୋମବାର ସମସ୍ତଙ୍କୁ ଆଶ୍ଚର୍ଯ୍ୟ କରି ଏକ ବଡ଼ ନିଷ୍ପତ୍ତି ନେଇଛନ୍ତି। ସେ ସ୍ୱାସ୍ଥ୍ୟଗତ କାରଣ ଦର୍ଶାଇ ହଠାତ୍ ଇସ୍ତଫା ଦେଇଛନ୍ତି। ଏହାକୁ ନେଇ ରାଜନୈତିକ ମହଲରେ ନାନା ପ୍ରକାର ପ୍ରଶ୍ନ ଉଠୁଛି। ସେ ତାଙ୍କ ଇସ୍ତଫା ରାଷ୍ଟ୍ରପତି ଦ୍ରୌପଦୀ ମୁର୍ମୁଙ୍କୁ ପଠାଇଛନ୍ତି। ଜଗଦୀପ ଧନଖଡ଼ ତାଙ୍କ କାର୍ଯ୍ୟକାଳ ଶେଷ ହେବାର ପ୍ରାୟ ଦୁଇ ବର୍ଷ ପୂର୍ବରୁ ଇସ୍ତଫା ଦେଇଛନ୍ତି। କାର୍ଯ୍ୟକାଳ ସମ୍ପୂର୍ଣ୍ଣ ନ କରି ଇସ୍ତଫା ଦେଇଥିବା ସେ ଦେଶର ତୃତୀୟ ଉପରାଷ୍ଟ୍ରପତି ହୋଇଛନ୍ତି। ଇସ୍ତଫା ଦେବା ପରେ ତାଙ୍କୁ ଏବେ କେତେ ପେନସନ ମିଳିବ ଏବଂ କେଉଁ କେଉଁ ସୁବିଧା ମିଳିବ? ଆସନ୍ତୁ ଜାଣିବା ।
ଉପରାଷ୍ଟ୍ରପତିଙ୍କୁ ମିଳୁଥିବା ଦରମା
ଦେଶରେ ଉପରାଷ୍ଟ୍ରପତିଙ୍କ ପଦ ଏକ ସାମ୍ବିଧାନିକ ପଦ। ୨୦୧୮ରେ ବଜେଟ ଉପସ୍ଥାପନ ସମୟରେ ଉପରାଷ୍ଟ୍ରପତିଙ୍କ ଦରମା ମାସିକ ୪ ଲକ୍ଷ ଟଙ୍କା ନିର୍ଦ୍ଧାରଣ କରାଯାଇଥିଲା। ଏହା ବ୍ୟତୀତ, ସରକାରୀ ଆବାସ, ଟ୍ରେନ ଓ ବିମାନରେ ମାଗଣା ଯାତ୍ରା ସୁବିଧା ଏବଂ ମାଗଣା ଚିକିତ୍ସା ସୁବିଧା ମିଳିଥାଏ।
ପଦରୁ ହଟିବା ପରେ କେତେ ମିଳେ ପେନସନ
ପୂର୍ବତନ ଉପରାଷ୍ଟ୍ରପତିଙ୍କୁ ତାଙ୍କ କାର୍ଯ୍ୟକାଳ ଏବଂ ଦରମା ଆଧାରରେ ପେନସନ ନିର୍ଦ୍ଧାରଣ କରାଯାଏ। ଗଣମାଧ୍ୟମ ରିପୋର୍ଟ ଅନୁଯାୟୀ, ପୂର୍ବତନ ଉପରାଷ୍ଟ୍ରପତିଙ୍କୁ ତାଙ୍କ ଦରମାର ପ୍ରାୟ ୫୦ରୁ ୬୦ ପ୍ରତିଶତ ପେନସନ ରୂପେ ମିଳିଥାଏ। ଏହି ହିସାବରେ ଜଗଦୀପ ଧନଖଡ଼ଙ୍କୁ ମାସିକ ପ୍ରାୟ ୨ ଲକ୍ଷରୁ ୨.୫ ଲକ୍ଷ ଟଙ୍କା ପେନସନ ମିଳିପାରେ। ତେବେ, ଏହି ପେନସନ ତାଙ୍କର ପ୍ରାୟ ୩ ବର୍ଷର କାର୍ଯ୍ୟକାଳ (୨୦୨୨ରୁ ୨୦୨୫) ଏବଂ ସରକାରୀ ନିୟମ ଉପରେ ନିର୍ଭର କରିବ।
କେଉଁ ପ୍ରକାର ସୁବିଧା ମିଳିବ
ପୂର୍ବତନ ରାଷ୍ଟ୍ରପତିଙ୍କୁ ମାଗଣା ଚିକିତ୍ସା ସୁବିଧା ମିଳିଥାଏ। ତାଙ୍କ ପରିବାର ସଦସ୍ୟଙ୍କୁ ମଧ୍ୟ ସରକାରୀ ହସ୍ପିଟାଲରେ ଚିକିତ୍ସା ସୁବିଧା ମିଳିଥାଏ। ପୂର୍ବତନ ଉପରାଷ୍ଟ୍ରପତିଙ୍କୁ ଟ୍ରେନ ଓ ବିମାନରେ ମାଗଣା ଯାତ୍ରା ସୁବିଧା ମିଳିଥାଏ। ସେମାନଙ୍କୁ ସରକାରୀ ଆବାସ କିମ୍ବା ହାଉସିଂ ଆଲାଉନ୍ସ ମଧ୍ୟ ଦିଆଯାଇପାରେ, ଯାହା ତାଙ୍କ ବ୍ୟକ୍ତିଗତ ଆବାସ ସ୍ଥିତି ଉପରେ ନିର୍ଭର କରେ। ଏହା ସହିତ ଆବଶ୍ୟକତା ଅନୁଯାୟୀ ସୁରକ୍ଷା ମଧ୍ୟ ପ୍ରଦାନ କରାଯାଏ।
ଧନଖଡ଼ଙ୍କ ପରେ କିଏ ସମ୍ଭାଳିବେ ପଦ
ଯେତେବେଳେ ଉପରାଷ୍ଟ୍ରପତିଙ୍କ ପଦ ଖାଲି ହୁଏ, ରାଜ୍ୟସଭାର ଅଧ୍ୟକ୍ଷଙ୍କ କାର୍ଯ୍ୟ ଅଟକି ନଥାଏ। ସଂବିଧାନର ଅନୁଚ୍ଛେଦ ୯୧ ଅନୁଯାୟୀ, ରାଜ୍ୟସଭାର ଉପସଭାପତିଙ୍କୁ ଅସ୍ଥାୟୀ ଭାବେ ଅଧ୍ୟକ୍ଷଙ୍କ କାର୍ଯ୍ୟ ସମ୍ଭାଳିବାର ଅଧିକାର ରହିଛି। ଅର୍ଥାତ୍, ଯଦି ଉପରାଷ୍ଟ୍ରପତିଙ୍କ ପଦ କୌଣସି କାରଣରୁ ଖାଲି ହୁଏ, ତେବେ ରାଜ୍ୟସଭାର ଉପସଭାପତି ଅଧ୍ୟକ୍ଷଙ୍କ ସମସ୍ତ ଦାୟିତ୍ୱ ନିର୍ବାହ କରିପାରନ୍ତି। ସଂବିଧାନ ତାଙ୍କୁ ଏହି କ୍ଷମତା ପ୍ରଦାନ କରେ।
୧୯ ସେପ୍ଟେମ୍ବର ପୂର୍ବରୁ ନୂଆ ଉପରାଷ୍ଟ୍ରପତି ଚୟନ କାହିଁକି ଜରୁରୀ
ଉପରାଷ୍ଟ୍ରପତି ଧନଖଡ଼ଙ୍କ ଇସ୍ତଫାର ଅର୍ଥ ହେଉଛି ଏବେ ଜଣେ ନୂଆ ଉପରାଷ୍ଟ୍ରପତିଙ୍କ ନିର୍ବାଚନ ହେବ। ସଂବିଧାନର ଅନୁଚ୍ଛେଦ ୬୩ରୁ ୭୧ ଏବଂ ଉପରାଷ୍ଟ୍ରପତି (ନିର୍ବାଚନ) ନିୟମ, ୧୯୭୪ ଅନୁଯାୟୀ ଉପରାଷ୍ଟ୍ରପତି ନିର୍ବାଚନ ପ୍ରକ୍ରିୟା ବିଷୟରେ ବର୍ଣ୍ଣନା କରାଯାଇଛି। ନିୟମ ଅନୁସାରେ, ଧନଖଡ଼ଙ୍କ ଇସ୍ତଫାର ୬୦ ଦିନ ମଧ୍ୟରେ ଅର୍ଥାତ୍ ୧୯ ସେପ୍ଟେମ୍ବର ୨୦୨୫ ପୂର୍ବରୁ ନିର୍ବାଚନ କରାଇବା ଆବଶ୍ୟକ। ଅର୍ଥାତ୍ ଉପରାଷ୍ଟ୍ରପତି ପାଇଁ ଶୀଘ୍ର ନିର୍ବାଚନ ହୋଇପାରେ।
ଉପରାଷ୍ଟ୍ରପତିଙ୍କୁ କିଏ ଚୟନ କରନ୍ତି?
ସଂସଦର ଉଭୟ ସଦନର ସମସ୍ତ ସଦସ୍ୟ ମିଳିତ ଭାବେ ଉପରାଷ୍ଟ୍ରପତିଙ୍କୁ ନିର୍ବାଚନ କରନ୍ତି। ଏହାକୁ ଆନୁପାତିକ ପ୍ରତିନିଧିତ୍ୱ ପ୍ରଣାଳୀ କୁହାଯାଏ। ଏଥିରେ ଏକକ ହସ୍ତାନ୍ତରଣୀୟ ଭୋଟର ବ୍ୟବହାର ହୁଏ। ସରଳ ଭାଷାରେ କହିଲେ, ସାଂସଦମାନେ ଏକ ଗୁପ୍ତ ମତଦାନରେ କେବଳ ଗୋଟିଏ ଭୋଟ ଦିଅନ୍ତି, କିନ୍ତୁ ସେହି ଭୋଟ ଅନେକ ପ୍ରାର୍ଥୀଙ୍କୁ ଦିଆଯାଇପାରେ
Also Readhttps://purvapaksa.com/law-minister-prithviraj-in-danger/
Law Minister Prithviraj in danger ।। ଆଇନ ମନ୍ତ୍ରୀ ପୃଥ୍ୱୀରାଜଙ୍କୁ ବିପଦ
